شىعىس قازاقستاندا «اباي الەمى» كىتاپتار توپتاماسىنىڭ تۇساۋكەسەر ءراسىمى ءوتتى
ۇلى اباي ەسىمىن يەلەنگەن تەاتر قابىرعاسىندا وتكەن ءىس-شاراعا اكادەميك عاريفوللا ەسىم، قازاقستان جازۋشىلار وداعىنىڭ ءتوراعاسى ۇلىقبەك ەسداۋلەتوۆ، ارحەولوگ، ت. ع. د. زەينوللا ساماشەۆ، جازۋشى الىبەك اسقاروۆ پەن بوريس شەرباكوۆتار جانە «اباي الەمىنىڭ» رەداكسيالىق توپ جەتەكشىسى، بەلگىلى ساتبايەۆتانۋشى، جازۋشى مەدەۋ سارسەكەيەۆ قاتىستى.
قالا جۇرتشىلىعى مەن قوناقتارعا ارحەولوگيالىق قازبا جۇمىستارى ناتيجەسىندە مول تاريحي مۇرامىزدى قالىپتاستىرعان «ۇلى دالانىڭ التىن جادىگەرلەرى» مەن قازاق زەرگەرلىك ونەرىنىڭ وتكەنى مەن بۇگىنى تۋرالى مول ماعلۇمات بەرەتىن «كۇمىس سيقىرى» زەرگەرلىك ونەر كورمەسى ۇسىنىلدى.
«ارت زامان» جوباسى اياسىندا وبلىستىڭ كوركەم سۋرەت قورىن بايىتقان جانتاي شاردەنوۆ، ساليحيتدين ايتبايەۆ، ماعاۋيا اماندولوۆ، باحتيار، ازات تابيەۆتەر جانە تاعى باسقا سۋرەتشىلەردىڭ قولىنان شىققان تۋىندىلار سەمەيلىكتەردىڭ تۋعان ولكەنىڭ تۇمسا تابيعاتى، وتكەن تاريحى، ۇلتتار دوستىعى مەن جارقىن بولاشاعى تۋرالى تانىمىن كەڭەيتتى.
كەش بارىسىندا وبلىس اكىمى دانيال احمەتوۆ شىعىس قازاقستاندىقتاردى ەلىمىزدىڭ باستى مەرەكەسى - تاۋەلسىزدىك كۇنىمەن قۇتتىقتادى. تەاتر ساحناسىندا «اباي الەمىنە» ەنگەن شىعارمالاردان تەاترلاندىرىلعان كورىنىستەر قويىلدى.
ءوڭىر باسشىسى تۇعىرلى تاۋەلسىزدىگىمىزگە قولىمىز جەتكەن كۇننەن باستاپ، قازاق حالقى ءوزىنىڭ بىرەگەي ءداستۇر- سالتىمەن، رۋحاني قازىنالارىمەن قايتا قاۋىشقانىن ايتتى. ۇمىت بولعان - ۇلى ەسىمدەر قايتا ورالعانىن اتاپ ءوتتى.
«ءبىز «رۋحاني جاڭعىرۋ» باعدارلاماسى اياسىندا شىعىس قازاقستاننىڭ ادەبي مۇراسىن جاس ۇرپاق، كوزى قاراقتى وقىرمانعا جەتكىزۋ ءۇشىن، ارنايى كىتاپتار توپتاماسىن شىعارۋدى قولعا الدىق. اباي - ەلىمىزدى جەتى قاراڭعى تۇندە اداستىرمايتىن تەمىر قازىق! ۇلى پرەزيدەنتىمىز ءارقاشان حاكىم ءسوزىن بويتۇمارعا بالاپ جاس ۇرپاقتى، بۇقارا حالىقتى ىزگىلىك جولىنا شاقىرىپ وتىرادى. سول سەبەپتى، جوبانىڭ «اباي الەمى» اتانۋى، ابايدان باستالۋى ورىندى شەشىم، زاڭدى قۇبىلىس دەپ ەسەپتەيمىن!»، - دەدى ول.
كىتاپتار توپتاماسىنىڭ العاشقى باسىلىمىندا ۇلى اباي، كەمەڭگەر شاكارىم، دانا مۇحتار، فەدور دوستويەۆسكيدىڭ بۇرىن-سوڭدى جاريالانباعان شىعارمالارى جارىق كوردى. بۇدان باسقا، جيناققا «امرە ۆ پاريجە» ەستەلىك كىتابى، تولەۋ كوبدىكوۆتىڭ «اتاندىم ءوز تۇسىمدا اقىن تولەۋ»، مارات قابانبايەۆتىڭ «تۋعان جەردىڭ ءتورت مەزگىلى»، اناتولي يۆانوۆتىڭ «تەني يسچەزايۋت ۆ پولدەن»، مەدەۋ سارسەكەنىڭ «جارىلىس» جانە «كومبە»، بوريس شەرباكوۆتىڭ «شىعارمالارى» ەندى.
بارلىق كىتاپتار وبلىس كىتاپحانالارىنىڭ قورلارىنا، ال ونىڭ ەلەكتروندىق نۇسقاسى قازاق ۇلتتىق ەلەكتروندىق كىتاپحاناسىنىڭ سايتىندا ورنالاستىرىلاتىن بولادى.
كەلەسى جىل جاستارعا ارنالعاندىقتان، ەكىنشى باسىلىمدى جاستار شىعارمالارىمەن تولىقتىرۋ جونىندە شەشىم قابىلداندى.
وسىلايشا، 2019 -جىلى «اباي الەمى» سەرياسىمەن شاكىر ابەنوۆ، ساپارعالي بەگالين، سەمەن انيسيموۆ، يسا بينازاروۆ، مەڭعالي مۋسين، دميتريي چەرەپانوۆتار سىندى وتىزدان استام اۆتوردىڭ شىعارمالارىن جاريالاۋ جوسپارلاندى.
«كەلەشەكتە ءبىز قازاقستان جازۋشىلار وداعىنا مۇشە بولعان جەرلەستەرىمىزدىڭ ۇزدىك تۋىندىلارىن شىعارۋدى جالعاستىراتىن بولامىز. بىزگە جاس دارىنداردىڭ جيناقتارىن شىعارۋدى قولعا الۋ كەرەك»، - دەدى دانيال احمەتوۆ ءوز ءسوزىن قورىتىندىلاپ.