ەرەۆاندا قازاقستاندىق «كوشپەندىلەر» فيلمى كورسەتىلدى
16- جەلتوقسان كۇنى قازاقستاننىڭ ارمەنياداعى ەلشىلىگىنىڭ باستاماسىمەن ەرەۆان قالاسىنىڭ «ماسكەۋ» كينوتەاترىندا ارميان كورەرمەنىنە قازاقستاندىق «كوشپەندىلەر» اتتى تاريحي بلوكباستەر كورسەتىلدى.
كورسەتىلىم الدىندا قازاقستاننىڭ ارمەنياداعى ەلشىسى تيمۋر ورازايەۆ قوناقتارمەن امانداسىپ، وسىدان تۋرا 27 جىل بۇرىن، 1991-جىلدىڭ 16- جەلتوقسانىندا الەمنىڭ ساياسي كارتاسىندا جاڭا مەملەكەت - تاۋەلسىز قازاقستان پايدا بولعانىن اتاپ ءوتتى.
«جەلتوقساننىڭ سول كۇنىندە ءبىز ەركىندىك پەن تاۋەلسىزدىكتى تاڭدادىق. ءبىزدىڭ ۇرپاق ءۇشىن اتا-بابالارىمىزدىڭ اڭساپ كەتكەن ىزگى ارمان-مۇراتىن ىسكە اسىرۋ قۇرمەتى ءتۇستى. قازاقستان ەلشىلىگى ارميان حالقىنىڭ كورەرمەنىنە ءدال وسى «كوشپەندىلەر» فيلمىن كورسەتۋى - كەزدەيسوق جاعداي ەمەس. سەبەبى بۇل تۋىندى - قازاق مەملەكەتتىلىگى مەن ەگەمەندىگىنىڭ قالىپتاسۋى تۋرالى باياندايتىن، ليريكاعا تولى كارتينا»، - دەپ اتاپ ءوتتى ول.
كەشتىڭ قوناقتارى - ارمەنيانىڭ زيالى قاۋىمى، ساراپشىلارى، بۇقارالىق اقپارات قۇرالدارىنىڭ وكىلدەرى قازاقستان حالقىن، ونىڭ تۇڭعىش پرەزيدەنتى ن. نازاربايەۆتى تاۋەلسىزدىك كۇنىمەن قۇتتىقتاپ، ىزگى نيەتتەرىن ءبىلدىردى.
«كوشپەندىلەر» - 2005-جىلى قازاق كلاسسيگى ءىلياس ەسەنبەرليننىڭ «كوشپەندىلەر» اتتى تريلوگياسى كىتاپتارىنىڭ ءبىرى بويىنشا تۇسىرىلگەن فيلم. فيلمنىڭ تاريحي نەگىزى - قازاقتىڭ اتاقتى حانى ابىلايدىڭ ءومىربايانى. تانىمال قازاق اكتەرلەرىنەن بولەك كارتيناعا گولليۆۋد جۇلدىزدارى مارك داكاسكوس، دجەيسون سكوتت لي جانە تاعى باسقالارى تۇسكەن.