قازاقستان ايتماتوۆتىڭ شىعارماسى بويىنشا فيلم تۇسىرەدى
قىتايلىق وقىرماندار قالامگەردى ەسكە الۋعا ارنالعان كونفەرەنسياعا قاتىسىپ، كورمەنى تاماشالادى. جازۋشىنىڭ مەرەيتويىن باسقا دا باۋىرلاس حالىقتار كەڭ كولەمدە اتاپ ءوتتى. ال قازاقستان جازۋشىنىڭ «عاسىردان دا ۇزاق كۇن» اتتى شىعارماسىنا فيلم شىعارماقشى.
ءبىزدىڭ تىلشىمىزگە بەرگەن سۇحباتىندا ايتماتوۆ اتىنداعى حالىقارالىق قوردىڭ پرەزيدەنتى ەلدار ايتماتوۆ وسىلاي دەدى. كوركەم فيلمدى سەرب حالقىنىڭ تانىمال رەجيسسەرى ەمير كۋستۋريتسا تۇسىرەدى. قىرعىزدىڭ دارىندى ۇلى وسى رومانىندا قازاقستاندا بولعان وقيعانى سۋرەتتەيدى. ەلدار شىڭعىس ۇلى اكەسىنىڭ قازاقتىڭ دا جازۋشىسى ەكەنىن ايتادى.
ايگىلى سۋرەتكەردىڭ بالالىق شاعى قازاق- قىرعىز شەكاراسىندا وتكەن. قالامگەر كوپتەگەن تۋىندىلارىندا ءبىزدىڭ ەلدىڭ ءومىرى مەن تابيعاتىن سۋرەتتەگەن. كونفەرەنسيادا قىرعىزستاننىڭ بۇرىنعى پرەزيدەنتى روزا وتۋنبايەۆا قىتايدا جازۋشىنىڭ 5 كىتابى جارىق كورەتىنىن ايتتى.
ەلدار ايتماتوۆ، ايتماتوۆ اتىنداعى حالىقارالىق قوردىڭ پرەزيدەنتى:
- ايتماتوۆتىڭ شىعارماشىلىعىنا قاتىستى شارالار ءالى دە جالعاسادى. جازۋشىنىڭ تۋىندىلارى كوپتەگەن مەملەكەتتەر اراسىنداعى جالعاستىرۋشى بۋىن ىسپەتتەس. شىعارمالارى حالىقتاردى جاقىنداستىرادى. ءبارى قىزىعا وقىپ، ەرەكشە قۇرمەتتەيدى. قىزىقتى جوبالار ءالى الدا. قازىر قىتايمەن دە جازۋشى شىعارمالارىنىڭ جەلىسىنە فيلم ءتۇسىرۋدى جوسپارلاپ وتىرمىز.
روزا وتۋنبايەۆا، قىرعىزستاننىڭ بۇرىنعى پرەزيدەنتى:
- ءبىزدىڭ كەشكە كوپ ادام كەلدى. ءبىزدىڭ ستۋدەنتتەر كەلدى. قازاق، ازەربايجان، وسى جەردەگى ءبارىنىڭ وكىلدەرى كەلىپ، شىڭعىس ايتماتوۆ ەلدەردىڭ ءبارىنىڭ باسىن قوسقان ادام بولعانىن تاعى ءبىر كوردىك.
www.24.kz