مىرزاعالي ايتجانوۆ بوكستان ق ر قۇراماسىنىڭ باس باپكەرى قىزمەتىنەن كەتتى

استانا. قازاقپارات - بوكستان قازاقستان ۇلتتىق قۇراماسىنىڭ باس باپكەرى بولىپ عالىمبەك كەنجەبايەۆ تاعايىندالدى.

ول بۇل قىزمەتتە كوماندانى 2009-جىلدان بەرى جاتتىقتىرعان مىرزاعالي ايتجانوۆتى الماستىردى، دەپ حابارلايدى قازاقپارات Olympic.kz سايتىنا سىلتەمە جاساپ.

ءمالىم ەتىلگەندەي، قازاقستان بوكس فەدەراتسياسى ۇسىنعان عالىمبەك كەنجەبايەۆتىڭ كانديداتۋراسىن ق ر مادەنيەت جانە سپورت مينيسترلىگى قۇپتاعان.

مىرزاعالي ايتجانوۆتىڭ باسشىلىعىمەن قازاقستان بوكسشىلارى الەم ۇزدىكتەرىنىڭ قاتارىنا ەنىپ، ازيادا ۇزدىك ۇشتىكتەن كورىندى. لوندوندا سەرىك ساپيەۆ، ريودا دانيار ەلەۋسىنوۆ وليمپيادا چەمپيونى اتاندى. ايتجانوۆتىڭ باسشىلىعىمەن قازاق بوكسشىلارى الەم چەمپيوناتتارىنان 5 مارتە التىن مەدال جەڭىپ الدى (2013-جىلى - 4، 2017-جىلى - 1).

مىرزاعالي ايتجانوۆ الەم ۇزدىكتەرىمەن يىق تىرەستىرەتىن مىقتى قۇرام جاساقتاپ شىقتى.

قازاقستان بوكس فەدەراتسياسى وعان ۇزاق جىلعى ەڭبەگى ءۇشىن العىس ءبىلدىردى.

«بۇگىندە ءبىزدىڭ كوماندا ءبىر ورىندا تۇرىپ قالدى. بىرنەشە جىلدان بەرى دايىندىق بارىسىندا وزگەرىس جوق. سوندىقتان، ءبىز باپكەردى اۋىستىرىپ، ۇنەمى جاڭاشىلدىق ىزدەيتىن، بوكسشىلارى كەرەمەت ناتيجە كورسەتەتىن جاستار قۇراماسىنىڭ باس باپكەرى عالىمبەك كەنجەبايەۆتى ۇسىندىق»، - دەيدى ق ب ف باپكەرلەر شتابىمەن جۇمىس ءبولىمىنىڭ باسشىسى يۋري تسحاي.

عالىمبەك كەنجەبايەۆ 35 جىلدان بەرى باپكەرلىك قىزمەتتە كەلەدى. 1998-2005-جىلدار ارالىعىندا گەننادي گولوۆكيننىڭ جەكە باپكەرى بولدى. 2006-2009-جىلدار ارالىعىندا جانە 2013-جىلدان بۇگىنگە دەيىن جاستار قۇراماسىنىڭ باس باپكەرى. كەنجەبايەۆتىڭ باسشىلىعىمەن قازاقستان جاستار قۇراماسى جاسوسپىرىمدەر وليمپياداسىنان 2 التىن يەلەنىپ، 5 ازيا چەمپيوناتىندا جالپى كوماندالىق ەسەپتە 1-ورىن يەلەندى.