وتىراردا ءشامشى قالداياقوۆتىڭ قۇرمەتىنە ساياباق پەن ەسكەرتكىش اشىلدى
بۇل تۋرالى اۋدان اكىمدىگىنىڭ باسپا ءسوز قىزمەتى ءمالىم ەتتى، دەپ حابارلايدى قازاقپارات.
قارا توپىراعىندا تابانىنىڭ ءىزى قالعان، ءوز ەسىمىمەن اتالاتىن اۋىلدا ەل يگىلىگىنە بەرىلگەن ساياباق تورىندە اسا كورنەكتى سازگەر، مۋزىكانىڭ ايگىلى مايتالمانى، قازاقستان مادەنيەتىنە ەڭبەگى سىڭگەن قايراتكەر، قازاقستاننىڭ حالىق ءارتىسى ءشامشى قالداياقوۆتىڭ ەڭسەلى ەسكەرتكىشى دە بوي كوتەردى. سالتاناتتى شاراعا اۋدان باسشىسى ەرلان ايتاحانوۆ، زيالى قاۋىم وكىلدەرى مەن اۋدان تۇرعىندارى قاتىستى.
ساياباقتىڭ اشىلۋ سالتاناتىندا اۋدان اكىمى ەرلان ايتاحانوۆ اۋىل تۇرعىندارىن تاۋەلسىزدىكتىڭ 27 جىلدىق مەرەيلى مەرەكەسىمەن قۇتتىقتاپ، كومپوزيتور ساياباعى مەن ەسكەرتكىشىنىڭ لەنتاسىن قيدى.
«ۇلت كوشباسشىسى نۇرسۇلتان نازاربايەۆ «بولاشاققا باعدار: رۋحاني جاڭعىرۋ» ماقالاسىنىڭ «تۋعان جەر» باعدارلاماسىندا وتانىمىزدى كوركەيتىپ، قازاقستاندىقتاردىڭ جاعدايىن جاقسارتۋ ءۇشىن كوپتەگەن جۇمىستاردى اتقارۋ كەرەك ەكەنىن اتاپ كورسەتكەن بولاتىن. وسى باعىتتا اۋدانىمىزدا بىرنەشە اۋقىمدى جۇمىستار جۇمىستار اتقارىلىپ كەلەدى. مۇنىڭ ءبارى تاۋەلسىز مەملەكەتىمىزدىڭ بەيبىت كۇندەردە قول جەتكىزگەن جەتىستىكتەرى دەپ بىلەمىن. سونداي-اق، ەلباسىنىڭ جۋىردا عانا جارىققا شىققان «ۇلى دالانىڭ جەتى قىرى» ماقالاسىنىڭ «ۇلى دالانىڭ ۇلى ەسىمدەرى» بولىمىندە دە ۇلى تۇلعالار شوعىرىن كەڭىنەن ناسيحاتتاپ، ەسكەرتكىشتەر مەن تۇلعالار گالەرەياسىن جاساۋ سىندى ءبىرقاتار ماڭىزدى باستاما كوتەرگەنى بەلگىلى. بار قازاقتى اسەم انىمەن الديلەپ، ونەر كوكجيەگىن سىرلى اندەرىمەن كومكەرگەن سازگەر اتىنداعى ساياباق اۋىل تۇرعىندارى مەن ونىڭ قوناقتارى ءۇشىن تاماشا دەمالىس ورنى بولماق»، - دەدى ەرلان ايتاحانوۆ.
اۋماعى اتشاپتىرىم دەمالىس ورنى ويۋ-ورنەكتى قورشاۋمەن بەكىتىلىپ، قىلقان جاپىراقتى 100 ءتۇپ اعاش جانە جەرگىلىكتى كليماتقا بەيىمدەلگەن 600 ءتۇپ قارا اعاش وتىرعىزىلعان. ادەمى اياق جولداردىڭ بويىنا 14 ورىندىق قويىلىپ، كەلۋشىلەردىڭ دەمالۋىنا جاعداي جاسالدى. جاۋىن مەن ىستىق كۇننەن قورعان بولاتىن 4 راتون دا ساياباقتىڭ ءارىن كىرگىزىپ تۇر. كوكتەم ايلارىندا ساياباق ءىشى گۇلمەن كومكەرىلمەك.
شارا بارىسىندا مەملەكەتتىك گيمن اۆتورى قۇرمەتىنە بوي كوتەرگەن نىسانعا اۋىل قاريالارى جۇرەكجاردى لەبىزدەرىن ايتىپ، اق باتاسىن بەردى. ودان ءارى سالتاناتتى شارادا ۇلى سازگەردىڭ بالالىق شاعىنان كورىنىستەر قويىلىپ، قازاق دالاسىن انمەن تەربەتكەن سازگەردىڭ اندەرى شىرقالدى.