دەمالىس جانە مەرەكە كۇندەرى قازاقستاندا اۋا رايى قانداي بولادى؟

استانا. قازاقپارات - رەسپۋبليكا اۋماعىمەن ءوتىپ جاتقان تسيكلون وزىمەن بىرگە قار، بۇرقاسىن، ەكپىندى جەل اكەلەدى، دەپ حابارلايدى «قازاقپارات» ح ا ا «قازگيدرومەتكە» سىلتەمە جاساپ.

«تسيكلونعا بايلانىستى ورناعان جانە رەسپۋبليكانىڭ باتىسىندا قار جاۋۋىنا سەبەپ بولعان بۇلتتار شىعىسقا قاراي ىعىسۋدا. بۇلتتاردىڭ قازاقستان اۋماعى بويىنشا جىلجۋىمەن بىرگە قار جاۋىپ، بۇرقاسىن بولادى، ەكپىندى جەل سوعادى، رەسپۋبليكانىڭ باسىم بولىگىندە كوكتايعاق بولىپ، تۇمان تۇسەدى»، - دەلىنگەن حابارلامادا.

بولجانىپ وتىرعان كەزەڭنىڭ سوڭىندا تروپروسفەرالىق اعىنداردىڭ باتىستان سولتۇستىككە اۋىسۋىنا جانە انتيتسيكلوننىڭ جىلجۋىنا بايلانىستى رەسپۋبليكانىڭ كوپتەگەن وبلىستارىندا كۇن سالقىندايدى.