ەكىنشى دۇنيەجۇزىلىك سوعىسقا قاتىسقان قازاقتار تۋرالى قۇجاتتار كىتاپ بولىپ شىقتى
بۇگىن Satbayev University وقۋ ورنىنىڭ قابىرعاسىندا «ەكىنشى دۇنيەجۇزىلىك سوعىستاعى قازاقتار: شەتەلدىك مۇراعاتتارداعى قۇجاتتار، 1 توم» جيناعىنىڭ تۇساۋى كەسىلدى.
ءىس- شارا تاۋەلسىزدىك كۇنىنە ارنالىپ جانە «رۋحاني جاڭعىرۋ» باعدارلاماسىن جۇزەگە اسىرۋ اياسىندا وتكىزىلدى. سونىمەن قاتار، پرەزيدەنتتىڭ «ۇلى دالانىڭ جەتى قىرى» ماقالاسىندا ايتىلعان «ارحيۆ-2025» جوباسىنا جۇكتەلگەن مىندەتكە نەگىزدەلگەن.
ءبىرىنشى تومدا ەۋروپا ەلدەرىندەگى ارحيۆتەردەن الىنعان ەكىنشى دۇنيەجۇزىلىك سوعىسقا قاتىسقان قازاقتار تۋرالى مالىمەتتەر جاريالانعان. جيناق 15 شەتەلدىك ارحيۆ جانە ۇلىبريتانيا، فرانسيا، نورۆەگيا، رەسەي مەن فينليانديا ەلدەرىنىڭ كىتاپحانالارى جانە مۋزەيلەرىنەن الىنعان قۇجاتتاردان تۇرادى. سونىمەن قاتار، مايدانگەرلەردىڭ جەكە مۇراعاتتارىنان الىنعان قۇجاتتار ەنگەن. ماتەريالداردىڭ دەنى العاش رەت جاريالانىپ وتىر.
بۇل ەڭبەكتى جازۋ بارىسىندا قازاقستاندىق عالىمدار تاريحتى بارىنشا جۇيەلى جانە كەشەندى تۇردە زەرتتەۋگە تىرىسقان. جيناق اۆتورلارىنىڭ ءبىرى، تاريح عىلىمدارىنىڭ دوكتورى گۇلنار مەڭدىقۇلوۆا وسى سىندى ەڭبەكتەردىڭ ماڭىزىن ايتىپ ءوتتى.
«اسكەري ادامداردىڭ ايتۋىنشا، سوڭعى سارباز ۇيىنە جەتپەسە - سوعىس بىتكەن جوق دەگەن ءسوز. تاريحي دەرەكتەرگە سۇيەنەتىن بولساق، قازىرگى تاڭدا ەكىنشى دۇنيەجۇزىلىك سوعىسقا قاتىسقان قازاقتاردىڭ 350-600 مىڭى ءالى حابارسىز كەتكەندەردىڭ قاتارىندا بولىپ ەسەپتەلەدى. ءدال وسى ورايدا، ءبىرىنشى تومدا جاريالانعان تىزىمدەگى بىرنەشە مىڭ ادام تابىلىپ، قايتا ءوز ۇيلەرىنە ورالعانى تۋرالى ايتقىمىز كەلەدى» ، - دەدى گۇلنار مەڭدىقۇلوۆا.
اتالمىش زەرتتەۋ جۇمىسى ءپان ارالىق سيپاتقا يە جانە تاريحي عىلىم، اسكەري تاريح جانە الەۋمەتتىك عىلىمدار باعىتتارىن قامتيدى. جاريالانعان قۇجاتتار ستۋدەنتتەرگە، ماگيسترانتتارعا، دوكتورانتتارعا، عالىمدار مەن تاريحشىلارعا، اسكەريلەرگە جانە جالپى قازاقستان تاريحى مەن دۇنيەجۇزىلىك تاريحقا قىزىعۋشىلىق تانىتاتىن ادامدارعا ارنالعان.