07:38, 19 - جەلتوقسان 2018 | GMT +6
دانيار ەلەۋسىنوۆتىڭ كەزەكتى جەكپە-جەگى قاشان وتەتىنى بەلگىلى بولدى
استانا. قازاقپارات - جارتىلاي سالماقتاعى كاسىپقوي بوكسشىنىڭ كەلەسى جەكپە-جەگىنىڭ قاشان جانە قاي قالادا وتەتىنى بەلگىلى بولدى.
بۇل تۋرالى دانيار ەلەۋسىنوۆ قازاقپارات تىلشىسىنە بەرگەن سۇحباتىندا ءمالىم ەتتى.
«كاسىبي بوكستاعى كەلەسى جەكپە-جەگىمدى 2019-جىلدىڭ اقپان ايىندا لوندوندا وتكىزۋدى جوسپارلاپ وتىرمىن. قارسىلاسىمنىڭ كىم ەكەنى ازىرگە بەلگىسىز. ول مەنىڭ سالماعىمداعى بوكسشىلاردىڭ رەيتينگىسى بويىنشا انىقتالادى. دەگەنمەن كىممەن جۇدىرىقتاساتىنىم جۋىق ارادا بەلگىلى بولادى»، - دەدى د. ەلەۋسىنوۆ.
ونىڭ ايتۋىنشا، بوكسشى بۇگىندە قىزۋ دايىندىق ۇستىندە جانە باستى ماقساتى وتاندىق بوكستىڭ دامۋىنا بارىنشا ءوز ۇلەسىن قوسۋ.
سونىمەن قاتار، د. ەلەۋسىنوۆ كاسىبي رينگتەگى رەيتينگ جوعارىلاعان سايىن جاۋاپكەرشىلىكتىڭ دە ارتا تۇسەتىنىن ايتىپ ءوتتى.
بۇعان دەيىن بەلگىلى بوكسشىنىڭ الداعى جىلى جازدا 10 راۋندىق كەزدەسۋ وتكىزەتىنىن حابارلاعان بولاتىنبىز.