شىعىس قازاقستاندا «التاي - تۇركى الەمىنىڭ بەسىگى» حالىقارالىق جوباسى ىسكە اسىرىلا باستادى
بۇل تۋرالى جوعارى وقۋ ورنىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات.
جوبانىڭ ماقساتى - كوشپەندىلەردىڭ تەحنولوگيالىق دامۋىنا جانە تۇركى الەمىنىڭ قالىپتاسۋىنا نەگىز بولعان ەۋرازيا وركەنيەتىنىڭ ورتالىعى رەتىندە التاي تۋرالى ءبىلىمدى قالىپتاستىرۋعا باعىتتالعان تاريحي سانانى جاڭعىرتۋ.
د. سەرىكبايەۆ اتىنداعى ش ق م ت ۋ رەكتورى جاسۇلان شايماردانوۆتىڭ ايتۋىنشا، جوبا 3 جىلعا ەسەپتەلگەن جانە ۋنيۆەرسيتەتتىڭ باستى مىندەتى - عىلىمي- تاجىريبەلىك قولداۋ كورسەتۋ، عىلىمي تۇرعىدان اقپاراتتاردى وڭدەۋ، ارحەولوگيالىق قازبالاردى تالداۋ، سونداي-اق ستۋدەنتتەرگە ادىستەمەلىك ماتەريالدار دايىنداۋ.
رەكتوردىڭ ايتۋىنشا، «التاي - تۇركى الەمىنىڭ بەسىگى» جوباسى اياسىندا شىعىس قازاقستان وبلىسىنىڭ كورىكتى جانە تاريحي ورىندارىن زەرتتەۋ بويىنشا حالىقارالىق ەكسپەديتسيالار ۇيىمداستىرىلادى، سونداي-اق التاي ءوڭىرىنىڭ (قازاقستان، رەسەي، موڭعوليا، قىتاي) ستۋدەنتتەرىنە XVII حالىقارالىق جازعى مەكتەپ وتكىزىلەدى.
«مۇراجايداعى جادىگەرلەردى سيفرلاندىرۋ جوباسىن ىسكە اسىرۋ كەزىندە ءبىز وبلىستىڭ تۋريستىك ورتالىقتارىنداعى مۇراجاي ەكسپوزيتسيالارىن ساقتاۋ جانە ونى كوبەيتۋ ماقساتىندا تابىلعان ارتەفاكتتاردى سيفرلاۋدى جوسپارلاپ وتىرمىز. ۋنيۆەرسيتەت قازبا جۇمىستارىنا تەحنيكالىق قولداۋ كورسەتەدى»، - دەدى رەكتور.
بۇدان بولەك، مەكتەپ وقۋشىلارى ءۇشىن تۇراقتى تۇردە ەكسكۋرسيالار وتكىزىلمەك.
اتالمىش جوبا «التاي - تۇركى الەمىنىڭ بەسىگى» حالىقارالىق عىلىمي-تاجىريبەلىك كونفەرەنتسيادان باستاۋ الدى. ونىڭ اياسىندا شەبەرلىك ساباقتار، «ۇلكەن التاي» ش ق م ت ۋ مۋزەيىنىڭ پرەزەنتاتسياسى وتكىزىلدى.