اقتوبەلىك شەنەۋنىك قولاستىنداعى قىزمەتكەردى ۇرعان
مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ اقتوبە وبلىسىنداعى ادەپ جونىندەگى كەڭەسى وتىرىسىندا ەرلان ورىنبايەۆقا قاتىستى تارتىپتىك ءىس قارادى.
«ينسپەكسيا باسشىسىنىڭ ورىنباسارى ەرلان ورىنبايەۆقا قاتىستى تەكسەرۋ ءجۇردى. ارىزدانۋشى، كادر ءبولىمىنىڭ مامانى گۇلميرا جيدەبايەۆانىڭ ايتۋىنشا، 2018 -جىلعى 19 -قازاندا باسشىنىڭ ورىنباسارى ە. ورىنبايەۆ وزىنە قول كوتەرىپ، «ولتىرەمىن» دەپ ايتقان. ال ە. ورىنبايەۆ ءوز كىناسىن مويىنداماي وتىر. الايدا ەكى ادام اراسىنداعى ۇرىستى ارىپتەستەرى ەستىپ، راستاپ وتىر. وقيعا ورنىنا پوليتسيا مەن جەدەل جاردەم شاقىرىلدى. سوت-مەديتسينالىق ساراپتاما كەزىندە جابىرلەنۋشىنىڭ باسى مەن يىعىندا ۇرعاننان قانتالاعان جەرلەر انىقتالدى. قازىر قىلمىستىق ءىس تە قوزعالۋدا»، - دەدى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ اقتوبە وبلىسىنداعى دەپارتامەنتتىڭ باس مامانى نۇرحات مۇڭايتپاسوۆ.
ادەپ كەڭەسىنە شەنەۋنىك كەلىپ، وقيعانىڭ ءوز نۇسقاسىن ايتىپ بەردى. ول ءجابىر كورگەن گ. جيدەبايەۆا حاتقا جاۋاپ بەرۋ ۋاقىتى ءوتىپ كەتكەن كەزدە قول قويدىرۋعا كەلگەن كەزدە، تەك داۋىس كوتەرگەنىن جەتكىزدى.
«مەن تۋرالى جالعان اقپارات بەرىپ جاتىر. مەن 1999 -جىلدان بەرى ءبىر سالادا ەڭبەك ەتىپ كەلەمىن. بىردە ءبىر ءسوز ەستىپ، جۇمىسىم سىنالعان ەمەس. ول ماعان داۋىس كوتەردى، وزىمە قاراي ۇمتىلدى. سول كەزدە قولىن ۇستاپ قالدىم»، - دەدى ەرلان ورىنبايەۆ.
ال گۇلميرا جيدەبايەۆا سوققى العانىن، جابىرلەگەنىن، ءادىل شەشىم شىعارۋىن سۇرادى. ادەپ كەڭەسى ءبىراۋىزدان اگروونەركاسىپ كەشەنىندەگى مەملەكەتتىك ينسپەكسيا كوميتەتى وبلىستىق ينسپەكسيا باسشىسىنىڭ ورىنباسارى ەرلان ورىنبايەۆتى جۇمىستان شىعارۋ تۋرالى ۇيعارىم بەردى.
قازىرگى كەزدە ۇلتتىق بيۋرونىڭ وبلىستىق دەپارتامەنتى قىلمىستىق ءىستى تەرگەپ جاتىر.