ەلىمىزدەگى بايلار مەن جۇلدىزدار تىكۇشاقتى تاكسي ءۇشىن قولداناتىن بولىپ شىقتى

 استانا. قازاقپارات - كوپشىلىك بارار جەرىنە جالدامالى تاكسيمەن جەدەل جەتۋگە ۇيرەنگەن. ەندى ەلىمىزدە قالادان-قالاعا ءاپ-ساتتە جەتۋدىڭ دە امالى تابىلدى.

كوپشىلىك پويىزعا بيلەت الىپ اۋرە-سارساڭعا تۇسپەي، تىكۇشاقتى نەمەسە ۇشاقتى جالعا الا الادى. سەبەبى ەلىمىزدە ۇشاق پەن تىكۇشاقتى «تاكسي» قىلىپ، ءناپاقا تاباتىندار پايدا بولعان دەپ جازادى «زامانا» باسىلىمى.

ءوز قىزمەتىن 2014-جىلى باستاعان ازاماتتار الماتىنى تىكۇشاقپەن 30 مينۋتقا ارالاۋدىڭ قۇنى 77 مىڭ تەڭگە ەكەنىن ايتتى.

«استانا بويىنشا قالا ىشىندە ۇشۋ قۇنى ادام باسىنا 55 مىڭ تەڭگە. ءبىر توپتا جەتى ادام بولادى. 20 مينۋتتىڭ ىشىندە استانانىڭ كورىكتى جەرلەرى سانالاتىن 40 شاقتى نىساندى بيىكتەن تاماشالاتىپ ۇلگەرەمىز.

ال الماتى بويىنشا 30 مينۋتتىق ساياحات قۇنى - 77 مىڭ تەڭگە. مۇندا ادام سانى بەسەۋدەن اسپايدى. ال قالا جانە مەملەكەتارالىق ۇشۋ باعاسى ارا قاشىقتىققا، ساعاتىنا، جولاۋشىلار سانىنا بايلانىستى بەلگىلەنەدى»، - دەيدى اتالمىش كومپانيانىڭ ديرەكتورى قايسار شىنىبايەۆ.

سونداي-اق اۋە تاكسيىنىڭ ديرەكتورى مۇنداي تاپسىرىستى كىمدەردەن قابىلدايتىنىن دا جاسىرماي ايتىپ بەرگەن.

«تاپسىرىس بەرۋشىلەردىڭ قاتارىندا ءتۇرلى بيزنەس وكىلدەرى، جۇلدىزدار، ينۆەستورلار مەن ءارتۇرلى دەلەگاتسيالار دا بار. سونداي-اق، وتباسىلىق ايتۋلى كۇندەرگە بايلانىستى رومانتيكالىق توسىنسىيلار مەن تۇرمىسقا شىعۋ تۋرالى ۇسىنىستار ۇيىمداستىرۋ ماقساتىندا دا تاپسىرىستار ءتۇسىپ جاتادى»، - دەدى قايسار شىنىبايەۆ.