قانات يسلامعا دۇنيەجۇزى قازاقتار قاۋىمداستىعىنىڭ مۇشەلىك بيلەتى تابىستالدى
كەزدەسۋ بارىسىندا نۇرتاي ابىقايەۆ 16 - جەلتوقساندا استانا قالاسىندا قانات يسلام قۇرعان پروموۋتەرلىك كومپانيا ۇيىمداستىرىپ جاتقان كاسىپقوي بوكس كەشىنىڭ ءساتتى وتۋىنە تىلەك ءبىلدىردى. تۋرنيردىڭ باستى كەزدەسۋى - سپورتسۇيەر قاۋىمعا «قازاق باتىرى» دەگەن لاقاپ اتپەن بەلگىلى قىتايلىق قانداسىمىز ەلشات نىعىمەتوللا ۇلىنىڭ WBC ASIA چەمپيوندىق تيتۋلى ءۇشىن جەكپە- جەگى ەكەن. قانات يسلامنىڭ ايتۋىنشا، بۇل ەلشاتتىڭ تاريحي وتانىندا العاش رەت جۇدىرىقتاسۋى بولماق. نۇرتاي ابىقايەۆ قانات يسلامعا ەلباسى تاپسىرماسىمەن شەتەلدىك جانە ەلگە ورالعان قانداستاردى قولداۋعا باعىتتالعان «وتانداستار» قورىنىڭ ماقسات- مىندەتتەرىن تانىستىرىپ، الداعى جىلعا جوسپارلارىمەن ءبولىستى. قوردىڭ باسشىسى ايگىلى سپورتشىنى ورتاق مۇددە تۇرعىسىندا ەڭبەك پەن كۇشتى بىرىكتىرۋگە شاقىردى.
«وتانداستار» قورىنىڭ قازىرگى ماقساتى - جاستارمەن تىعىز جۇمىس ىستەۋ. 2019 -جىلدى ەلباسىمىز جاستار جىلى دەپ جاريالادى. ءوز كەزەگىندە، بارشا قازاق جاستارى ءوزىڭدى اعا دەپ بىلەدى، ەرەك سىيلايدى. ولارعا ەل مۇددەسىن جوعارى قويعان ۇستانىمىڭمەن، ومىرلىك تىرشىلىگىڭمەن، سپورتتىق جولىڭمەن، ادامگەرشىلىك قۇندىلىقتاردى ناسيحاتتاۋىڭمەن، سالاۋاتتى كوزقاراسىڭمەن ۇلگىسىڭ. قازاقتىڭ كوك تۋىن بيىككە اۋەلەتىپ جۇرگەن ازاماتسىڭ. ەلباسى ايتقان ۇلتتىڭ بىرىگۋى تۇرعىسىندا دا الەمنىڭ تۇكپىر- تۇكپىرىندە تارىداي شاشىلعان قانداستارىمىزدى ءبىر شاڭىراقتىڭ استىندا ۇيىستىرىپ جاتقان ەڭبەگىڭ وراسان. ءبىزدىڭ «وتانداستار» قورىنىڭ وزىڭدەي ازاماتتارمەن مۇددەلەرىمىز ورتاق. سوندىقتان وسى باعىتتا كۇشىمىزدى بىرىكتىرسەك، بىرگە ەڭبەك ەتسەك، الىنبايتىن توبە، باعىنبايتىن قامال جوق دەپ بىلەمىن» ، دەدى «وتانداستار» قورىنىڭ پرەزيدەنتى نۇرتاي ابىقايەۆ.
دۇنيەجۇزى قازاقتارى قاۋىمداستىعى ءتوراعاسىنىڭ ءبىرىنشى ورىنباسارى زاۋىتبەك تۇرىسبەكوۆ بەلگىلى بوكسشى، الەم چەمپيونى قانات يسلامعا قاۋىمداستىقتىڭ مۇشەلىك بيلەتىن تابىستادى. «وتانداستار» دەيتۇعىن قور تەك قازاقتار ەمەس، كوڭىلى قازاقستانعا بۇرىپ تۇراتىن دۇنيە جۇزىندەگى بارشا ازاماتتاردىڭ قورى دەۋگە نەگىز بار. ەندى عانا ءتاي- ءتاي باسىپ جاتقان ۇيىم. ماقساتىمىز ورتاق بولعاندىقتان، ءوزىڭ دە ۇلەس قوسادى دەپ سەنەمىز. سەبەبى جاستاردىڭ اراسىندا سەندىك ابىروي وتە بيىك. بوكسشىلار الەمدە از ەمەس، ءبىراق جاستار اراسىنداعى بىرەگەيى كىم دەگەندە، ءبىرىنشى بولىپ ءوزىڭنىڭ اتىڭ اتالادى. قانات باۋىرىممەن بۇل كەزدەسۋدى - تاريحي كەزدەسۋ دەپ بىلەم» ، دەدى زاۋىتبەك تۇرىسبەكوۆ.
قانات يسلام ورىن العان كەزدەسۋ مەن د ق ق مۇشەسى اتاعى ءۇشىن العىسىن ءبىلدىرىپ، ءوز كەزەگىندە تاۋەلسىزدىك كۇنىنە وراي استانادا وتەتىن بوكس كەشى تۋرالى ايتىپ بەردى. ءتۋرنيردىڭ ۇيىمداستىرۋشىسى - قانات يسلام قۇرعان «Qazaq promotions» پروموۋتەرلىك كومپانياسى. بوكسشىنىڭ ايتۋىنشا، رەيتينگىلىك ۇپايلار ءۇشىن الىس- جاقىن شەتەلدەردەن كەلگەن قارسىلاستارمەن ايدار شارىبايەۆ، اسحات ۋاليحانوۆ، ابىلايحان قۇسايىنوۆ، رۋسلان مىرساتايەۆ سىندى قازاقستاندىقتار جۇدىرىقتاساتىن بولادى.
«QAZAQ PROMOTIONS» كومپانياسى امەريكانىڭ ءىرى پروموۋتەرلىك كومپانيالارىمەن بىرلەسىپ، اۋقىمدى بوكس كەشتەرىن ۇيىمداستىرۋمەن اينالىسادى. شەتەلدە بيىلعى كوكتەمدە عانا اشىلعانىمەن، قازاقستاندا كومپانيا ەكى جىلدان بەرى جۇمىس ىستەپ كەلەدى. «وسىنداي اۋقىمدى بوكس كەشتەرىنىڭ ارقاسىندا قانشاما قازاق بوكسشىلارى ەل الدىنا شىعىپ، ونەرىن كورسەتە الادى. ىنىلەرىمنىڭ دە جۇدىرىقتاسىپ، تانىلىپ، تالاي بەلەستى باعىندىرۋىن قالايمىن. پروموۋتەرلىك كومپانيامنىڭ نەگىزگى ماقساتى دا وسى. مۇمكىندىك باردا، جاستاردى قولداۋ كەرەك دەپ ەسەپتەيمىن» ، دەدى قانات يسلام.
https://egemen.kz