ەۋروپا ليگاسى: «استانا» «رەننمەن» ەكىنشى جولداماعا تالاسادى

استانا. قازاقپارات - بۇگىن ەلوردالىق «استانا» فۋتبولدان ەۋروپا ليگاسى توپتىق كەزەڭىندەگى سوڭعى ويىنىن وتكىزەدى.

ولار فرانسيانىڭ «رەنن» كومانداسىمەن كەزدەسىپ، K توبىنداعى ەكىنشى جولداماعا تالاساتىن بولادى، دەپ حابارلايدى قازاقپارات ءتىلشىسى.

«استانا» بيىلعى ەۋروپا ليگاسى توپتىق كەزەڭىندەگى ويىندارىن ءساتتى باستاعان ەدى. الدىمەن 20- قىركۇيەكتە كيەۆتە جەرگىلىكتى «دينامومەن» 2:2 ەسەبىندە تارقاستى . ودان كەيىن ءوز الاڭىندا 4- قازاندا بۇگىنگى قارسىلاسى - فرانسيانىڭ «رەنن» كلۋبىن 2:0 ەسەبىمەن جەڭسە، سىرتتا 25- قازاندا چەحيانىڭ «يابلونەتس» كلۋبىمەن 1:1 ەسەبىمەن تەڭ وينادى. اتالمىش «يابلونەتسپەن» 8- قاراشادا ەلوردا تورىندە قارىمتا ويىن وتكىزىپ، بۇل كەزدەسۋدە ەلوردالىق كلۋب 2:1 ەسەبىمەن جەڭىسكە جەتتى . ال 29- قاراشادا ءبىزدىڭ فۋتبولشىلار كيەۆتىڭ «ديناموسىنان» 0:1 ەسەبىمەن جەڭىلىپ قالدى.

قازىر تۋرنير كەستەسىندە «استانا» 8 ۇپايمەن ەكىنشى ورىندا كەلەدى. ال «رەنن» كومانداسىنىڭ قورجىنىندا 6 ۇپاي بار. بۇگىنگى كەزدەسۋدە فرانسۋز كلۋبى جەڭىسكە جەتكەن جاعدايدا ەكىنشى ورىن سولاردىڭ ەنشىسىنە تيەدى. سونىڭ ناتيجەسىندە «رەنن» ەكىنشى جولداماعا قول جەتكىزەدى. ال ءبىزدىڭ «استانا» ءۇشىن كەم دەگەندە تەڭ ويىن جەتەدى. ءبىرىنشى جولداما كيەۆتىڭ «دينامو» كومانداسىنا ەرتەرەك بۇيىردى. ولاردىڭ ەنشىسىندە قازىر 11 ۇپاي بار.

«استانا» كومانداسى 29- قاراشادان باستاپ ەشقانداي رەسمي ويىن وتكىزگەن جوق. سول كۇنى ەۋروپا بىرىنشىلىگى توپتىق كەزەڭىندە كييەۆتىڭ «دينامو» كلۋبىمەن كەزدەكەنى بەلگىلى.

ەلوردالىق كلۋب بيىل بەسىنشى مارتە قازاقستان چەمپيونى اتاعىنا قول جەتكىزدى. «رەننمەن» كەزدەسۋگە دايىندىعىن ەرتە باستادى. ال 9- جەلتوقسان كۇنى كوماندا فرانسيانىڭ ءۇشىنشى ديۆيزيونىندا وينايتىن «شامبلي» فۋتبول كلۋبىنا قارسى جولداستىق كەزدەسۋ وتكىزدى. بۇل ويىندا ەلوردالىقتار 1:0 ەسەبىمەن جەڭىسكە جەتتى.

«ءبىزدىڭ جاقسى ناتيجەگە قول جەتكىزگىمىز كەلەدى. كوماندا الدىندا ۇلكەن ماقسات قويىپ وتىر. «استانا» كومانداسىنىڭ تۋرنيرلىك كەستەدەگى جاعدايى بىزدەن جاقسى. سوندىقتان بۇگىنگى كەزدەسۋ قيىن ويىن بولارى ءسوزسىز. دەگەنمەن، ءبىز ەرتەڭ جانكۇيەرلەردىڭ قولداۋىنا ۇلكەن سەنىم ارتامىز»، - دەيدى «رەنن» فۋتبول كلۋبى باس باپكەرىنىڭ مىندەتىن اتقارۋشى جيۋلەن ستەفان.

ەستەرىڭىزگە سالا كەتەلىك، بۇعان دەيىن «رەنن» كومانداسىنىڭ باس باپكەرى قىزمەتىن سابري ليامۋشي اتقارعان ەدى. كوماندا تىزگىنىن بيىلعى مامىر ايىندا ۇستاعان ول اتالمىش كلۋبتىڭ ەۋروپا ليگاسى مەن ەل بىرىنشىلىگىندە ءساتسىز ويىندارىنا بايلانىستى قىزمەتىنەن كەتتى.

ال «استانا» كومانداسى باس باپكەرىنىڭ مىندەتىن اتقارۋشى گريگوريي بابايان جانكۇيەر سەنىمىنەن شىعۋعا كۇش سالاتىنىن جەتكىزىپ وتىر.

بۇل كەزدەسۋ بۇگىن ساعات 23.55 تە باستالادى. اتالمىش ويىن «Qazsport» تەلەارناسىنان تىكەلەي ەفيردە كورسەتىلەدى. سونداي-اق، ءدال وسى كۇنى اتالمىش توپتاعى «دينامو» (كيەۆ) پەن چەحيانىڭ «يابلونەتس» كوماندالارى كەزدەسەدى.