09:15, 19 - جەلتوقسان 2018 | GMT +6
فيرۋزا ءشارىپوۆا تارازدا «جىل ادامى» اتاندى
الماتى. قازاقپارات - كاسىپقوي بوكستا ەكى سالماق دارەجەسى بويىنشا ءبىرقاتار چەمپيوندىق بەلدىكتەردىڭ يەسى فيرۋزا ءشارىپوۆا ءوزى تۋعان تارازدا 2018-جىلدىڭ «جىل ادامى» اتاندى، دەپ حابارلايدى قازاقپارات.
سپورتشىعا ەستەلىك ءمۇسىن سىيعا تارتىلدى. وسىعان دەيىن فيرۋزا ءشارىپوۆا «التىن ادام» سىيلىعىنىڭ اياسىندا «جىل ادامى» اتانعان بولاتىن.
ايتا كەتەيىك، فيرۋزا وسىعان دەيىن WBC ۇيىمىنىڭ بەلدىگى ءۇشىن فينليانديالىق ەۆا ۆالسترەممەن جۇدىرىقتاسۋى قاجەت بولاتىن. الايدا كەزدەسۋ فيرۋزانىڭ جاراقاتىنا بايلانىستى وتپەي قالدى. قازاقستاندىق سپورتشى وسى كەزدە سول جاراقاتىنان ەم الىپ جاتىر.
اتالعان كەزدەسۋ 2019-جىلدىڭ ناۋرىزىندا وتەدى دەگەن جوسپار بار. ال ونىڭ الدىندا، ياعني 8- قىركۇيەكتە بولعان جەكپە-جەكتە فيرۋزا رەسەيلىك يۋليا كۋتسەنكونى جەڭگەن بولاتىن. بۇل رەسەيلىك سپورتشىنىڭ ءوز مانسابىندا العاشعى جەڭىلىسى بولدى. ال قازاقستاندىق سپورتشى IBO Championship بەلدىگىن ءساتتى قورعاي ءبىلدى.