الماتىدا ەرەكشە جاعدايدى قاجەت ەتەتىن ادامدار ءۇشىن كينوزال اشىلدى

الماتى. قازاقپارات - الماتىدا قازاقستان بويىنشا العاش رەت اۋتيزمى بار ادامدارعا ىڭعايلانعان كينوزال اشىلدى.

كينوزالدا Disney- ءدىڭ «موانا» انيماتسيالىق ءفيلمى كورسەتىلدى، دەپ حابارلايدى قازاقپارات.

اتالمىش جوبانى Disney كومپانياسى رەسەي مەن تمد كولەمىندە Chaplin Cinemas كينوتەاترلار جەلىسىمەن بىرلەسىپ، «بولاشاق» كورپوراتيۆتىك قورىنىڭ قولداۋىمەن ج. زەگە اسىردى. كينوتەتاردا كورسەتىلەتىن فيلمدەردىڭ بارلىعى قابىلداۋ مۇمكىندىگى ەرەكشە ادامدارعا بەيىمدەلگەن. جوبانىڭ ماقساتى مۇمكىندىگى ەرەكشە جانداردى الەۋمەتتىك ورتاعا بەيىمدەۋ.

«كينوفيلمدەردىڭ بارلىعى اۋتيزمى بار ادامدارعا بەيىمدەلگەن. باسقاشا ايتقاندا كورسەتىلەتىن تۋىندىلاردا دىبىس تۇنشىقتىرىلىپ، جارقىن تۇستەر دە ءالسىز ەتىپ بەرىلەدى. زال قاراڭعى بولىپ تۇرادى. سەانس ءجۇرىپ جاتقاندا زالدىڭ ەسىكتەرى جابىلمايدى جانە وندا ارنايى سەنسورلىق قۇرىلعىلار ورناتىلادى»، - دەيدى «بولاشاق» كورپوراتيۆتى قورىنىڭ ديرەكتورى دينارا ءشايجۇنىسوۆا.

سونىمەن قاتار كورەرمەندەر مۇندا ەمىن-ەركىن سىرتقا شىعىپ، ارنايى جۇمساق ورىندىقتاردا دەمالا الادى. بۇعان قوسا ولارعا ءفيلمدى وسى دەمالىس اۋماعىنان دا تاماشالاۋ مۇمكىندىگى جاسالعان. كينوتەاتر قىزمەتكەرلەرى قابىلداۋ مۇمكىندىگى ەرەكشە ادامدارمەن قارىم-قاتىناستى بىلەدى. «بولاشاق» كورپوراتيۆتى قورى قايىرىمدىلىق قارجىسىنا قازاقستاننىڭ 9 قالاسىندا 20 ينكليۋزيۆتى قولداۋ كابينەتتەرىن اشىپ، دەنساۋلىق ساقتاۋ مەن ءبىلىم بەرۋ سالاسى بويىنشا 800 ماماندى دايىنداپ ۇلگەردى. سونداي-اق جىل باسىنان بەرى قور تاراپىنان 4 بەيىمدەلگەن كورسەتىلىم ۇيىمداستىرىلدى.

Chaplin Cinemas كينوتەتارلار جەلىسىنىڭ باس ديرەكتورى باقىتجان مۇساتايەۆتىڭ سوزىنشە، كينوتەاترلار جەلىسى ءوزىنىڭ كينوزالدارىندا ەرەكشە جاعدايدى قاجەت ەتەتىن بالالار مەن وزگە دە بالالاردىڭ باسىن بىرىكتىرۋدى كوزدەيدى.

«ءبىز بۇگىن Disney كومپانياسىمەن بىرىگىپ، وسى باعىتتاعى العاشقى قادامدارىمىزدى جاساپ وتىرعانىمىزعا قاۋناشتىمىز»، - دەدى ب. مۇساتايەۆ.