اتا جۇرتىڭدا ونەر كورسەتىپ، ابىرويىن اسقاقتاتقانعا نە جەتسىن - ەلشات نىعمەتوللا ۇلى
21 جاستاعى قازاقستاندىق بوكسشى امەريكالىقتى جەڭىپ، WBC چەمپيونى اتاندى گولوۆكيننىڭ سالماعىنداعى قاماۋعا الىنعان الەم چەمپيونى رينگكە ورالادى
مىنە، وسىنداي ميللياردتاردى مويىنداتقان قانات يسلامدى تۋعان كيەلى مەكەننەن تاعى ءبىر قازاقتىڭ قارادومالاق ۇلى قاناتىن قومداپ، كاسىپقوي بوكستى باعىندىرا باستادى. ول - قىتايدا «قازاق جاۋىنگەرى» دەگەن لاقاپ اتىمەن تانىمال بولعان ەلشات نىعمەتوللا ۇلى.
قانداسىمىز قازاقپارات تىلشىسىنە سۇحبات بەرىپ، استانادا 16 - جەلتوقسان مەرەكەسىنە وراي وتەتىن كاسىپقوي بوكس كەشىنە بايلانىستى دايىندىق جۇمىستارىمەن ءبولىستى.
- ەلشات استاناعا حوش كەلدىڭىز ! بۇل ەلورداعا العاش كەلۋىڭىز بە؟
- ءيا، ءبىرىنشى رەت! سوندىقتان بولار وتە ءبىر ەرەكشە اسەردە ءجۇرمىن. قازاق ەلىنىڭ استاناسىندا، ياعني الاشتىڭ اقورداسىندا تاۋەلسىزدىك مەرەكەسىنە وراي العاش ايقاسىم وتكەلى وتىر. بۇل مەن ءۇشىن ۇلكەن باقىت، ۇلكەن ابىروي. سول ءۇشىن الداعى 16 - جەلتوقسان كۇنگى وتەتىن جەكپە- جەگىمە استانا تۇرعىندارى مەن قوناقتارىنا ەستەن كەتپەيتىن بوكس كەشىن سىيلاعىم كەلىپ وتىر. اتا- جۇرتتاعى العاشقى ايقاسىما بارشا قازاقستاندىقتاردى شاقىرامىن.
- قالىڭ كوپشىلىك «قازاق جاۋىنگەرى» نەندەي ەرلىك جاسار ەكەن دەپ جەكپە- جەگىڭىزدى تاعاتسىزدانا كۇتىپ وتىرعانى راس. دەسەك تە سپورتسۇيەر قاۋىم ءسىز تۋرالى كوپ بىلە بەرمەيدى.
- ەسىمىم - ەلشات. اكەم اتى - نىعمەتوللا. قىتايداعى التاي ايماعى، قابا اۋدانىندا 1994 -جىلى دۇنيەگە كەلدىم. بەيجىڭ وليمپياداسىنىڭ قولا جۇلدەگەرى قانات يسلامدى بۇگىندە قازاق ەلى عانا ەمەس، الەم تانيدى. مەندە سول مەكەننەن ءومىر ەسىگىن اشتىم. بوكسقا كەلۋىمىزگە وسى قانات اعامىز سەبەپكەر بولدى. ءبىز وسى اعامىزدى ۇلگى تۇتىپ وستىك.
- جالپى «قازاق جاۋىنگەرى» اتانۋىڭىزدىڭ سىرى نەدە؟
- بۇل جاي تاڭدالعان لاقاپ ات ەمەس. قازاق ەجەلدەن جاۋىنگەر حالىق ەكەنى بارشامىزعا بەلگىلى. مەن سول ءۇشىن ميللياردتار ەلىنە قازاقتىڭ قانداي ۇلت ەكەنىن دالەلدەۋ ءۇشىن وسى لاقاپ اتتى تاڭدادىم. جانە دالەلدەگىم كەلدى، دالەلدەپ كەلە جاتىرمىن.
- قىتايدا قانداي جەتىستىكتەرگە قول جەتكىزدىڭىز؟
- قىتايدا 53,5 كەلى سالماقتا WBO تۇجىرىمى بويىنشا قىتاي چەمپيونى جانە WBC تۇجىرىمى بويىنشا ازيا چەمپيونى اتاعىنا قول جەتكىزدىم. بۇل قىتايدا كەز- كەلگەن بوكسشىعا بۇيىرا بەرمەيتىن اتاق. وسى جەتىستىكتەردىڭ ارقاسىندا الەمدىك رەيتينگتەگى ەڭ مىقتى 100 بوكسشىنىڭ قاتارىنا، ال قىتايدا ءوز سالماعىمدا كوش باستادىم.
- سپورتتاعى جەتىسىكتەرىڭىزگە قاراعاندا بوكسقا ەرتە جاستان بەت بۇرعان سياقتىسىز ؟
- باستاۋىش سىنىپتى بىتىرگەننەن كەيىن، اۋىلدان قالانىڭ ورتالىعىندا ورنالاسقان مەكتەپكە اۋىستىم. قىسقى دەمالىس كەزىندە «بوكس ۇيىرمەسىنە شاقىرامىز» دەگەن جارناماعا كوزىم ءتۇسىپ، كۋرسقا جازىلدىم. وسىلايشا 15 جاسىمدا جارتى جىلدىڭ ىشىندە التاي چەمپيونى اتاندىم.
