قوستانايدىڭ ەڭ ادەمى قىزى تاڭدالدى

 استانا. قازاقپارات - قوستانايدا ەڭ ادەمى قىز تاڭدالدى. ول قوستاناي قۇرىلىس كوللەدجىنىڭ ستۋدەنتى.

وڭىرلىك «قوستاناي ارۋى - 2018» بايقاۋىنىڭ فينالىندا وبلىستىڭ 20 قىزى قاتىستى. ولاردىڭ اراسىندا كاسىبي مودەلدەر دە بار جانە وسى فورماتتاعى بايقاۋعا ءبىرىنىشى رەت قاتىسىپ وتىرعان قىزدار دا بولدى.



«باسىندا قاتىسۋشىلار سانى تىم كوپ بولدى، تەڭ جارتىسىن تاتۋ، بويى جانە جاس مولشەرىنە بايلانىستى الىپ تاستادىق. شامامەن 60 ى قالدى. بۇل بايقاۋعا كەز كەلگەن ارۋ قاتىسۋىنا مۇمكىندىك جاسالدى. ەڭ باستى تالاپ - جاسى 17-دەن اسقان جانە بويى 169 سانتيمەتردەن جوعارى بولۋى كەرەك. قازىلار القاسى قىزداردىڭ مەملەكەتتىك ءتىلدى قالاي مەڭگەرگەنى، قانداي ونەرى بارىن قارادى. سوڭىندا ۇزدىك 20 قىزدى تاڭداپ الدى»، - دەدى بايقاۋدىڭ پروديۋسەرى كارينا تەكليۋك.

فيناليستەر ءتورت كونكۋرستان ءوتتى. ۇلتتىق ستيلدە «ۆيزيتكا»، ۇلتتىق كيىمدە شىعۋ، ينتەلەكتۋالدىق بايقاۋ جانە كەشكى ءسان كويلەگىمەن شىعۋ. بايقاۋ قورىتىندىسى بويىنشا قۇرىلىس كوللەدجىندە وقيتىن اناستاسيا بابيچ باس جۇلدەنى يەلەندى. «شىنىمدى ايتسام جەڭەمىن دەپ ويلامادىم. بۇل مەن ءۇشىن ءوزىمدى باسقا قىرىمنان كورۋگە جاقسى مۇمكىندىك بولدى. ءبىلىم الۋدان بولەك، ءبىر جارىم جىلدان بەرى كاسىبي ءسان كاسىبىندە جۇمىس ىستەيمىن. مەنى انام قولدايدى»، - دەدى قىز بالا.

 

ول ەندى «قازاقستان ارۋى» بايقاۋىنا قاتىسۋعا مۇمكىندىك الدى. سونىمەن قاتار، شارانىڭ دەمەۋشىلەرى وعان ىشىك سىيلادى. ەكىنشى ورىن العان قىز سپورتكلۋبقا ابونەمەنت، ال ءۇشىنشى ورىنعا تۇرمىستىق تەحنيكا بەرىلدى.

Kaz.tengrinews.kz