الماتىدا جارقىراعان شىرشالار جاڭا جىلدى جاقىنداتا ءتۇستى
الماتىنىڭ نەگىزگى شىرشاسى ساعات 18:00 دە رەسپۋبليكا سارايىنىڭ الدىنداعى الاڭدا جارقىرادى. بيىلعى جىلعى شىرشانىڭ بيىكتىگى 18 مەترگە جەتەدى. ءدال وسى جەردە تۇتاستاي قىسقى قالاشىق سالىنعان.
الماتى قالاسىنىڭ مادەنيەت جانە مۇراعات باسقارماسىنان حابارلاعانداي، 17-جەلتوقساننان 7-قاڭتارعا دەيىن وسىندا كۇن سايىن (31- جەلتوقساندى ەسەپتەمەگەندە) «الەمگە ساياحات» (WINTER FAMILY PARTY) شاراسى وتكىزىلەدى.
دەمالىس كۇندەرى (18، 22، 23، 29، 30- جەلتوقساندا جانە 1، 2، 5، 6، 7- قاڭتاردا) ساعات 16:00-دەن 18:00-گە دەيىن بالالارعا ارنالعان انيماتسيالىق باعدارلامالار، جاڭا جىلدىق قولونەر تۋىندىلارىن جاساۋ كۋرستارى وتكىزىلەدى. سودان كەيىن ساعات 18:00 دەن 18:45 كە دەيىن جاڭا جىلدىق ەرتەگى ايتۋ شاراسى جوسپارلانسا، ساعات 18:45 دەن 19:30 عا دەيىن - اياز اتا جانە اقشاقارمەن فوتوسەسسيا ۇيىمداستىرىلادى.
ساعات 19:30 دان 20:00 گە دەيىن مەرەكەلىك كونسەرتتەر ءوتىپ، سودان كەيىن جاڭا جىلدىق ءبي كەشى باستالادى.
جۇمىس كۇندەرى (24، 25، 26، 27- جەلتوقساندا جانە 3، 4- قاڭتاردا) ساعات 16:00 دەن 18:00 گە دەيىن بالالار ءۇشىن انيماتسيالىق باعدارلاما، ساعات 18:00-20:00 ارالىعىندا جاڭا جىلدىق ءبي كەشى ۇيىمداستىرىلادى.
سونىمەن بىرگە، استاناداعى ەسكى الاڭدا، قازاقستان رەسپۋبليكاسى تۇڭعىش پرەزيدەنت ساياباعىنىڭ الاڭىندا جانە اباي اتىنداعى مەملەكەتتىك اكادەميالىق وپەرا جانە بالەت تەاترىنىڭ الدىندا جانە «الماتى ارەنا» مۇزايدىنىندا تاعى ءتورت شىرشا جارقىرادى.
جاڭا جىلدىق شىرشالاردى جاعۋ شاراسى جارقىن سيپاتتا ءوتىپ، شاراعا «X- FACTOR قازاقستان» جوباسىنىڭ جەڭىمپازدارى، اياز اتا مەن اقشاقار قاتىستى. سونىمەن بىرگە، مەيمانداردىڭ كوڭىلىن مۇرات مۇتۇرعانوۆتىڭ تەاترى سيرك شوۋ-باعدارلاماسى كوتەردى.
جاڭا جىل قارساڭىندا الماتى قالاسىندا حالىقتىڭ قوشەمەتىنە بولەنگەن ورىنداردىڭ ءبىرى - ەسكى الاڭ بولدى. مۇندا ەرەكشە شىرشا ورناتىلعان. ۇلتتىق ستيلدەگى 12 مەترلىك شىرشانىڭ تۇرقى بولەك. شىرشانىڭ قاڭقاسى تەمىردەن جاسالسا، ونىڭ نەگىزىن قۇراعان كەرەگە شىرشاعا ەرەكشە سيپات بەرىپ تۇر.