- العاشقى بوكس «الىپپەسىن» كىم ۇيرەتتى ؟
- قانات يسلامنىڭ العاشقى باپكەرى مۇرات بوشاي ۇلى تۋرالى بوكسسۇيەر قاۋىم جاقسى بىلەتىن بولۋى كەرەك. مەنىڭ دە العاشقى ۇستازىم وسى كىسى. ول بوكستىڭ قىر- سىرىن ۇيرەتىپ قانا قويماي، ءدىن مەن ءدىلىمىزدى، ۇلتتىق قۇندىلىقتارىمىزدى قاستەرلەۋدى ۇيرەتتى. ءبىزدىڭ بابالارىمىزدىڭ باتىر بولعانىن سانامىزعا قۇيىپ وتىردى. قىتايدا جۇرسە دە ۇلتى ءۇشىن ماڭداي تەرىن توگىپ، ەلەۋلى ەڭبەك ەتكەن ادام. كوپتەگەن قازاق بالاسىن سپورتقا باۋلىپ، ءتالىم- تاربيە بەردى. مەنىڭ دە ۇلكەن جەتىستىكتەرگە قول جەتكىزۋىمە سەبەپكەر بولدى.
- كاسىپقوي بوكسقا كەلۋىڭىزگە نە سەبەپ بولدى؟
- قىتايدا اۋەسقوي بوكستا توپ جارۋ - وليمپيادانى باعىندىرۋمەن بىردەي. ءبىز ءۇشىن، ياعني از ۇلتتار ءۇشىن اۋەسقويدا بيىكتەردى باعىندىرۋ وتە قيىن. 2012 -جىلى شىنجاڭدا وتكەن چەمپيوناتتا 52 كەلى سالماقتا قارسىلاس شاق كەلتىرمەدىم. ءبىراق، شىنجاڭدا ەكى جىلداي ۇلكەن دودالارعا قاتىسا المادىم. وسىلاي جۇرگەندە قىتايدىڭ ىشكى ولكەسىندەگى ءبىر ۇلكەن كومپانيادان ۇسىنىس ءتۇستى. مەن كەلىسىمىمدى بەردىم. وسىلايشا ۇلكەن سپورتتاعى جولىم اشىلا باستادى. ءبىراق، ارالىقتاعى قيىنشىلىقتارىمدى ايتپاي- اق قويايىن.
- جاقسى، كاسىپقوي بوكستاعى العاشقى جەڭىسىڭىزدى ەسكە تۇسىرە كەتسەڭىز ؟
- 2014 -جىلى كاسىپقوي بوكستاعى العاشقى جەكپە- جەگىمدى وتكىزىپ، جەڭىسكە جەتتىم. 2016 -جىلى WBA تۇجىرىمى بويىنشا قىتاي چەمپيونى اتانىپ، التىن بەلبەۋگە يە بولدىم. ودان كەيىن WBC تۇجىرىمى بويىنشا ازيا چەمپيونى اتاندىم. وسىدان ءبىر- ەكى اي بۇرىن قىتايعا بارىپ تاعى ءبىر جەكپە- جەك وتكىزىپ كەلدىم.
- قازاقستانعا كەلگەنىڭىزگە جالپى قانشا ۋاقىت بولدى؟
- بيىل كەلىپ وتىرمىن. الماتىدا ءۇش اي جاتتىعىپ، اراسىندا قىتايعا بارىپ ءبىر جەكپە- جەك وتكىزىپ كەلدىم. ودان بەرى ءبىر اي بولدى.
- بۇل جاقتا قاي باپكەرمەن جۇمىس جاساپ جاتسىز ؟
- قازىر جانقوش تۇراروۆتىڭ ۇستازى، كەزىندەگى ارداق نازاروۆتى باپتاعان بەلگىلى باپكەر ساعاتبەك مۇساحانوۆتىڭ قول استىندا جاتتىعىپ جاتىرمىن. 16 - جەلتوقسان كۇنى وسى باپكەرىم مەنى رينگكە الىپ شىعاتىن بولادى.
- بولاشاقتا قازاقستاندا قالعىڭىز كەلە مە؟
- ارينە، ءوز ەلىڭدە، اتاجۇرتىڭدا ونەر كورسەتىپ ابىرويىن اسقاقتاتقانعا نە جەتسىن. الداعى ۋاقىتتا ازاماتتىق الۋ ماسەلەسىن دە شەشەمىن دەگەن ويدامىن.
- بۇل جولعى قارسىلاسىڭ تۋرالى نە ايتاسىز؟ بۇرىننان بىلەسىز بە ونى؟
- بۇرىننان تانىستىعىم جوق. ءبىر بىلەتىنىم جەڭىلىپ كورمەگەن ازەربايجاندىق بوكسشى فاريد الييەۆپەن جۇدىرىقتاساتىنىمدى بىلەم. ول بۇعان دەيىن 5 جەكپە- جەك وتكىزىپ، بارلىعىندا نوكاۋتپەن جەڭىسكە جەتىپتى.
- ءبىزدىڭ بىلۋىمىزشە بوكس كەشى قانات يسلامنىڭ «QAZAQ promotions» پروموۋتەرلىك كومپانياسىنىڭ ۇيىمداستىرۋىمەن وتكەلى وتىر. بۇل بوكس كەشىندەگى جەكپە- جەگىڭ حالىقارلىق كاسىپقوي بوكس فەدەراتسياسىنىڭ رەسمي تىركەۋىنە كىرە مە؟
- جوق، كىرمەيدى. قىتايدا دا وسىنداي ايقاستار بولعان. نەگىزى، مەن 16 جەكپە- جەك وتكىزگەم. بارلىعىندا جەڭىسكە جەتتىم. الايدا، ناقتى كاسىپقوي بوكس كەشىندە 14 رەت ونەر كورسەتىپپىن.
- اڭگىمەڭىزگە راحمەت! الداعى ايقاسىڭىزعا ساتتىلىك تىلەيمىز...
اۆتور: كۇنسۇلتان وتارباي