قاراعاندىدا عالىم جارىلعاپوۆتى ەسكە الۋ تۋرنيرى ءوتىپ جاتىر

قاراعاندى. قازاقپارات - قاراعاندىدا عالىم جارىلعاپوۆتى ەسكە الۋعا ارنالعان بوكستان حالىقارالىق تۋرنير ءوتىپ جاتىر، دەپ حابارلايدى قاراعاندى وبلىسى اكىمدىگىنىڭ رەسمي سايتى حابارلادى.

سپورتتىق جيىننىڭ اشىلۋ سالتاناتىنا وبلىس اكىمى ەرلان قوشانوۆ قاتىستى. سايىسقا قىتاي، تايلاند، رەسەي، قىرعىزستان، وزبەكستان، تاجىكستان جانە قازاقستاننان جينالعان 200 دەن استام سپورتشىلار باق سىناماق.

«ءبىزدىڭ شاقىرۋىمىزدى قابىل الىپ، تۋرنيرگە كەلگەن ءاربىر قوناق پەن سپورتشىلارعا العىسىمدى بىلدىرگىم كەلەدى. عالىم جارىلعاپوۆ - بىرەگەي تۇلعا، ۇلكەن ۇستاز بولعان، قازاقستاندىق سپورتتىڭ دامۋىنا ۇلكەن ۇلەس قوسقان ادام. سوندىقتان دا ول ءبىزدىڭ جادىمىزدا ءوز ءىسىنىڭ كەمەڭگەرى، حالقىنىڭ ءبىرتۋار ۇلى رەتىندە ماڭگى ساقتالادى. بۇگىنگى تۋرنير - سونىڭ دالەلى»، - دەدى ءوز سوزىندە ايماق باسشىسى.

قۇرمەتتى قوناقتار رەتىندە تۋرنيرگە بوكستان الەم چەمپيونى كريستينا حاممەر، گولليۆۋد اكتەرى يگور جيجيكين جانە ستسەناريست ولەگ ستەپچەنكو كەلدى. ولارعا ۇلتتىق شاپاندار مەن ەستەلىك سىيلىقتار تابىس ەتىلدى.

تۋرنير 21- جەلتوقسانعا دەيىن جالعاسادى. بۇل عالىم جارىلعاپوۆتىڭ ارۋاعىنا باعىشتالعان 35- سايىس. ءار كەزەڭدەردە چەمپيوناتتىڭ جەڭىمپازدارى ۆاسيليي جيروۆ، بولات ءجۇمادىلوۆ، ەرماحان ىبىرايىموۆ، اركادي توپايەۆ، يگور شيشكين، اناتولي الەكساندروۆ، ولەگ ماسكايەۆ، بەكزات ساتتارحانوۆ، گەننادي گولوۆكين، سەرىك ەلەۋوۆ، سەرىك ساپيەۆ سياقتى شەبەرلەر بولعان.

عالىم جارىلعاپوۆ بوكستان قازاقستاننىڭ ەڭبەك سىڭىرگەن جاتتىقتىرۋشىسى، ك س ر و سپورت شەبەرى بولعان، «ەرەن ەڭبەگى ءۇشىن» مەدالىمەن، قازاق س س ر جوعارعى كەڭەسىنىڭ قۇرمەت گراموتاسىمەن، كوكپ وك «كومسومولدا بەلسەندى ەڭبەك ەتكەنى ءۇشىن»، «ك س ر و جانە قاز س س ر كاسىبي تەحنيكالىق ءبىلىم وزاتى»، «ك س ر و دەنە شىنىقتىرۋ جانە سپورت وزاتى» بەلگىلەرىمەن ماراپاتتالعان.