ايدار تۇرعانبەكتىڭ جاڭا بەينەبايانى جۇرتتىڭ جۇرەگىن ەلجىرەتتى

استانا. قازاقپارات - ءانشى ايدار تۇرعانبەك الماتىدا «امان ءجۇر اناشىم» دەگەن جاڭا بەينەبايانىن تانىستىردى. جاي تانىستىرىپ قويعان جوق، سۇيىكتى تىڭدارماندارى، ونەردەگى دوستارى مەن تىلشىلەر قاۋىمى الدىندا تۇساۋكەسەر ءراسىمىن وتكىزدى.

بۇل بەينەبايان بۇرىنعى بەينەباياندارىنان وزگەرەك. ولاي دەيتىن سەبەبىمىز، ءان تۋىندىسى مەن ونداعى سيۋجەتتىڭ بەرەر تاعىلىمى مول. جۇمباقتاماي ايتار بولساق، قازىرگى قوعامداعى جەتىمدەر جاي- كۇيى باياندالادى. جاي باياندالمايدى، ءبارى دە شىنايى. ويتكەنى بەينەبايانعا تۇسكەن، حور بولىپ ءان شىرقاعان جاس جەتكىنشەكتەر قاتارىندا ءامينا اپا اسىراپ العان بالالار دا بار. جالپى بەينەبايان جەلىسى - جەتىم بالانىڭ شەشەسىنە جولداعان حاتى حاقىندا. قوعامداعى جەتىمدەردىڭ جاي- كۇيى جالعىز قازاق ەلىندە عانا بار دۇنيە ەمەس. اتا- انا مەيىرىمىن اڭساعان بۇلدىرشىندەردىڭ تاعدىرى - عالامدىق ماسەلە. ايدار وسى بەينەبايانى ارقىلى ادامزات بالاسىنا وي سالعىسى كەلەدى. قازاق اۋەلدەن- اق جەتىمىن جىلاتپاعان، جەسىرىن قاڭعىرتپاعان حالىق. دەگەنمەن بۇگىندە باۋىر ەتى بالاسىن باعىپ- قاعۋدان باس تارتقان ءتۇرلى وقيعالار جايلى وقىپ، كورىپ ءجۇرمىز. بۇل قوعامداعى ىندەتتى جازۋ - ءبىر مىندەت تە.

ءانشى ونەردەگى ءبىر مىندەتىن وسى تاقىرىپقا ارناۋدى پارىز ساناعانداي. ايداردىڭ بەينەبايانىن كورگەندەر كوزىنە جاس الىپ، انشىگە العىستارىن دا جاۋدىردى. ءبىر جىلدارى ب. وماروۆتىڭ ءانى مەن س. قاليەۆتىڭ سوزىنە جازىلعان "ءسابي باقىتى" ءانى ۇلىقپان جولداسوۆتىڭ ورىنداۋىندا قالىڭ تىڭدارماننىڭ جۇرەگىن ەلجىرەتكەن ەدى. سول اندەگى:

جەتىمنىڭ كوزى جاستى ەكەن،

ۋدان دا ءدامى اشى ەكەن.

 اكەنىڭ مۇز با جۇرەگى؟ !

 انانىڭ باۋىرى تاس پا ەكەن؟ !

 اڭساتقان جاندى اق ارمان،

 جاس بولىپ اققان جاناردان.

ءسابيدىڭ ءبارى باقىتتى،

بولۋى ءۇشىن جارالعان، - دەگەن جولدارى ءالى ەسىڭىزدە بولار. بۇل ءان تالايلارعا تاعىلىمى مول تاربيە سىيلادى. ايداردىڭ جاڭا بەينەبايانى دا وسى ءبىر تاقىرىپتى تۋ ەتكەن. شاشپاسا كۇن شۋاق، گۇل قالاي كوكتەيدى. الەمنىڭ مەيىرىمى، اناعا جەتپەيدى، - دەگەن جولدارى جۇرەكتى تەربەيدى. وعان ءان سازىن قوسىڭىز. انانىڭ اماندىعى، بالانىڭ باقىتى - عالامنىڭ شاتتىعى ەمەس پە؟ ! وسى تۇستا تۋىندىنىڭ شىعارماشىلىق توبى جايلى ايتا كەتكەنىمىز دە ابزال. ءان اۆتورى - ەربول اقباسوۆ، ال ءسوزىن رۇستەم ارسلانوۆ پەن سارا جۇنىسبەك جازعان. ال اعىلشىن تىلىندەگى نۇسقا اۆتورىن دياس مىرزاقوجا اۋدارعان. بەينەباياننىڭ رەجيسسەرى - ازامات ەرجان ۇلى. بەينەباياننىڭ وزگەشەلىگى جايلى ايتتىق. ەندى جاڭالىعى جايلى ايتا كەتكەنىمىز دە ءجون.

 

«امان ءجۇرشى اناشىم» ءانى قازاق جانە اعىلشىن تىلدەرىندە ايتىلعان. بەينەبايان دا ەكى تىلدە جارىققا شىعادى. نەمىسشە وقىعان ايدار ءۇشىن اعىلشىنشا ايتۋ وڭاي بولماعانى دا انىق. ايتسە دە
Backstreet Boys, Beyonce اندەرىن كوبىرەك تىڭدايتىن ءانشى ءۇشىن قاتتى قيىن بولماپتى. ايتا كەتەيىك، بيىل ايدار ءان شىرقايتىن «جىگىتتەر» كۆارتەتى 15 جىلدىعىن اتاپ ءوتتى. الماتى مەن استانا قالالارىندا مەرەيتويلىق ءان كەشتەرىن دە وتكىزدى. «جىگىتتەر» كۆارتەتى مەن ونداعى ءار ءانشىنىڭ جەكە شىعارماشىلىعىنا جارقىن جەتىستىكتەر تىلەيمىز.

Massaget.kz