باۋىرساق ءپىسىرۋدىڭ وڭاي جولى

 استانا. قازاقپارات - بۇل ءدامدى باۋىرساقتى ۇيدەگىلەرگە ءجيى ءپىسىرىپ بەرەمىن. ينگرەديەنتتەردەرى وتە از: ۇن، قۇرعاق اشىتقى، تۇز، قانت جانە مايونەز.

الدىمەن 1,5 اس قاسىق قۇرعاق اشىتقىنى جىلى سۋعا بىلعاپ، 10 مينۋتتاي كوتەرىلۋىن كۇتەمىز. سودان سوڭ 1 كگ ۇندى شۇڭعىل ىدىسقا سالىپ، 100 گرامم مايونەزدى جاقسىلاپ ارالاستىرامىز. ۇستىنە 1 اس قاسىق قانت، 1 شاي قاسىق تۇز سالىپ، اشىتقى قوسىلعان سۋدى قۇيىپ، يلەيمىز.

بۇل جەردە ەڭ باستىسى - جىلى سۋدى مولشەرمەن قۇيۋ. ۇن يلەۋدى باستاعاندا بىرتىندەپ سۋدى قۇيىپ، ونىڭ تىم قويمالجىڭ بولىپ كەتپەۋىن قاداعالاۋ كەرەك. ەگەر سۋدى كوپ قۇيىپ الىپ، قامىرىڭىز سۇيىقتاۋ بولىپ كەتسە، ۇستىنە ەسەلەپ ۇن سالىپ قويىلتۋعا تۋرا كەلەدى.

سۋدى تىم از قۇيىپ، قامىردى قاتتى يلەۋگە دە بولمايدى، ايتپەسە باۋىرساعىڭىز كوتەرىلمەي قالادى. سونىمەن، باۋىرساعىڭىزدى اشىتىپ بولساڭىز، پوليەتيلەن قالتاعا سالىپ، نە ۇستەلدىڭ ۇستىنە شۇڭعىل ىدىستى توڭكەرىپ، 1,5- 2 ساعاتقا قوياسىز.

قامىر اشىعاننان كەيىن ونى 3-كە ءبولىپ، ءارقايسىسىن دوڭگەلەكتەپ الىپ، مايدى قىزدىرىپ، پىسىرە باستايسىز.

باۋىرساعىڭىز دوڭگەلەك بولۋ ءۇشىن دەسەڭىز، ستاقان، كەسە، ت. ب. ىدىسپەن ءوزىڭىز قالاعان مولشەردە كەسىپ تۇسىرەسىز.