نۇرسۇلتان نازاربايەۆ تاۋەلسىزدىك كۇنىنە ارنالعان سالتاناتتى جيىنعا قاتىستى
مەملەكەت باسشىسى جيىنعا قاتىسۋشىلاردى جانە بارشا قازاقستان حالقىن ۇلتتىق مەرەكەمىز - تاۋەلسىزدىك كۇنىمەن قۇتتىقتادى.
قازاقستان پرەزيدەنتى تاۋەلسىزدىكتىڭ 27 جىل ىشىندە ەلىمىز ءوزىنىڭ دامۋ جولىندا زور جەتىستىكتەرگە جەتكەنىن اتاپ ءوتتى.
ەلباسى ەگەمەن مەملەكەتىمىزدىڭ قۇرىلۋ تاريحىندا قازاقستاننىڭ جاس استاناسىنىڭ ماڭىزدى ءرول اتقارعانىنا ايرىقشا توقتالدى.
«ەۋرازيانىڭ جۇرەگىندە ورنالاسقان جاڭا ەلوردا جاڭعىرعان قازاقستاننىڭ سيمۆولى سانالادى. بيىل استانامىزدىڭ 20 جىلدىعىن ەلىمىزدىڭ بارلىق وڭىرىمەن بىرگە جوعارى دەڭگەيدە اتاپ وتتىك»، - دەدى نۇرسۇلتان نازاربايەۆ.
نۇرسۇلتان نازاربايەۆ تاۋەلسىزدىك كۇنىنە ارنالعان سالتاناتتى جيىنعا قاتىستى مەملەكەت باسشىسى قازاقستاندا جۇرگىزىلگەن اۋقىمدى نارىقتىق رەفورمالار ميلليوننان استام ازاماتتارىمىزدىڭ كاسىپكەرلىك قابىلەتتەرىن ەكونوميكاعا جۇمىلدىرۋعا جول اشقانىن ايتتى.
«ەكونوميكانى جۇيەلى يندۋستريالاندىرۋ وڭدەۋ ونەركاسىبىنىڭ ۇلەسىن ايتارلىقتاي ارتتىرۋعا سەپتىگىن تيگىزدى. بۇگىندە مۇنداعى ءونىم كولەمى شامامەن 9,5 تريلليون تەڭگەنى قۇراپ وتىر»، - دەدى قازاقستان پرەزيدەنتى.
سونداي-اق، ەلباسى كولىك-لوگيستيكا ينفراقۇرىلىمىنا تارتىلعان ينۆەستيتسيانىڭ ارقاسىندا قازاقستان قۇرلىقتىق ماڭىزى بار ترانزيتتىك حابقا اينالعانىن اتاپ ءوتتى.
سونىمەن قاتار، نۇرسۇلتان نازاربايەۆ تاۋەلسىزدىك جىلدارى تابىسى ەڭ تومەنگى كۇنكورىس دەڭگەيىنەن تومەن تۇرعىندار سانى 15 ەسە ازايىپ، ال ناقتى ەڭبەكاقى 4 ەسە ارتقانىن ايتتى.
«ەگەمەن قازاقستاننىڭ باستى جەتىستىكتەرىنىڭ ءبىرى - حالقىمىزدىڭ ناقتى سانى 18 ميلليوننان اسىپ، تۇرعىنداردىڭ ورتاشا ءومىر ءسۇرۋ ۇزاقتىعى 72,5 جاسقا جەتۋى. وسى ماڭىزدى جەڭىستەرىمىز بەن يگى ناتيجەلەرىمىز ءبىز تاڭداعان باعىتتىڭ دۇرىس بولعانىن راستاپ وتىر»، - دەدى مەملەكەت باسشىسى.
قازاقستان پرەزيدەنتى 2018-جىلى ەلىمىزدىڭ سىرتقى ساياساتتا دا، جاڭعىرۋ باعدارلامالارىن ىسكە اسىرۋ اياسىندا دا قول جەتكىزگەن باستى قورىتىندىلارىنا توقتالدى.
«ءبىزدىڭ جاۋاپتى ءارى سىندارلى سىرتقى ساياساتىمىز الەمدىك ارەناداعى ءوز ورنىمىزدى كۇشەيتۋگە ايتارلىقتاي مۇمكىندىك بەردى. قازاقستاننىڭ جەمىستى بىتىمگەرلىك قىزمەتى استاناداعى سيرياارالىق كەلىسسوزدەردىڭ ناتيجەلى بولۋىنا سەپتىگىن تيگىزدى»، - دەدى ەلباسى.
سونداي-اق، نۇرسۇلتان نازاربايەۆ «استانا» حالىقارالىق قارجى ورتالىعىن، «استانا حاب» ІТ- ستارتاپتاردىڭ حالىقارالىق تەحنوپاركىن جانە جاسىل تەحنولوگيالار مەن ينۆەستيتسيالىق جوبالاردىڭ حالىقارالىق ورتالىعىن ىسكە قوسۋ جونىندەگى جۇمىستاردىڭ ناتيجەلەرىنە نازار اۋداردى.
«بارلىق جەتىستىگىمىزدىڭ نەگىزى قوعامىزداعى بىرلىك پەن كەلىسىم ەكەنىن ءبىز ءاردايىم ءبىلۋىمىز كەرەك. ەتنوسارالىق جانە كونفەسسياارالىق دامۋدىڭ قازاقستاندىق مودەلى بۇگىندە حالىقارالىق برەندكە اينالدى»، - دەدى مەملەكەت باسشىسى.
قازاقستان پرەزيدەنتى ەلىمىزدەگى سوڭعى باستامالاردىڭ بارلىعى تۇرعىندارىمىزدىڭ تۇرمىس ساپاسىن ارتتىرۋعا، قوعامدىق قاۋىپسىزدىكتى جوعارى دەڭگەيدە قامتاماسىز ەتۋگە جانە جوسپارلى تۇردە ءال-اۋقاتتى وسىرۋگە باعىتتالعانىن اتاپ ءوتتى.
«الەۋمەتتىك سالانى كەشەندى جاڭعىرتۋ - ءبىزدىڭ ماڭىزدى باعىتىمىز. تاۋەلسىزدىك جىلدارى ميلليونعا جۋىق ازاماتىمىز باسپانالى بولدى. ءبىز جۋىرداعى 5 جىل ىشىندە 70 ميلليون شارشى مەتردەن استام تۇرعىن ءۇي سالامىز. بۇل شامامەن تاعى ەكى ميلليونعا جۋىق قازاقستاندىق باسپانالى بولادى دەگەن ءسوز»، - دەدى ەلباسى.
سوڭىندا نۇرسۇلتان نازاربايەۆ تاۋەلسىزدىكتىڭ قازىرگى بۋىنى ۋاقىت تالابىنا لايىقتى جاۋاپ بەرىپ، قازاقستانداعى ءاربىر وتباسىنىڭ اماندىعى مەن بەرەكەسىن قامتاماسىز ەتە الاتىنىنا سەنىم ءبىلدىردى.