دارىگەر قازاقتىڭ سورپاسى قانشا دەرتكە داۋا ەكەنىن ايتتى

 استانا. قازاقپارات - قازاق حالقى ەت جەپ بولىپ، سورپاسىن ىشپەي، اس قايىرمايتىن بولعان.

قاي زاماندا دا استى جوعارى باعالاعان. قازاق حالقىنىڭ سورپانىڭ ەمدىك قاسيەتتەرى جايلى ءبىلىمى بۇرىننان بولعان.

اسىرەسە، بوسانعان ايەلدىڭ كۇش-قۋاتىن قالپىنا كەلتىرىپ، انا ءسۇتىن مولايتۋعا كومەكتەسەدى دەپ كەلىنگە سويىلعان قويدىڭ سورپاسىن بەرىپ وتىرعان.

دەگەنمەن كوبى سورپانى ديەتالىق تاعام دەپ سانايدى. جالپى سۇيىق تاعامنىڭ ادام اعزاسىنا پايدالى ەكەنىن جانە ونى اعزا ءۇشىن قورىتىلۋى جەڭىل ەكەنى ءجيى ايتىلىپ جاتادى.

ءبىراق ونىڭ ەمدىك قاسيەتتەرى دە مول ەكەنىن ايتا كەتۋ كەرەك.

وسى رەتتە Tengrinews.kz ءتىلشىسى گاستروەنتەرولوگ ايگەرىم ورمانوۆادان سورپانىڭ اعزاعا قانشالىقتى ەمدىك پايداسى بار ەكەنىن جانە ونىڭ قانداي دەرتتەردەن ايىعۋعا كومەكتەسەتىنىن سۇراپ ءبىلدى.

دارىگەردىڭ ايتۋىنشا، سورپانىڭ باستى ەمدىك قاسيەتى ونىڭ اس قورىتۋ جۇيەسىنە جاقسى اسەر ەتۋىندە. «ءبىرىنشى كەزەكتە سيىر، قوي ەتىنەن جاسالعان سورپانىڭ قۇرامىنا توقتالاتىن بولساق، ونىڭ اعزا ءۇشىن پايداسى مول. سيىر ەتىندەگى ەلەمەنتتەر مەن دارۋمەندەر اس قورىتۋ جۇيەسى قىزمەتىن جاقسارتادى. مىسالى، ول تەمىر جەتىسپەۋشىلىگى انەمياسىمەن كۇرەسۋگە كومەكتەسەدى. بۇل دەگەنىمىز سيىر نەمەسە قوي ەتى سورپاسىنىڭ تابەتتىڭ تومەندەۋىنە، السىزدەنىپ، تەز شارشاپ قالۋعا جول بەرمەيتىنىن بىلدىرەدى»، - دەيدى دارىگەر.

سونداي-اق، ول سورپانىڭ جاڭا بوسانعان ايەلدەر مەن وتا جاسالعان ادامدارعا كۇش قۋاتىن قالپىنا كەلتىرۋدە كومەگى زور ەكەنىن ايتادى.

بۇدان بولەك، دارىگەر سيىر نەمەسە قوي ەتىنەن جاسالعان سورپانىڭ كىشكەنتاي بالانىڭ اعزاسىنا اۋىر بولمايتىنىن، كەرىسىنشە، دەنساۋلىعىنا جاقسى اسەر ەتەتىنىن ايتىپ ءوتتى.

«قۇرامى جەڭىل سورپالار تاماقتان ۋلانعان جاعدايلاردا نەمەسە تاماقتى تىم كوپ جەپ قويعان جاعدايلاردا جاقسى كومەكتەسەدى. اسىرەسە، سيىر ەتىنەن جاسالعان سورپانىڭ قۇرامىنداعى مەتيونين امين قىشقىلى اعزاداعى زياندى ونىمدەردىڭ شىعۋىن رەتتەيدى. وسىنداي تازا قولدىڭ سورپاسى 20-40 مينۋتتا قورىتىلىپ كەتەدى. سالىستىرىپ قارار بولساق، جەمىس-جيدەك شىرىنىڭ ءبىر ستاقانى 30 مينۋتتا، ال الما شىرىنى 40 مينۋتتا عانا قورىتىلادى»، - دەيدى ورمانوۆا.

بۇدان بولەك، دارىگەر تاۋىق سورپاسىنىڭ ەمدىك قاسيەتتەرىنە توقتالدى. ونىڭ ايتۋىنشا، ىستىق كۇيدەگى تاۋىق سورپاسى اس قورىتۋ جولىنىڭ، اسقازان مەن اش ىشەكتىڭ جۇمىسىن جاقسارتادى.

«تاۋىق سورپاسىنىڭ گاستريتپەن اۋىراتىندارعا كومەگى زور. ول اسقازانداعى ارتىق قىشقىلدى شىعارادى. سونداي-اق، سۇيەكتەردىڭ ءبىتىپ كەتۋىن تەزدەتەدى. ياعني سورپاداعى ەلەمەنتتەر سۇيەك، شەمىرشەك جانە دانەكەر تىندەرگە جانە كوكباۋىردىڭ قىزمەتىنە جاقسى اسەر ەتەدى»، - دەيدى دارىگەر.