بالۋان شولاق كوركەم فيلمى جارىق كوردى
كارتينانىڭ رەجيسسەرى نۇرگەلدى سادىعۇلوۆ بۇل تاريحي كينو بولعاندىقتان كورەرمەندەردىڭ ىقىلاسىن ەسكەرىپ، تاريحتان اۋىتقىماۋعا تىرىسقاندىقتارىن ايتادى.
«كينونى ءتۇسىرۋ بارىسىندا مۋزەيلەردەن، مۇراعاتتاردان تاپقان فوتولارعا سۇيەنىپ، سول كەزدى سۋرەتتەۋگە تىرىستىق. اسىرەسە، جارمەڭكە، كونە قالانىڭ كەلبەتىن سومداۋدا دا سولارعا جۇگىندىك. سونداي- اق كورەرمەندەر جايلى كوپ ويلادىم، ويتكەنى بۇل فەستيۆالدەرگە شىعاتىن نەمەسە كومەرتسيالىق فيلم ەمەس. بالۋان شولاق تاريحي تۇلعا بولعاندىقتان تاريحتان اۋىتقىماۋعا تىرىستىق» ، - دەيدى ول.
فيلمنىڭ سەناري اۆتورى دۋلات يسابەكوۆ كينونىڭ كوڭىلىنەن شىققاندىعىن جەتكىزدى.
«بالۋان شولاق» سپەكتاكىلى كوپتەن بەرى ساحنادا قويىلىپ كەلەدى، تىپتەن لوندونعا دا بارىپ كەلدى. پەسا مەن كينو ەكى الۋان دۇنيە. ءبارىن قايتادان جازىپ شىققانداي بولدىم. مەنىڭ ماقساتىم ۇلتتىق كينو جاساۋ ەدى. كينو جوعارى دەڭگەيدە بولۋى ءۇشىن ءالى دە 10 مينۋتتىق سيۋجەتتەر جەتىسپەي قالدى. ياعني، بالۋان شولاق عاشىق بولعان عاليا ەكەۋىنىڭ اراسىنداعى قاتىناس جانە بالحاش تۋرالى سيۋجەتتەر كينوعان ەنبەي قالعان. ەگەر باسشىلار قولداپ جاتسا سونى تولىقتىرىپ جىبەرسە دەگەن تىلەگىم بار» ، - دەيدى د. يسابەكوۆ.
بالۋان شولاقتىڭ ءرولىن ەركەبۇلان دايىروۆ، بالقاشتى جاس ارتيس البينا شارداروۆا سومداعان، سونداي- اق فيلمگە بولات ءابدىمانوۆ، الەكساندر باگريانتسيەۆ، جانەل ماقاجان، ءساعادىلدا ءۇسىبالى سىندى تانىمال اكتەرلەر تۇسكەن.
فيلم جايىندا قىسقاشا توقتالىپ وتسەك. كينو بالۋان شولاقتىڭ بالالىق شاعىنان باستالادى. دوسىمەن ورماندا اعاش تەرىپ جۇرگەن ول قاسقىردىڭ اپانىنا تاپ بولىپ، قاسقىرمەن ارپالىسادى. ارى قاراي ونىڭ ەسەيگەن شاعى باياندالىپ، سىدىق بولىسقا ايەلدىككە كەتىپ بارا جاتقان قارشاداي بالحاشتى قۇتقارىپ قالۋىمەن جالعاسادى. وسى تۇستا رەسەيلىك پاتشانىڭ قازاقستان جەرىنە ءوز ۇكىمىن جۇرگىزىپ، كەلىمسەكتەردى قازاق اۋىلدارىنا شوعىرلاندىرۋى، وعان قارسى شىققانداردى قاماپ، كۇش كورسەتە باستايدى. اۋىلىنىڭ قيىن قىستاۋعا تاپ بولعانىن كورگەن بالۋان شولاق ورىس وفيتسەرلەرىنە قارسى شىعادى. اقىر سوڭى وفيتسەردىڭ قىزىن ۇرلاپ اكەتىپ، اۋىل حالقىن بوستاۋ جونىندە شارت قويادى.
رەجيسسەردىڭ ايتۋىنشا، ءتۇسىرىلىم جۇمىستارى كوكشەتاۋ، پاۆلودار قالاسىندا، بۋراباي جانە الماتى وبلىسىندا جۇرگىزىلگەن.
«كەرەكۋ قالاسىنىڭ سول كەزدەردەگى كەلبەتىن قولىمىزدان كەلگەنشە قايتا جاساۋعا تىرىستىق. سونداي- اق ەلىمىزدىڭ اسەم تابيعاتىن كورسەتۋگە كۇش سالدىق. كينوداعى ات ۇستىندەگى كوپتەگەن تريۋكتاردى «نوماد» كاسكادەر توبى وينادى. ەشكىم جاراقات الىپ قالماسا ەكەن دەپ الاۋمەن بولدىم، الايدا ءبارى ويداعىداي ءوتتى» ، - دەيدى ول.
بالقاشتىڭ ءرولىن سومداعان البينا شارداروۆ بۇل العاشقى تولىقمەتروجدى فيلمى ەكەندىگىن ايتادى.
«العاشىندا بۇل ۇلكەن ءۇمىت قوي، ونى اقتاي الام با دەگەن قورقىنىش بولدى. دەگەنىمەن ءتۇسىرىلىم الاڭىنا بارعان كەزدە كاسىبي اكتەرلەرمەن اقىلداسىپ، بىلمەگەن تۇستارىمدى تولىقتىرا ءبىلدىم» ، - دەيدى اكتريسا.
اتالعان فيلم قالىڭ كورەرمەنگە 2019 -جىلدىڭ ناۋرىز ايىندا جول تارتپاق.
ادىلەت مۇساحاەۆ
Baq.kz