شەتەلدىك ديپلوماتيالىق وكىلدىكتەرى قازاقستاندىقتاردى تاۋەلسىزدىك كۇنىمەن قۇتتىقتادى

استانا. قازاقپارات - شەتەلدىڭ ءبىرقاتار ديپلوماتيالىق وكىلدىكتەرى مەن ەلشىلىكتەر قازاقستاندىقتاردى تاۋەلسىزدىك كۇنىمەن قۇتتىقتادى، دەپ حابارلايدى قازاقپارات.

ا ق ش ىستەرى بويىنشا ۋاقىتشا سەنىمدى وكىلى تەودور لينگ پەن ونىڭ جۇبايى مۋلياني بارلىق قازاقستاندىقتاردى تاۋەلسىزدىك مەرەكەسىمەن قۇتتىقتادى.

«قازاقستانداعى ا ق ش ديپلوماتيالىق ميسسياسىنىڭ اتىنان مەنىڭ جۇبايىم مۋلياني جانە مەن سىزدەرگە ەڭ ىزگى تىلەكتەرىمىز بەن قۇتتىقتاۋلارىمىزدى بىلدىرەمىز. ءبىز وسى ەلدە تۇرىپ، جۇمىس ىستەپ جۇرگەنىمىزگە وتە قۋانىشتىمىز. سىزدەردىڭ مەيىرىمدىلىكتەرىڭىز بەن قوناقجايلىقتارىڭىزدىڭ ارقاسىندا مۇندا ءوز ۇيىمىزدە تۇرىپ جاتقانداي سەزىنەمىز. ءبىز قازاقستاننىڭ الەمدى، ءوزارا تۇسىنىستىك پەن قاۋىپسىزدىكتى ىلگەرىلەتۋدەگى ماڭىزدى ءرولىن ەرەكشە باعالايمىز»، - دەدى تەودور لينگ قازاقستانداعى ا ق ش ەلشىلىگىنىڭ فەيسبۋكتەگى پاراقشاسىندا جاريالانعان ۆيدەو-قۇتتىقتاۋدا.

سونداي-اق قازاقستان تاۋەلسىزدىگىنىڭ 27 جىلدىعىمەن فرانسيانىڭ قازاقستانداعى ەلشىلىگى قۇتتىقتاپ، قازاق تىلىندەگى قۇتتىقتاۋ ۆيدەوسىن جاريالادى. ەلىمىزدىڭ تۇرعىندارىن قازاقستان تاۋەلسىزدىگى كۇنىمەن رەسەي ەلشىلىگى دە قۇتتىقتادى. 

ۇلى بريتانيانىڭ قازاقستانداعى ەلشىسى مايكل گيففورد جاريالاعان بەينەۇندەۋىندە تاۋەلسىزدىك كۇنى بارلىق قازاقستاندىقتار ءۇشىن ەرەكشە ەكەندىگىن اتاپ ءوتتى. «بۇل كۇن بۇكىل قازاق حالقىنىڭ تاريحىن، قازاقستاننىڭ تاۋەلسىزدىكپەن بىرگە تاپقان ەڭ ماڭىزدى قۇندىلىقتارىن كورسەتەدى. سونىمەن بىرگە، بۇل كۇن بارلىق قازاقستاندىقتاردىڭ جارقىن بولاشاققا ءۇمىتىن بەينەلەيدى»، - دەدى ول.

«تاۋەلسىزدىك كۇنى بارشاڭىزعا قۇتتى بولسىن! ازەربايجان رەسپۋبليكاسىنىڭ قازاقستانداعى ەلشىلىگى قازاقستان ازاماتتارىن تاۋەلسىزدىك كۇنىمەن قۇتتىقتايدى! باۋىرلاس حالقىمىزعا ودان ءارى تابىستارعا جەتە بەرۋىنە، گۇلدەنۋگە تىلەكتەسپىز!»، - دەپ قۇتتىقتادى ازەربايجان ەلشىلىگى.