تۇركىستاندىقتار «ەلباسى جولى. استانا» فيلمىن تاماشالادى

تۇركىستان. قازاقپارات - بۇگىن تۇركىستان وبلىسى سارىاعاش اۋدانىندا «ەلباسى جولى. استانا» فيلمىنىڭ كورسەتىلىمى ءوتتى، دەپ حابارلايدى تۇركىستان وبلىسى اكىمدىگىنىڭ باسپا ءسوز قىزمەتى.

مەملەكەت باسشىسىنىڭ ءجۇرىپ وتكەن داڭعىل جولىنان سىر شەرتەتىن تۋىندىنىڭ كورسەتىلىمىنە وبلىس باسشىسى جانسەيىت تۇيمەبايەۆ قاتىستى. سونداي-اق، وبلىس ارداگەرلەرى مەن زيالى قاۋىم وكىلدەرى، باق قىزمەتكەرلەرى مەن ءوڭىر تۇرعىندارى تاماشالادى.

«ەلباسى جولى. استانا» فيلمى بولعان وقيعانىڭ جەلىسىندە تۇسىرىلگەن. عۇمىرنامالىق تۋىندىنىڭ اۆتورى بەلگىلى رەجيسسەر اقان ساتايەۆ. شىعارمادا ەلوردانىڭ كوشۋى، سول كەزەڭدەگى قيىندىقتار، جاپپاي قۇرىلىس پەن مەملەكەت قۇرۋداعى ىلگەرى ىستەر سۋرەتتەلگەن.

شىعارمانىڭ كورسەتىلىمىنە قاتىسقان وبلىس اكىمى جينالعان قاۋىمدى تاۋەلسىزدىك مەرەكەسىمەن قۇتتىقتاپ، فيلمگە تۇزدىق بولار ءوز ەستەلىكتەرىمەن دە ءبولىستى.

«سىزدەردى ۇلىق مەرەكەمىز - ق ر تاۋەلسىزدىگى كۇنىمەن شىن جۇرەكتەن قۇتتىقتايمىن! تاۋەلسىزدىك كۇنى - قازاقستاننىڭ ءاربىر ازاماتى ءۇشىن قاستەرلى مەرەكە. عاسىرلار بويى ازاتتىق اڭساعان ەلدىڭ ارمانى وسىدان 27 جىل بۇرىن ورىندالىپ، مەملەكەتىمىز ءوز تاۋەلسىزدىگىن جاريالادى. تۇڭعىش پرەزيدەنتىمىز - ۇلت كوشباسشىسى نۇرسۇلتان نازاربايەۆتىڭ ساليقالى ساياساتىنىڭ ارقاسىندا ءبىز زاماناۋي، اشىق ءارى دەموكراتيا قاعيدالارىنا ادال قوعام قۇرا بىلدىك. بۇگىن نازارلارىڭىزعا ۇسىنىلىپ وتىرعان «ەلباسى جولى. استانا» فيلمى ەل استاناسىنىڭ الماتىدان اقمولاعا كوشىرىلگەن ءساتىن سيپاتتايدى. ەلباسىمىز ەلوردانى اقمولاعا كوشىرۋ جونىندەگى ويىن بىلدىرگەن ساتتە ول شەشىمدى قولداماعاندار كوپ بولدى. دەگەنمەن، استانا ۇلتتى ۇيىستىرىپ، قازاقتىڭ مارتەبەسىن كوتەرگەن ورداعا اينالدى. ەلباسىمىزدىڭ تاريحي شەشىمى دۇرىس ەكەنىن ۋاقىت دالەلدەپ بەردى. پرەزيدەنتىمىزدىڭ تاۋەلسىزدىگىمىزدى تۇعىرلى ەتۋ جولىنداعى قاجىرلى ەڭبەگى مەن يگى باستامالارىن ەل بىلەدى جانە قۇرمەتتەيدى»، - دەدى جانسەيىت قانسەيىت ۇلى.

فيلمنىڭ باستى كەيىپكەرى - مەملەكەتتىك قىزمەتكەر. ول ەلباسىنىڭ قاسىندا ءجۇرىپ وتكەنىن ەسكە الادى. نۇرسۇلتان نازاربايەۆتىڭ ءرولىن بەلگىلى اكتەر مۇرات اقمانوۆ سومداعان. فيلم تاريح حرونولوگياسىنا ساي ناقتى داتالارمەن جانە سول تۇستا تۇسىرىلگەن تاريحي بەينەلەرمەن كوركەمدەلگەن.

ەلباسى عۇمىرناماسى مەن ەلوردا تاريحىنا نەگىزدەلگەن فيلم تۇركىستاندىق كورەرمەن قاۋىمنىڭ كوڭىلىنەن شىعىپ، تۋىندىعا جوعارى باعالارىن بەردى.