دەنيس تەننىڭ ولىمىنە قاتىستى ءىس سوتقا ءتۇستى

None
None
 الماتى. قازاقپارات - دەنيس تەننىڭ ولىمىنە قاتىستى ءىس سوتقا جىبەرىلدى. قىلمىستىق ءىس الماتى قالالىق قىلمىستىق ىستەر بويىنشا مامانداندىرىلعان اۋدانارالىق سوتىندا قارالاتىن بولدى، دەپ حابارلايدى قازاقپارات ءتىلشىسى قالالىق سوتتىڭ باسپا ءسوز قىزمەتىنە سىلتەمە جاساپ.

«مامانداندىرىلعان قىلمىستىق سوتقا ق ر ق ك 434-بابى، ق ر ق ك 24-بابىنىڭ 3- ءبولىمى، 188-بابىنىڭ 2- ءبولىمىنىڭ 1- تارماعى بويىنشا ايىپتالعان ج. تولىبايەۆا، ال ق ر ق ك 188-بابىنىڭ 2- ءبولىمىنىڭ 1 - تارماعى، ق ر ق ك 99-بابىنىڭ 2-بولىمىمەن، 192-بابىنىڭ 2-بولىمىمەن قىلمىستىق جاۋاپكەرشىلىككە تارتىلىپ وتىرعان ا. قۇدايبەرگەنوۆ، ق ر ق ك 99-بابىنىڭ 2-بولىمىمەن، 192-بابىنىڭ 2-بولىمىمەن قىلمىستىق جاۋاپكەرشىلىككە تارتىلىپ وتىرعان نۇرالى قياسوۆقا قاتىستى ءىس 13 - جەلتوقساندا ءتۇستى. قىلمىستىق ءىس 38 تومنان تۇرادى. ءىس بويىنشا 3 سوتتالۋشى سوت الدىندا جاۋاپ بەرەدى» ، - دەدى باسپا ءسوز قىزمەتىنەن.

ەسكە سالساق، قازاقستاندىق مانەرلەپ سىرعاناۋشى دەنيس تەن 19 - شىلدە كۇنى پىشاق جاراقاتىنان كوز جۇمعان ەدى. وقيعا قۇرمانعازى مەن بايسەيىتوۆا كوشەلەرىنىڭ قيىلىسىندا 19 - شىلدەدە تۇسكى ساعات 15:00 دەر شاماسىندا بولعان. سپورتشى كولىگىنىڭ ايناسىن ۇرلاماق بولعان ەكى ادامنىڭ ۇستىنەن تۇسكەن. ارادا باستالعان جانجالدىڭ سالدارىنان ۇرىلار دەنيس تەنگە پىشاق سۇعىپ العان. ول وڭ جاق سانىنىڭ جوعارعى تۇسىنان جاراقات الدى. 25 جاستاعى تەن ءۇش ليتر قان جوعالتىپ، اۋرۋحاناعا وتە اۋىر جاعدايدا جەتكىزىلدى.

ءبىراق الماتى قالالىق دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ قوسىمشا قان قاجەت ەمەستىگىن جانە رەسۋرستار جەتكىلىكتى ەكەندىگىن ءمالىم ەتكەن بولاتىن. 2,5 ساعاتقا جالعاسقان رەانيماتسيالىق شارالارعا قاراماستان، اۋرۋحانا دارىگەرلەرى ونىڭ ومىرىنە اراشا تۇسە المادى. ساعات 17.30 دا وليمپيادا جۇلدەگەرى قايتىس بولدى.

 ادام ءولتىرۋ بابىمەن قىلمىستىق ءىس قوزعالدى. كەيىن بەلگىلى بولعانداي، سپورتشىنىڭ ولىمىنە قاتىسى بار كۇدىكتىلەر ۇستالىپ، قىلمىستارىن مويىندادى.

سوڭعى جاڭالىقتار