دوعالاتپا، بوكپەن، قوسپا: اقسۋدا ۇمىت قالعان ۇلتتىق تاعامدار كورمەسى ءوتتى
ءدامى ءتىل ۇيىرەتىن ۇلتتىق تاعامدار بايقاۋىنا التى اۋىلدىق ايماقتان كەلگەن قىز-كەلىنشەكتەر مەن اق جاۋلىقتى اجەلەر كۇندەلىكتى تۇرمىستا كوپ دايىندالا بەرمەيتىن ۇمىت قالعان تاعامداردى ۇسىندى.
ماسەلەن، بەرەكە اۋىلىنىڭ مادەني ۇيىمداستىرۋشىسى گۇلسىم بەكجانوۆا بوكپەن، بىلامىق دايىنداپ اكەلگەن.
«بوكپەن - قۋىرىلعان ۇندى سۇتكە بوكتىرىپ پىسىرگەن تاعام، - دەيدى گۇلسىم بەكجانوۆا.
- بۇل تاعامدى دايىنداۋ ءتاسىلى وتە قاراپايىم بولىپ كەلەدى. بۇعان قوسا، ادام ازعاسى جەڭىل سىڭىرەدى. الدىمەن ەلەنىپ تازارتىلعان تارى ۇنىن وتتى جايلاپ جاعا وتىرىپ، قازانعا قۋىرىپ العامىز. كەيىن قۇيرىق نەمەسە جىلقى مايىن ارالاستىرىپ، ۇستىنە ءسۇت قۇيادى. قوسپا قويۋلانعانشا ۇستىنە ۇن سەبەلەپ ارالاستىرىپ وتىرادى. داستارحانعا ىستىق كۇيىندە ۇسىنعان دۇرىس».
ەۆگەنيەۆكا اۋىلدىق ايماعى 20 ءتۇرلى ءدام اكەلگەن. اۋىل تۇرعىنى گۇلساراي ساعيدولدانىڭ ايتۋىنشا، ۇلتتىق تاعامنىڭ بۇگىندە ۇمىت قالعان ءتۇرىنىڭ ءبىرى - بىلامىق وتە قۇنارلى، تويىمدى تاعام. ۇن مەن ەتتەن جاسالادى. الدىمەن ۇندى، جارماقتى قازانعا ازداپ قۋىرىپ الىپ، قويدىڭ شىجعىرىلعان ءىش مايى قوسىلادى دا، ۇستىنە قايناعان سۋ قۇيادى. بۇدان كەيىن ۇزدىكسىز ارالاستىرىپ وتىرىپ پىسىرەدى.
«ايەل ادامنىڭ بويىنا بىتكەن بالا كالتسيدى اناسىنان الادى. ناتيجەسىندە جاڭا بوسانعان ايەلدىڭ اعزاسى السىرەپ قالاتىنى بەلگىلى. سوندىقتان ەرتەدە اجەلەرىمىز كەلىندەرىنە بىلامىق ءپىسىرىپ بەرگەن. ال، بورداما شايدى قانسونارعا شىعاردا اتالارىمىز ءىشىپ، كۇنى بويى جۇرگەندە قارىندارى اشپاعان. سونداي-اق، جاس بوسانعان انالاردىڭ تەز شيراۋىنا سەپتىگىن تيگىزگەن»، - دەيدى گۇلساراي ساعيدولدا.
بۇدان باسقا، ول دوعالاتپا جانە ۇن قۋىرداق تاعامدارىن ازىرلەگەن.
كورمە قورىتىندىسى بويىنشا ۇزدىك اتانعاندارعا ءتۇرلى سىيلىقتار تابىس ەتىلدى. قالقامان اۋىلىنان باقىتجان توپجايەۆا «ەڭ ۇزدىك باۋىرساق»، ەۆگەنيەۆكا اۋىلدىق وكرۋگىنەن بوتاگوز حۋماربەرگەن، گۇلساراي ساعيدولدا «ەڭ ۇزدىك تاعام»، العاباس اۋىلدىق ايماعىنان بيبىگۇل نۇرمۇعامبەتوۆا «ەڭ ۇزدىك قوسپا» ءپىسىرىپ، اتالعان اتالىمدارعا يە بولدى.
قىزىلجار اۋىلدىق ايماعىنان كەلگەن نۇربيكە حاسانوۆا «ەڭ ۇزدىك ايران»، تولعاناي قايىرجانوۆا «ەڭ ۇزدىك سارىماي»، ءمامايىت وماروۆ اتىنداعى اۋىلدان ءۇنزيلا قابىلدينوۆا «ەڭ ۇزدىك قۇرت»، دوستىق اۋىلدىق ايماعىنان گۇلسىم بەكجانوۆا «ەڭ ۇزدىك ىرىمشىك» ءپىسىرىپ اكەلگەنى ءۇشىن ماراپاتتالدى.