شۆەتسيادا قازاق مادەنيەتىنەن سىر شەرتەتىن «كوشپەندىنىڭ ۇيىندە» اتتى كورمە اشىلدى

ستوكگولم. قازاقپارات - ستوكگولمدە قازاقستاننىڭ مادەنيەتى مەن سالت- ءداستۇرىن پاش ەتەتىن «كوشپەندىنىڭ ۇيىندە» اتتى جەتى كۇندىك كورمە اشىلدى، دەپ حابارلايدى قازاقپاراتتىڭ مەنشىكتى ءتىلشىسى.

شۆەد استاناسىنىڭ تاريحي اۋدانىندا ورنالاسقان گالەرەياداعى كورمەنى ۇيىمداستىرۋشىلار - شۆەتسياداعى قازاقستاندىق جاستار قاۋىمداستىعى. وعان قازاقستان ەلشىلىگى مەن قازاق دياسپوراسى قولداۋ كورسەتكەن. دەگەنمەن، شىعىنداردىڭ باسىم بولىگىن كوتەرگەن - ستوكگولم مەرياسى ەكەنىن ايتا كەتكەن ءجون.

«ءبىز شۆەدتەردى قازاق مادەنيەتىمەن تانىستىرۋدى ماقسات ەتتىك»، - دەيدى شۆەتسياداعى قازاقستاندىق جاستار قاۋىمداستىعىنىڭ جەتەكشىسى ايدانا بەكبەرگەنوۆا.

كورمەدە قازاقتىڭ ۇلتتىق كيىمدەرى، ەلىمىز تۋرالى فوتوسۋرەتتەر، تۇرمىستا قولدانىلاتىن زاتتار مەن مۋزىكالىق اسپاپتار كەلۋشىلەر نازارىنا ۇسىنىلعان. كەي ەكسپوناتتاردى قازاقستاندىق جاستار قاۋىمداستىعىنىڭ مۇشەلەرى ءوز قولىمەن جاساعان، الايدا رەكۆيزيتتەردىڭ كوپشىلىگىن شۆەتسياداعى قازاق دياسپوراسى ۇسىنىپ وتىر.

ايتا كەتۋ كەرەك، ستوكگولمنەن 100 شاقىرىم قاشىقتىقتا ورنالاسقان ۆەستەروس قالاشىعىندا 300 دەن استام قازاق تۇرادى. ولار 70-جىلدارى تۇركيادان وسىندا قونىس اۋدارعان.

«ولار قازاق مادەنيەتىنە ۇلكەن قۇرمەتپەن، ۇقىپپەن قارايدى. قولدان جاسالعان ءجۇن كورپەنى، ۇلتتىق كيىمدەر مەن باسقا دا كوپتەگەن زاتتاردى ءبىز سولاردان الدىق»، - دەيدى ايدانا بەكبەرگەنوۆا.

كورمەگە كەلۋشىلەر باۋىرساق، سامسا، قۇرت سەكىلدى قازاقتىڭ ۇلتتىق تاعامدارىنان ءدام تاتىپ، قازاقستاندا وندىرىلگەن شوكولادتىڭ، جاڭعاق پەن كەپتىرىلگەن جەمىستەردىڭ ءدامىن كورە الادى.

«مۇنداعى حالىق باۋىرساقتى ءسۇيىپ جەيدى، ال قۇرتقا ءبىرتۇرلى ساقتىقپەن قارايدى»، - دەيدى  ش ق ج ق جەتەكشىسى.

بۇل - قازاقستاندىق جاستار قاۋىمداستىعىنىڭ شۆەتسيادا وتكىزىپ وتىرعان ءتورتىنشى ءىس- شاراسى. ەندىگى ماقسات - 2019 -جىلعى ناۋرىز مەيرامىن قازاقتار قونىستانعان ۆەستەروس قالاشىعىندا كەڭ اۋقىمدا اتاپ ءوتۋ.

«ۆەستەروستاعى 900 ادامدىق كونسەرت زالىن جالعا الۋ جونىندە كەلىسسوز جۇرگىزىپ جاتىرمىز. ناۋرىز مەيرامىنا وراي ۇلكەن كونسەرت وتكىزەمىز»، - دەپ اتاپ ءوتتى ا. بەكبەرگەنوۆا.

 ونىڭ سوزىنشە، الەمدىك حيتتەردىڭ كاۆەرىن دومبىرامەن ورىنداپ، تانىمال بولعان وتاندىق «Made in KZ» توبىن جانە باسقا دا انشىلەردى شۆەتسياعا شاقىرۋ ويدا بار. ودان بولەك، كەلەسى جىلدىڭ جازىندا ستوكگولمدە قازاقستاندىق قولونەر شەبەرلەرىنىڭ كورمەسىن وتكىزۋ جوسپارلانىپ وتىر. ال قازىر ءوتىپ جاتقان «كوشپەندىنىڭ ۇيىندە» كورمەسى وسى جۇماعا دەيىن جالعاسادى.

 اۆتور: تيمۋر دۇيسەكەيەۆ