پيتسا نەگە تاۋەلدىلىككە الىپ كەلەدى؟

 استانا. قازاقپارات - قىتىرلاق ءارى جىلى ءبالىش، قىزاناق تۇزدىعى مەن ەرىگەن ىرىمشىك -  ءدام سەزگىش رەتسەپتورلاردىڭ ناعىز جۇماعى. ادامداردا تاۋەلدىلىكتى جىلدام وياتاتىن تاعامداردىڭ قاتارىن ءوزىمىزدىڭ سۇيىكتى پيتسامىز باستايدى. ونىڭ سىرى نەدە؟

قۇرام ەرەكشەلىگى: «ەڭ ءدامدى دايىندالعانىن عانا ەمەس، كەز كەلگەن پيتسا ءتۇرىن ادام ەش قيىندىقسىز جەي الادى. ويتكەنى، پيتسا باسقا تاعام تۇرىنە قاراعاندا دامدىرەك. ونىڭ سەبەبى، ماي، قانت پەن تۇز سەكىلدى ونىمدەرگە باي قۇرام ەرەكشەلىگى. ولار بادامشا بەزىنەن (ميندالينا) ارنايى گورمونداردىڭ ءبولىنۋىن قامتاماسىز ەتىپ، ميعا باقىت سەزىمىن سىيلايدى» ، - CNN باسىلىمىنا بەرگەن سۇقباتىندا ادامداردىڭ تۇتىنۋ ەرەكشەلىكتەرىن زەرتتەيتىن Sensory Spectrum كومپانياسىنىڭ پرەزيدەنتى گەيل ۆەنس سيۆيل (Gail Vance Civille) وسىلاي دەگەن بولاتىن.

پيتسا قۇرامىنىڭ ءوزارا قاتىناسى ءبىز ويلاعاننان دا قيىنىراق. اشىتقى نانىنىڭ فەرمەنتى ىرىمشىكپەن قىشقىل ءارى اشى ءدام بەرەتىن ەرەكشە ۇيلەسىمى، قىزاناق تۇزدىعىنىڭ پيتساعا بەرەتىن تاتتىلىگى -  بارلىعى ادامنىڭ ءدام سەزەتىن رەتسەپتورلارىنا اسەر ەتپەي قويمايدى. تەك ءدامى ەمەس، ونىڭ ءپىسۋى دە ەرەكشە بولۋى كەرەك. نانى قىتىرلاق، ىرىمشىك سوزىلعىش، ال تۇزدىعى پيتسانىڭ قۇرعاق بولۋىنان ساقتاۋى ءتيىس. ودان بولەك، تاعامنىڭ ءتۇسى. مامانداردىڭ ايتۋىنشا، رەتسەپتورلار ءۇشىن ەڭ تارتىمدى ءتۇس -  قىزىل. سوندىقتان، پيتسا ءونىمىن دايىنداۋدا قىزاناق تۇزدىعىن ءجيى قولدانادى.

كومىرسۋ+مايلار: «تاۋەلدىلىككە الىپ كەلەتىن تاعامدار» تاقىرىبىنا زەرتتەۋ جۇرگىزۋ بارىسىندا يەل ۋنيۆەرسيتەتىنىڭ (Yale University) ماماندارى، ماي، كومىرسۋ مەن تۇز ونىمدەرىنىڭ قوسىندىلارى ارقىلى تاعام ءوندىرۋ ادامداردىڭ سەزىم رەتسەپتورلارىنا قاتتى اسەر ەتە وتىرىپ، ولاردىڭ بويىنداعى گورمون ءبولىنۋ ءۇردىسىن جىلدامتاتىنىن ايتتى. مىسالى، سوڭعى زەرتتەۋ بويىنشا قۇرامىندا تەك كومىرسۋ نە تەك ماي بار تاعامنان گورى، قۇرامىندا ەكى ءونىمنىڭ كوپ مولشەردە كەزدەسۋى ادامعا ەرەكشە راحاتتانۋ سەزىمىن سىيلايتىنىن كورسەتتى. ونى عالىمدار ءومىر ءسۇرۋ مەحانيزمىمەن بايلانىستىرادى. گەيل ۆەنس سيۆيل: «ەگەر ءبىز اشتىققا تاپ بولساق، وندا پيتسا ءبىزدى تولىق تويدىراتىن تاعامداردىڭ ءبىرى بولار ەدى»، -  دەگەن تۇجىرىم ايتقان بولاتىن.

 كوڭىل كۇي: تەك قارنىمىزدى تويدىراتىندىعى ءۇشىن عانا ەمەس، بىزگە باقىت سىيلايتىندىعى ءۇشىن جاقسى كورەمىز. ودان بولەك، پيتسانى جالعىزدىقتا جەيتىن تاعامنان گورى، دوستارمەن كەزدەسۋدە، وتباسىلىق باس قوسۋلاردا داستارحانعا قوياتىنىمىز انىق. پسيحولوگ ماماندار پيتسانىڭ تاۋەلىدىلىككە الىپ كەلۋىنە دە وسى ءبىر كوڭىل كۇي سىيلايتىن ەرەكشەلىگى سەبەپ بولۋى مۇمكىندىگىن العا تارتادى.

Massaget.kz