فرانسيا ەلشىلىگى قازاق ەلىن تاۋەلسىزدىك كۇنىمەن ەرەكشە قۇتتىقتادى
ۆيدەودا ەلشىلىك قىزمەتكەرلەرى قازاقستاندىقتاردى تاۋەلسىزدىك كۇنىمەن ءبىرىڭعاي قازاق تىلىندە قۇتتىقتاپ جاتقانىن كورۋگە بولادى. قۇتتىقتاۋ ۆيدەودا فرانسيانىڭ قازاقستانداعى توتەنشە جانە وكىلەتتى ەلشىسى فيليپپ مارتينە جۇرەكجاردى لەبىزىن بىلدىرە كەلە جاقىندا عانا نۇرسۇلتان نازاربايەۆتىڭ جاريالانعان «ۇلى دالانىڭ جەتى قىرى» ماقالاسى تۋرالى دا اتاپ وتەدى.
«جاقىندا عانا پرەزيدەنت نازاربايەۆتىڭ قازاقتىڭ ۇلى تاريحى جايلى ماقالاسى جاريالاندى. ول ماقالادا پرەزيدەنت ۇلتتىق تاريحتى جەكە ەمەس، ءبىرتۇتاس قالپىندا عىلىمي تۇرعىدا زەرتتەپ- زەردەلەۋ كەرەك دەدى»، - دەيدى فيليپپ مارتينە.
ەلشىلىك قىزمەتكەرلەرى بولاشاققا نىق قادام باسىپ، بۇگىنگىنى بارىنشا باعالاۋ ءۇشىن، وتكەن كۇننىڭ قۋانىشتى ساتتەرى مەن قاسىرەتىن ۇمىتپاۋ كەرەكتىگىن ايتادى. «مەنىڭشە، قازاقستاندى بىرەگەي ەتىپ تۇرعان - ونىڭ ارتۇرلىلىگى. قازاقستاننىڭ مادەنيەتى مەن ادەبيەتى، ونەرى، حالقى، ءتىپتى تابيعاتى دا ءارتۇرلى. كوپ ۇلتتى قازاقستاندى ەۋروپاعا دا، ازياعا دا جاتقىزۋعا بولادى. بۇل قازاقستاننىڭ وتە باي ەكەنىنىڭ دالەلى. سىزدەر ءۇشىن ەڭ ماڭىزدى كۇن - تاۋەلسىزدىك كۇنىمەن شىن جۇرەكتەن قۇتتىقتايمىز»، - دەيدى ەلشى.
ەسكە سالا كەتسەك، قازاق تىلىندەگى جۇرەكجاردى تىلەگىن ايتىپ، مەملەكەتتىك تىلىمىزگە قۇرمەتىن فرانسيا ەلشىسى بۇرىن دا كورسەتكەن ەدى. فيليپپ مارتينە بۇعان دەيىن تۇركىستان قالاسىنان قازاق تىلىندە رەپورتاج جۇرگىزگەن بولاتىن.