بالاڭىز زاڭدى نەمەسە زاڭسىز بالاباقشاعا بارىپ جۇرگەنىن قالاي بىلۋگە بولادى

None
None
استانا. قازاقپارات - «كولەڭكەدەگى بالاباقشا» اتانىپ كەتكەن مەكتەپكە دەيىنگى ۇيىمداردان اتا- انالار قالاي ساقتانا الادى؟

بۇل سۇراققا استانا قالالىق ءبىلىم باسقارماسى مەكتەپكە دەيىنگى تاربيە جانە وقىتۋ ءبولىمىنىڭ باسشىسى ءلاززات ورازبەكوۆا جاۋاپ بەردى، دەپ حابارلايدى قازاقپارات ءتىلشىسى.

«كەيبىر اتا-انالار بىلمەستىكتەن ءوزىنىڭ بالالارىن زاڭسىز جۇمىس ىستەپ جاتقان بالاباقشالارعا بەرىپ جاتادى. ياعني، «كولەڭكەدەگى» بالاباقشا دەگەنىمىز - زاڭسىز جۇمىس جۇرگىزىپ جاتقان بالاباقشا. ولار كوپ جاعدايدا سانيتارلىق نورمالاردى ساقتاماي، بالالاردىڭ قاۋىپسىزدىك نورمالارىن ەسكەرمەي جۇمىس ىستەيدى. ياعني، بەلگىلى ءبىر كاسىپكەر ەشقانداي رۇقسات قۇجاتىنسىز جەكە بالاباقشا اشادى. استانا قالاسىندا مۇنداي جاعداي تىركەلگەن. «فانتازيما» اتتى بالاباقشانى ءبىر كاسىپكەر اشىپ، اتا-انالاردان اقشا جيناپ العان. كەيىن ءىز-ءتۇزسىز كەتكەن»، - دەيدى ول كاسىپكەرلەردىڭ قۇقىعىن قورعاۋ جانە سىبايلاس جەمقورلىققا قارسى كۇرەس كەڭەسىنىڭ كەزەكتى وتىرىسىندا تىلشىلەردىڭ سۇراعىنا جاۋاپ بەرە وتىرىپ.

ءلاززات ورازبەكوۆا ءوز سوزىندە استانا قالاسىندا قانشا بالاباقشا زاڭسىز جۇمىس ىستەپ جاتقانى تۋرالى ناقتى مالىمەت جوقتىعىن العا تارتتى.

«سەبەبى، ولاردىڭ جۇمىسىن تەكسەرۋ جەرگىلىكتى اتقارۋشى ورگانداردىڭ قۇزىرەتىنە كىرمەيدى. جەرگىلىكتى اتقارۋشى ورگان، ياعني استانا قالاسىنىڭ اكىمدىگى زاڭدى تۇردە جۇمىس ىستەپ جاتقان بالاباقشالارمەن جۇمىس جۇرگىزەدى. قازىرگى تاڭدا ەلوردادا مەملەكەتتىك ءبىلىم بەرۋ تاپسىرىسىن الىپ جاتقان 190 جەكە بالاباقشا بار. 190 بالاباقشا زاڭدى تۇردە جۇمىس ىستەپ، ءاردايىم ولاردىڭ جۇمىسى باقىلانىپ وتىرادى»، - دەيدى ءبىلىم باسقارماسىنىڭ وكىلى.

ونىڭ ايتۋىنشا، زاڭدى تۇردە جۇمىس ىستەپ جاتقان مەكتەپكە دەيىنگى مەكەمەلەردىڭ ءتىزىمىن استانا قالاسىنىڭ ءبىلىم سالاسىنداعى باقىلاۋ دەپارتامەنتىنىڭ سايتىنان كورۋگە بولادى.

«استانا قالاسىندا جىلىنا 20 مىڭنان استام ءسابي دۇنيەگە كەلەدى. جەتى مىڭنان استام بالا ميگراتسياعا بايلانىستى تولىعادى. سوندىقتان، قازىرگى تاڭدا 3 جاستان 6 جاسقا دەيىنگى 18 مىڭ بالا كەزەكتە تۇر»، - دەيدى ءلاززات ورازبەكوۆا.

ءبولىم باسشىسى سونىمەن بىرگە زاڭسىز جۇمىس ىستەپ جاتقان بالاباقشالاردى قالاي انىقتاۋعا بولاتىنىن ايتىپ بەردى.

«اتا-انالارعا وسى تۇرعىدا ءجيى ءتۇسىندىرۋ جۇمىستارىن جۇرگىزەمىز. ەڭ باستىسى، استانا قالاسىنىڭ ءبىلىم باسقارماسىنا حابارلاسا الادى. ءبىلىم باسقارماسىنىڭ Call-ورتالىعىنا (508015 ءنومىرى) حابارلاسسا، جەكەمەنشىك بالاباقشانىڭ قۇرىلتايشىسى كىم، مەڭگەرۋشىسى كىم، تىركەلگەن بە، جوق پا، مەملەكەتتىك تاپسىرىس الا ما دەگەن سۇراقتاردى قويىپ، تولىق اقپارات الا الادى. سونىمەن بىرگە، استانا قالاسىنىڭ ءبىلىم سالاسىن باقىلاۋ دەپارتامەنتىنىڭ سايتىنا كىرىپ، سول جەردەن بالاباقشالار تۋرالى ەگجەي- تەگجەيلى بىلۋگە بولادى»، - دەدى ءلاززات ورازبەكوۆا.

سوڭعى جاڭالىقتار