تۇركىستان وبلىسىندا الەۋمەتتىك نىساندار اشىلىپ، باسپانالار بەرىلدى
ايماق باسشىسى جانسەيىت تۇيمەبايەۆ الدىمەن، ورداباسى اۋدانىنا ات باسىن بۇرىپ، شۇبارسۋ اۋىلىنداعى «Medical center Shubarsu» مەديتسينا ورتالىعىنىڭ سالتاناتتى اشىلۋ راسىمىنە قاتىستى. قۇرىلىسى 2016 -جىلى باستالعان نىساندا جالپى سانى 115 ستانتسيونارلىق توسەك ورىن بار. مەديتسينا ورتالىعىندا تەراپيا، پەدياتريا، حيرۋرگيا جانە جاراقات ءبولىمى، فيزوتەراپيا جانە وڭالتۋ ءبولىمى، كۇندىزگى ءبولىم، ستاتسيونار، زەرتحانا جانە دياگنوستيكا ءبولىمى، جەدەل جاردەم ستانساسى قىزمەت كورسەتەدى. ا ق ش، وڭتۇستىك كورەيا، ماجارستان، جاپونيا، گەرمانيا جانە وزگە دە ءبىرقاتار شەتەلدىك جانە وتاندىق زاماناۋي مەديتسينالىق قۇرالدارمەن جابدىقتالعان نىساندا 145 ادام جۇمىسپەن قامتىلعان.
مۇنان سوڭ، وبلىس باسشىلىعى باستاعان توپ اۋدان ورتالىعى - تەمىرلانداعى «جاستار سارايىنىڭ» اشىلۋىنا قاتىستى. بۇگىندە 20 شاقتى جاس ماماندى جۇمىسپەن قامتىعان عيماراتتا بولاشاقتا اۋدان جاستارى ءتۇرلى ۇيىرمەلەرگە قاتىسىپ، بوس ۋاقىتىن ءتيىمدى پايدالاناتىن بولادى.
«تاۋەلسىزدىكتىڭ تورقالى تويىندا ورداباسىدا حالىققا وتە قاجەتتى ەكى نىسان ەل يگىلىگىنە بەرىلىپ وتىر. ونىڭ ءبىرى - جاڭا ءوزىمىز كۋا بولعان مەديتسينالىق ورتالىق بولسا، ەكىنشىسى جاستار ءۇشىن بوي كوتەرىپ، جۇمىسىن باستاعان وسىناۋ ەڭسەلى عيمارات. بارشاڭىزعا بەلگىلى، كەلەر 2019 -جىلدى ەلباسىمىز «جاستار جىلى» دەپ جاريالادى. ياعني، كەلەشەگى كەمەل جاستارىمىزعا مەملەكەت تاراپىنان بارلىق جاعدايدى جاساۋ جولىندا بۇگىنگى ورتالىقتىڭ تيگىزەر پايداسى مول دەپ بىلەمىن» ، - دەدى جانسەيىت تۇيمەبايەۆ.
وبلىس اكىمى ورداباسىعا ساپارىنان كەيىن كەنتاۋ قالاسىندا جاڭا پاتەرلەرگە يە بولعان جەرگىلىكتى تۇرعىنداردىڭ قۋانىشىمەن ءبولىستى. بۇل كۇنى ونداعى ەسكى يقان اۋىلدىق وكرۋگىندە ەكىقاباتتى 10 پاتەرلى قىزمەتتىك تۇرعىن ءۇي تاپسىرىلدى. سونداي- اق شاعا اۋىلدىق وكرۋگىنە قاراستى ىنتىماق اۋىلىندا دا 10 پاتەرلى ەكى تۇرعىن ءۇيدىڭ كىلتتەرى بەرىلدى. وسىلايشا كەنتاۋدا جالپى سانى 30 پاتەر ءوز يەلەرىنە تابىستالدى. باسپانالى بولعان حالىقپەن كەزدەسۋدە وبلىس اكىمى مەيرام قارساڭىندا مۇنداي باسپانالاردىڭ تاعى 300 دەن استامى تۇرعىندارعا تابىستالعانىن جەتكىزدى.
