ىلە- بالقاش رەزەرۆاتىندا تۇران جولبارىسى مەكەندەيتىن بولادى
بۇل تۋرالى بۇگىن قازاقستان باسپا ءسوز كلۋبىندا وتكەن باسپا ءسوز ءماسليحاتى بارىسىندا بەلگىلى بولدى.
تۇران جولبارىستارىن قازاق جەرىنە قايتارۋ ىسىنە اتسالىسىپ جۇرگەن ەرىكتى تيموفەي باننيكوۆتىڭ ايتۋىنشا، الداعى 5 -جىلدا جولبارىستارعا ارنالعان تەرريتوريادا كۇزەت، قورەك بازالارى دايىندالادى.
«الماتى وبلىسىنىڭ بالقاش كولىنىڭ وڭتۇستىك جاعالاۋىندا ەرەكشە قورعاۋداعى ايماق اشىلادى.
وسى ايماقتا تۇران جولبارىستارى جىبەرىلەدى. قازىر ءبىز اتالعان جوبانىڭ باستاپقى كەزەڭىندە تۇرمىز. العاشقى 5 جىل قورەك بازاسىن جاساۋعا جۇمسالادى. تەك 2023 -جىلعا تامان رەسەيدەن جولبارىستاردى قونىستاندىرامىز. باستاپقىدا رەسەيدەن 20-30 شاقتى جولبارىس اكەلىنىپ، ءارقايسىنىڭ موينىنا قامىت تاعىلادى. بۇل قامىتتار ارقىلى قاشىقتان ولاردىڭ قايدا جۇرگەنىن باقىلاۋعا بولادى. قامىتتاعى باتارەيا قۋاتى 1-1,5 -جىلعا جەتەتىن بولادى» ، - دەدى ت. باننيكوۆ.
اتالعان جوبانى جۇزەگە اسىرۋ ءۇشىن قازاقستاندا كراۋنفاندينگ الاڭى اشىلادى.
60 كۇنگە سوزىلعان كراۋدفاندينگتىڭ قورىتىندىسى بويىنشا 200000 2تەڭگە جيناۋ كوزدەلىپ وتىر. اتالمىش سوما مەكتەپ وقۋشىلارىنا ارنالعان ارنايى ءبىلىم بەرۋ كونتەنتتەرىن جاساۋعا جۇمسالادى.
بيولوگيا پانىنەن شىعارىلاتىن ماتەريالداردىڭ شىعارىلىمى وقۋشىلاردىڭ ءۇش جاس كاتەگورياسىنا ارناپ ەكى تىلدە جاسالادى.
تۇران جولبارىستارىن ەلىمىزگە قايتا ورالۋىن قالاعان كەز كەلگەن ادام www.start-time.kz. سايتىنا كىرىپ، قالاعان سوماسىن اۋدارا الادى. قوماقتى قاراجات كولەمىن اۋدارعان جاندارعا پلاتفورما تاراپىنان فۋتبولكا، توسبەلگى، سالپىنشاق اشەكەيلەر قاراستىرىلعان.
سونىمەن قاتار، تۇران جولبارىسى تۋرالى ارنايى سايت جاسالادى.
ايتا كەتۋ كەرەك، جىرتقىش اڭدار تورعا قامالمايدى. ولار جەرگىلىكتى حالىققا قاۋىپتى بولماس ءۇشىن «كونفليكتنىي تيگر» موبيلدىك قوسىمشاسى ىسكە قوسىلادى.
رەسمي مالىمەتتەرگە سۇيەنسەك، قازاقستان جەرىندە سوڭعى تۇران جولبارىسى 70 جىل بۇرىن ولگەن. بولاشاقتا قازاقستانداعى ىلە- بالقاش رەزەرۆاتىندا 200 تۇران جولبارىسى مەكەندەيتىن بولادى.