ەلباسىنىڭ وق وتكىزبەيتىن قىزمەتتىك كولىگى كورمەگە قويىلدى

 استانا. قازاقپارات - ەلباسىنىڭ قىزمەتتىك كولىگى تەمىرتاۋداعى ءبىرىنشى پرەزيدەنت مۇراجايىنا ارەڭ سيدى.

وق وتپەيتىن مەتالمەن قاپتالعان نەمىس كولىگىن ىشكە كىگىزۋ ءۇشىن عيماراتتىڭ كىرە بەرىسىن بۇزۋعا تۋرا كەلىپتى. بۇل تۋرالى ك ت ك ارناسى حابارلايدى.

مۇراجايدا ەلباسىنىڭ قولدانعان زاتتارى مەن ءار ەلدىڭ باسشىلارى بەرگەن سىيلىقتار بار. ەندى ول نازاربايەۆتىڭ وسىدان 10 جىل بۇرىن مىنگەن قىزمەتتىك كولىگىمەن تولىقتى.

«نەگىزگى كىرە بەرىس ارقىلى كىرگىزدىك. ول ءۇشىن الدىمەن كىرە بەرىستەگى ەسىك تەرەزەلەردىڭ ءبارىن الىپ تاستاۋعا تۋرا كەلدى. كراندارمەن كوتەرىپ باسپالداقتارعا قويدىق. سودان كەيىن ەستوكادا ورناتىپ سول ارقىلى ىشكە كىرگىزدىك. اسا قيىن بولعان جوق ەندى»، - دەيدى تۇڭعىش پرەزيدەنت تاريحي-مادەني ورتالىعىنىڭ ديرەكتورى سايدا سارعىزوۆا.

كولىكتىڭ قوزعالتقىشىنىڭ كولەمى 5 جارىم ليتر، سالماعى 5 تونناعا جەتەدى. كورپۋسى مەن تەرەزەلەرىن كاليبرى 5 سانتيمەترگە دەيىنگى سنارياد تا تەسىپ وتە المايدى. پرەزيدەنت كولىكتى ەل اۋماعىن ارالاعاندا جانە مارتەبەلى قوناقتاردى كۇتىپ الاردا مىنگەن.