ۇزدىك جاس ديپلوماتتار ماراپاتتالدى
سىرتقى ىستەر مينيسترلىگىنىڭ جوباسىنا ەلوردانىڭ 7 مەكتەبىنەن (№3, №4, №5, №6, №48, №75, №81) 35 وقۋشى قاتىستى. بولاشاق ديپلوماتتار ەكى اي بويى برازيليا، گەرمانيا، گرۋزيا، كورەيا، جاپونيا، پولشا، تۇركيا مەملەكەتتەرىنىڭ ەلشى جانە ەلشىلىكتەرىمەن جۇمىس جاساپ، اتالعان سالا جۇمىسىنىڭ قىر- سىرىمەن تانىستى.
جوبانىڭ بۇگىنگى اقتىق سىنىندا وقۋشىلار بۇۇ مودەلىنە سايكەس «بولاشاقتىڭ ەنەرگياسى» تاقىرىبىندا وتىرىس وتكىزىپ، ەنەرگيا تاقىرىبىن تالقىعا سالدى. ياعني، ءار مەملەكەت ديپلوماتتارى ءوز ەلدەرىنىڭ بولاشاقتا ەنەرگيا وندىرۋگە قاتىستى ۇستانىمدارى مەن جوبالارىن ۇسىندى.
«ديپلوماتتار مەملەكەتتىڭ ماڭىزدى قىزمەتكەرىنىڭ ءبىرى. ولار ءوز ەلدەرىنىڭ مۇددەسىن قورعاپ قانا قويماي، شەتەلدىك ارىپتەستەرىمەن تىعىز قارىم- قاتىناس جاساپ، ىنتىماقتاستىقتا جۇمىس ىستەي ءبىلۋى ءتيىس. بۇلاي دەيتىن سەبەبىم، وسى وتىرعان جاستار ەلىمىزدىڭ بولاشاق ديپلوماتتارى» ، - دەدى ەلىمىزدىڭ سىرتقى ىستەر ءمينيسترى قايرات ءابدىراحمانوۆ.
مينيستر جاسوسپىرىمدەردى ديپلوماتيالىق قىزمەتتەگى العاشقى قادامدارىنىڭ ءساتتى باستالۋىمەن قۇتتىقتاپ، بارلىقتارىنىڭ ەڭبەكتەرىن ەرەكشە باعالاپ، ماراپاتتادى.
«جوباعا قاتىسقانىما قۋانىشتىمىن، سەبەبى بولاشاق ديپلومات رەتىندە وزىمە قاجەتتى كوپتەگەن دۇنيەمەن تانىستىم. ناقتى ايتقاندا، ءبىزدىڭ كومانداعا جاپونيا ەلى ءتۇستى جانە جوبا بارىسىندا وسى ەلدىڭ ەلشىلىگىمەن بەلسەندى جۇمىس ىستەدىك. ودان بولەك، ەلشىلىكتە وتەتىن ماڭىزدى شارالاردىڭ قالاي ۇيىمداستىرىلىپ، وتەتىنىمەن تانىستىق» ، - دەدى استانا قالاسى №48 ليسەيىنىڭ 9 - سىنىپ وقۋشىسى ايدا ورازحۋنوۆا.
ەسكە سالساق، جاس ديپلوماتتارعا ارنالعان اتالعان جوبا قازان ايىندا باستالعان بولاتىن.