فرانسۋز قىزى دەنەسىنە ديماش قۇدايبەرگەننىڭ سۋرەتى مەن قازاقستاننىڭ تۋىن سالدىرىپ العان

 استانا. قازاقپارات - فرانسيالىق ارۋ دەنەسىنە ديماش قۇدايبەرگەن مەن قازاقستاننىڭ تۋى بەينەلەنگەن تاتۋ سالدىرعان.

35 جاستاعى روزي العاش رەت قازاقستاندىق ءانشىنى يۋنەسكونىڭ شتاب-پاتەرىندەگى گالا- كونسەرتتە كورگەن. بۇل تۋرالى Tengrinews.kz اگەنتتىگى حابارلايدى.

«بۇل 2017-جىلدىڭ 7- قازان كۇنى بولاتىن. مەن ديماشتى تىڭداعان كەزدە «بۇل مۇمكىن ەمەس» دەپ ويلادىم. ول ءان ايتقاندا، مەن ءوزىمدى كوكتە قالىقتاپ جۇرگەندەي سەزىندىم»، - دەيدى كەلىنشەك.

روزي العاشقى تاتۋىن 2018-جىلدىڭ ناۋرىز ايىندا سالدىرعان. ول ءوزىنىڭ جىگىتى قىزعانباس ءۇشىن ديماشتىڭ ەسىمىن كيريلل الىپبيىمەن جازىپ قويعان ەكەن.

«ول نە جازىلعانىن تۇسىنبەيدى»، - دەيدى فرانسۋز بيكەشى.

ارتىنشا مامىر ايىندا روزي قازاقستاندىق ورىنداۋشىمەن كەزدەسۋ ءۇشىن كاننعا بارعان.

سول كەزدە ول دەنەسىنە تاعى دا سۋرەت سالدىرۋدى ويلاعان. وسىلايشا، شىلدە ايىندا فرانسۋز ارۋى سانىنا قازاقستاننىڭ تۋى مەن ورىنداۋشىنىڭ قولتاڭباسى، سونداي-اق، قازاق تىلىندەگى «جانىم سول» ءسوزى جازىلعان تاتۋ سالدىرعانىن ايتادى. ويتكەنى، روزي بۇل ءسوزدىڭ اۋدارماسى قانداي ماعىنا بەرەتىنىن بىلەتىن كورىنەدى.

«مەنىڭ ديماشقا دەگەن سەزىمىمە ءسوز جوق. ول مەنىڭ ءومىرىمدى قاتتى وزگەرتتى. سول سەبەپتى، ونى قاتتى جاقسى كورەمىن. ول مەنىڭ جانىمدى امان الىپ قالعان. ونى كەزدەستىرمەي تۇرىپ، ومىرىمدە العا قويعان ماقساتىم بولماعان ەدى. ال قازىر جانكۇيەرلەردىڭ اراسىندا كوپ دوستار تاپتىم جانە الەم ارالاۋعا دەگەن قىزىعۋشىلىعىم ارتىپ كەتتى. ديماش پەن ونىڭ جانكۇيەرلەرى مەنىڭ ءومىرىمنىڭ ءبىر بولىگىنە اينالدى»، - دەيدى روزي.

فرانسۋز قىزىنىڭ ايتۋىنشا، ديماش باسقا ورىنداۋشىلاردان الدەقايدا ەرەكشەلەنەدى.

«ديماش جان-جاعىنداعى ادامداردى سىيلايدى. ونىڭ داۋسى دا، جۇرەگى دە تازا. ول دوستارىن، وتباسىن، جانكۇيەرلەرىن سىيلايدى. ول ءبىر ءاندى ءبىر قالىپتى ورىنداماي، ءار ۋاقىتتا ءبىزدى تاڭ قالدىرىپ وتىرادى. مەن ونىڭ ءجۇزىن دە، ءانىن دە، جانكۇيەرلەرگە دەگەن ماحابباتىن دا جاقسى كورەمىن»، - دەيدى ول.

روزي جاقىندا ديماشتىڭ لوندوندا وتكەن كونسەرتىنە جول تارتقان. ارۋ ءالى دە ءانشىنىڭ ارتىنان الەم ارالاعىسى كەلەدى. ال جازدا قازاقستانعا دا اياق باسۋدى جوسپارلاپ وتىر ەكەن.

«ديماشتىڭ شىعارماشىلىعىمەن تانىسپاي تۇرىپ مەن قازاقستان تۋرالى ەشتەڭە بىلمەيتىنمىن. ونىڭ اتاۋىن ەستىپ، قايدا ورنالاسقانىنان عانا حاباردار بولدىم. ال قازىر بۇل كەرەمەت ەل جايلى ءبارىن بىلگىم كەلەدى»، - دەدى ديماشتىڭ جانكۇيەرى.