اقتوبەدە ءابىش كەكىلبايەۆ اتىنداعى مەكتەپتىڭ اشىلۋىنا جازۋشىنىڭ جۇبايى مەن بالاسى قاتىستى

اقتوبە. قازاقپارات - اقتوبەدە ءابىش كەكىلبايەۆ اتىنداعى مەكتەپ-ليتسەي اشىلىپ، جازۋشىعا ەسكەرتكىش تاقتا ورناتىلدى، دەپ حابارلايدى قازاقپارات ءتىلشىسى.

تاۋەلسىزدىك كۇنىنە وراي اقتوبەدە مەكتەپ اشىلىپ، ءبىلىم ورداسىنا قوعام قايراتكەرى، جازۋشى ءابىش كەكىلبايەۆتىڭ ەسىمى بەرىلدى. بۇل باتىس وڭىرىندەگى زاماناۋي اقپاراتتىق تەحنولوگيالاردى تەرەڭ وقىتاتىن العاشقى مەكتەپ-ليتسەي بولماق. مەكتەپتىڭ اشىلۋىنا اقتوبە وبلىسىنىڭ اكىمى بەردىبەك ساپاربايەۆ، ءابىش كەكىلبايەۆتىڭ جۇبايى مەن ۇلى - كلارا جۇمابايەۆا مەن داۋلەت كەكىلبايەۆ قاتىستى.

«ءابىش كەكىلبايەۆ قازاقستاننىڭ زاماناۋي مادەنيەتىندە ەرەكشە ورىن الادى. ونىڭ ۇلى شىعارمالارى الەمنىڭ ونداعان تىلىنە اۋدارىلدى. ول جازۋشى عانا ەمەس، مەملەكەتتىڭ قالىپتاسۋى مەن نىعايۋىنا، حالىقتىڭ بىرلىگىن دامىتۋ ءۇشىن كوپ نارسە جاساعان دارىندى ساياسي قايراتكەر. ماعان ونىمەن تانىس بولۋ جانە كوپ جىلدار بويى بىرگە جۇمىس ىستەۋ باقىتى بۇيىردى. ول - جۇرەگى كەڭ جان. ونىڭ مۇراسىن وسكەلەڭ ۇرپاققا تابىس ەتۋ - پارىزىمىز. بالالار وسىنداي ۇلى ادامداردى ۇلگى تۇتىپ، ءومىر ءسۇرۋدى ۇيرەنۋلەرى كەرەك. سوندىقتان دا جاڭا مەكتەپ ءابىش كەكىلبايەۆتىڭ قۇرمەتىنە ونىڭ ەسىمىمەن اتالدى»، - دەدى وبلىس اكىمى ب. ساپاربايەۆ.

اقتوبە قالاسىنداعى اۋە قالاشى اۋدانىندا ورنالاسقان مەكتەپ 900 وقۋشىعا ارنالعان. بىرەگەي مەكتەپ قۇرىلىسىنا 1,6 ميلليارد تەڭگە جۇمسالدى. مۇندا 40 وقۋ كابينەتى، ينفورماتيكا، فيزيكا، حيميا جانە بيولوگيا، اعىلشىن ءتىلى پاندەرىنە ارنالعان ارنايى سىنىپ بار. 1-7- سىنىپ وقۋشىلارى اقپاراتتىق تەحنولوگيا نەگىزدەرىن ۇيرەنەدى، 7- سىنىپتان باستاپ ارنايى باعدارلامالاۋ ءتىلىنىڭ كۋرستارى وقۋ جوسپارىنا ەنگىزىلەدى.

سونداي-اق، روبوت تەحنيكاسى مەن 3D- پرينتينگتى تەرەڭ وقىتۋ قارالدى. اشىلۋ ءراسىمى كەزىندە ءابىش كەكىلبايەۆتىڭ قۇرمەتىنە مەموريالدى تاقتا قويىلدى.

«ەسكە العانى ءۇشىن اقتوبەلىكتەرگە العىس ايتامىن. ءابىش 77 جاسىندا ومىردەن ءوتتى، ءبىراق ارتىندا ۇلكەن ءىز قالدىردى. ونىڭ باستى تىلەگى - ءوز ەلىنىڭ باي، بەيبىت ءارى گۇلدەنگەنىن كورۋ ەدى. بۇگىندە ءبىز سونداي ۋاقىتتا ءومىر ءسۇرىپ جاتىرمىز. بالالار، وسى سىيدى باعالاي بىلىڭىزدەر. ۇلكەندەردىڭ سىزدەر ءۇشىن جاساعان ىستەرىن باعالاي بىلىڭىزدەر، وسىنداي يگى ىستەردى جالعاستىرىپ، ارتتىرۋعا ۇمتىلىڭىزدار»، - دەدى ءابىش كەكىلبايەۆتىڭ جۇبايى كلارا جۇمابايەۆا.