پوليتسيا قالا ورتالىعىندا جۇرتقا وق اتقان ەر ادامدى اتىپ ءولتىردى

ستراسبۋرگ. قازاقپارات - ستراسبۋرگ قالاسىنىڭ ورتالىعىندا اتىس جاسادى دەگەن كۇدىككە ىلىنگەن شەريف شەكات بەيسەنبى كۇنى تاڭەرتەڭ ءولتىرىلدى.

بۇل تۋرالى فرانسيا ەلىنىڭ ىشكى ىستەر ءمينيسترى كريستوف كاستانەر باسپا ءسوز كونفەرەنسياسىندا ءمالىم ەتتى، دەپ حابارلايدى «قازاقپارات» ءتىلشىسى.

ءمينيستردىڭ ايتۋىنشا، بەيسەنبى كەشىندە ءۇش ادامنان قۇرىلعان پوليتسيا جاساعى ستراسبۋرگ كوشەلەرىنىڭ بىرىنەن ىزدەۋدە بولعان قىلمىسكەرگە ۇقساس ەر ادامدى بايقاعان.

ءتارتىپ ساقشىلارى ونى توقتاتپاق بولعان، ءبىراق شەريف شەكات ولارعا قاراي وق جاۋدىرا باستاعان. قۇقىق قورعاۋ ورگاندارىنىڭ قىزمەتكەرلەرى وعان وق اتىپ، قىلمىسكەردى ءولتىردى.

ەسكە سالساق، سەيسەنبى كۇنى كەشكىلىك ستراسبۋرگ قالاسىنىڭ ورتالىعىندا، روجدەستۆولىق جارمەڭكەگە جاقىن ماڭدا ادامدارعا اتىس قارۋىنان شابۋىل جاسالدى. سوڭعى مالىمەتتەر بويىنشا، 3 ادام قازا تاۋىپ، 13 ادام جاراقاتتاندى. ەل بيلىگى بۇل قىلمىستى لاڭكەستىك اكتىسى دەپ تانىدى.