الماتىدا كوشە شامدارى كۇندىز نەلىكتەن وشپەي قالادى
اتاپ ايتقاندا، الماتىدا شامامەن 200 كوشەدە ەسكى شامداردىڭ ورنىنا جارىق ديودتى شامدار ورناتىلادى، دەپ حابارلايدى قازاقپارات ءتىلشىسى.
الماتى ەنەرگەتيكا جانە كوممۋنالدىق شارۋاشىلىق باسقارماسىنىڭ باسپا ءسوز قىزمەتىنەن حابارلاعانداي، الاتاۋ اۋدانىندا - 33 كوشەدە، اۋەزوۆ اۋدانىندا - 64، جەتىسۋ اۋدانىندا - 32، مەدەۋ اۋدانىندا - 32، تۇركسىب اۋدانىندا - 39، بوستاندىق اۋدانىندا - 12 جانە ناۋرىزباي اۋدانىندا 8 كوشەدە شامدار اۋىستىرىلادى.
«جاڭا جارىق ديودتى LED شامداردىڭ ءارقايسىسى 99 مىڭ تەڭگە تۇرادى. بۇل سوماعا شامنىڭ قۇنى، مونتاج جۇمىستارى، ەسكى شامدى بۇزۋ، بيىكتىكتەگى جۇمىستاردىڭ اقىسى كىرەدى»، - دەدى باسقارما باسشىسى ورىنباسارىنىڭ مىندەتىن اتقارۋشى داۋرەن جاندىبايەۆ.
د. جاندىبايەۆ سونداي-اق، كۇندىز دە جانىپ تۇراتىن كوشە شامدارىنا قاتىستى الماتىلىقتاردىڭ سۇراعىنا جاۋاپ بەردى.
«قازىر جارىق تىرەك باعاندارىنىڭ سانى انىقتالىپ جاتىر. ءار ۋچاسكەدە توكپەن قامتۋ قوبديشاسى ورناتىلعان. لينياعا توق سودان كەلەدى. سونىڭ كەسىرىنەن كۇندىز 15-20 مينۋتقا كەيدە كوشە جارىعى قوسىلىپ قالادى. سونىمەن قاتار، قاس قارايا جەلىدە كەرنەۋ توگى بولعاندىقتان، اپاتتىق جۇمىستار (قىسقا تۇيىقتالۋ، ءۇزىلۋ) جاسالمايدى. جوندەۋ جۇمىستارى تەك كۇندىز جۇرگىزىلەدى. سوندىقتان كۇندىز اپاتتىڭ جويىلعانىن تەكسەرۋ ءۇشىن از ۋاقىتقا جارىق قوسىلادى»، - دەدى د. جاندىبايەۆ.
وسى ماقساتتا ديسپەتچەرلىك قىزمەت جۇمىسىن نىعايتۋ ءارى جەلىدەگى اپاتتىق جاعدايلاردى بولدىرماۋ ءۇشىن SIMATICSTEP 7 (TIAPortal) V14 بازاسىنداعى باعدارلامالىق قامتۋ جاسالدى.
«جاڭا شامداردىڭ ەسكىدەن ايىرماشىلىعى ەكولوگيالىق تۇرعىدان تازالىعىندا. قۇرامىندا زياندى جانە ءقاۋىپتى زاتتار جوق. ونى جويۋ ءۇشىن كوپ كۇش جۇمسالمايدى. مەحانيكالىق تۇرعىدان شامدار سىرتقى فاكتورلاردان قورعالعان. جارىق شامدارى قىزۋى ءۇشىن الدىن الا قىزدىرۋ قاجەتتىگى جوق. سونىمەن قاتار، ەنەرگيا تۇتىنۋ كورسەتكىشى اناعۇرلىم تومەن»، - دەدى داۋرەن جاندىبايەۆ.
ايتا كەتۋ كەرەك، مەملەكەت باسشىسىنىڭ جولداۋىن جۇزەگە اسىرۋ جانە الماتىدا جايلى ورتانى قالىپتاستىرۋ ماقساتىندا الماتىدا شامداردىڭ %31,5 ەنەرگيا ۇنەمدەيتىن جانە جارىق ديودتى لامپالارعا اۋىستىرىلعان.
2019-2026 -جىلدارعا ارنالعان «الماتى قالاسىنىڭ سىرتقى جارىقتاندىرۋ جەلىسىن قايتا جاڭعىرتۋ» مەملەكەتتىك- جەكەشەلىك ارىپتەستىك اياسىندا 1375 ك م سىرتقى جارىقتاندىرۋ جەلىسى مەن 42052 تىرەك باعانىن قاۋىستىرۋ جوسپاردا بار. سونداي-اق، تروتۋارلاردى جارىقتاندىرۋعا 1253 قوسىمشا شام ورناتىلادى.
بۇل باعدارلاما بىتكەن سوڭ الماتىدا ەنەرگوۇنەمدەۋشى LED جارىقتاندىرۋ جەلىسى تولىعىمەن 100 پايىزعا جاڭارادى.
2018 -جىلى 8000 شامدى جارىق ديودتى شامعا اۋىستىرۋ جوسپارلانعان.