شىعىس قازاقستاندا توقتاۋسىز باتا بەرەتىن اقساقال بايقاۋدا توپ جاردى
تاياۋدا «اق باتا، اسىل مۇرا» بايقاۋىندا 22 قاتىسۋشىنىڭ ىشىنەن توپ جارىپ، باس جۇلدەنى جەڭىپ الدى. جاسى 90 نان اسقان باتاگوي قاريا قول جايىپ كەلگەن كەز كەلگەن جانعا ىزگى تىلەگىن قارا ولەڭمەن توگىلتە جونەلەدى. ءبىر عاجابى، اۋىلدا اگرونوم بولىپ ەڭبەك ەتكەن اقساقالعا بۇل قاسيەت سوڭعى 10 جىلدا قونىپتى.
مىنە، كەيبىر كۇندەرى وسىلاي تاڭنىڭ اتىسى مەن كۇننىڭ باتىسى باتا سۇراعان جۇرت زيادا اتانىڭ تابالدىرىعىندا كەزەكتە تۇرادى. اسىرەسە ناۋرىز مەرەكەسى، توي- تومالاقتاردا ابىر- سابىر بولىپ كەتەدى. «شامام كەلگەنشە بارلىعىنىڭ كوڭىلىن قالدىرماۋعا تىرىسامىن»، - دەيدى اقساقال.
ءتىپتى تاقىرىپقا ساي، كەلىن ءتۇسىرۋ، قىز ۇزاتۋ، جولاۋشىعا، جاس ۇرپاققا دەپ تىلەكتەرىن بىرىنە ءبىرىن ۇقساتپاي ولەڭمەن ورەدى ەكەن. مۇنىڭ ءبارى ەرتەرەكتە ەسكى داستاندار مەن جىرلاردى، ناقىل سوزدەردى ەرىنبەي وقىپ، كوكەيگە قۇيعاننىڭ ناتيجەسى بولسا كەرەك.
زيادا بەكبايەۆ، باتاگوي اقساقال:
- كەلەشەك ۇرپاق وسىرۋدە قارلىعاشتىڭ قاناتىمەن سۋ سەپكەندەي بولسا- داعى پايداسى تيەر- اۋ دەگەن ماقساتپەن:
ءبىرىڭدى- ءبىرىڭ سىيلا، بالالارىم!
كوز الارتىپ، تاكاپپار قاراماعىن!
اقىلمەنەن ءوزارا تابىسپاساڭ،
وندا، شىركىن، تۇككە دە جارامادىڭ.
قارا سۋدى ءبولىپ ءىش تۋىسىڭمەن،
ءسابي بالا سياقتى كۇلكىسىمەن.
تاماشا ءبارى ادەمى ۇناپ تۇرار،
تۋعاندارىن ءبىلدىرىپ ءبىر كىسىدەن.
جاستايىنان اشتىق، سوعىستان كەيىنگى اۋىر تۇرمىستىڭ ءبارىن باستان وتكەرگەن قاريا قازىرگى ۇرپاق قوي ۇستىنە بوزتورعاي جۇمىرتقالاعان زاماننىڭ قادىرىن ءبىلۋى كەرەك دەپ ەسەپتەيدى. قاشان دا جاستاردى ادال ەڭبەك، شىنشىلدىق پەن تەرەڭ بىلىمگە شاقىرۋدان شارشاعان ەمەس.
زيادا بەكبايەۆ، باتاگوي اقساقال:
- قازاق حالقىن ورگە سۇيرەپ، بۇل كۇندە ەلباسىمىز جەر جاھاندا 120 مەملەكەت بولسا، سونىڭ الدىڭعى قاتارلى 30-ىنىڭ قاتارىنا جەتكىزەمىن دەپ جارعاق قۇلاعى جاستىققا تيمەي ەڭبەك ەتىپ كەلەدى. ەندى ەلباسىنا ايتارىمىز:
ۇلكەندەردەن باتا الساڭ، مۇراتىڭا جەتەرسىڭ!
جومارتتىق قىلساڭ تىرلىكتە، قۋانىشپەن وتەرسىڭ!
قابىل بولعاي باتامىز،
كەشىرە گور، بولسا قاتامىز.
ىرىستارىڭ تاسىپ تۇرسىن!
ابىرويلارىڭ اسىپ ءجۇرسىن!
دوستارىڭ باسىپ تۇرسىن!
دۇشپانىڭ ساسىپ تۇرسىن!
«باتالى ۇلعا باق قونار» دەگەندەي، باتا بەرۋدىڭ ەڭ باستى شارتى، نيەت تازا بولۋى كەرەك ەكەن. بۇگىندە 93-كە قادام باسقان زيادا اقساقالدىڭ بايبىشەسى بىرەر جىل بۇرىن دۇنيە سالىپتى، 11 بالاسىنان ورگەن 60 تان استام نەمەرە، شوبەرەلەرى بار. «ەندىگى ارمانى - زيالى جۇرەكتەن شىققان بۇل ونەرىن ۇرپاعىنا دا ۇيرەتىپ كەتسەم»، - دەيدى.
اۆتورلارى: بولات كوكەناي ۇلى، اناتوليي تەرنوۆ، بەرىك جوبالاي ۇلى
www.24.kz