كانادا سوتى حۋاۆەي باسشىسىن كەپىلگە بوساتتى
قىتاي ازاماتى ءارى Huawei كومپانياسىنىڭ نەگىزىن قالاۋشىنىڭ قىزى مىڭ ۋانجوۋدى كانادا بيلىگى ا ق ش- تىڭ سۇراۋى بويىنشا ۆانكۋۆەر اۋەجايىندا جەلتوقساننىڭ 1- كۇنى ۇستاعان.
ا ق ش بيلىگى مىڭ ۋانجوۋ ۆاشينگتوننىڭ يرانعا سالعان ساۋدا سانكسياسىن بۇزىپ، ساۋدا- ساتتىق جاساماقشى بولعان دەپ كۇدىكتەنەدى. وعان امەريكالىق بىرنەشە مەملەكەتتىك مەكەمەنى الداۋ ماقساتىندا قيتۇرقىلىق جاساعان دەگەن ايىپ تاعىلعان. Reuters اگەنتتىگى ا ق ش- قا ەكستراديتسيالانىپ، سوت ايىپتى دەپ تانىعان جاعدايدا مىڭ ۋانجوۋعا ۇزاق مەرزىمدى تۇرمە جازاسى تاعايىندالۋى مۇمكىن دەپ حابارلايدى.
ۆانكۋۆەر سوتى مىڭ ۋانجوۋدى 10 ميلليون دوللار كەپىل تولەپ بوساتىلعانىن، ونىڭ تاۋلىك بويى باقىلاۋدا بولاتىنىن جانە ەلەكتروندىق باقىلاۋ قۇرىلعىسىن تاعىپ جۇرەتىنىن حابارلادى.
Huawei باسشىسىنىڭ ۇستالۋى ا ق ش پەن قىتاي اراسىندا ونسىز دا شيرىعىپ تۇرعان ساۋدا- ساتتىق داۋىن ودان ارى كۇشەيتە ءتۇستى. بىرەر كۇن بۇرىن قىتاي سىرتقى ىستەر مينيسترلىگى ا ق ش پەن كانادا ەلشىلەرىن شاقىرتىپ، Huawei باسشىسىنىڭ ۇستالۋىنا قارسىلىعىن بىلدىرگەن.
ا ق ش پرەزيدەنتى دونالد ترامپ Reuters اگەنتتىگىنە قىتايمەن قارىم- قاتىناستى ودان ارى ۋشىقتىرماۋ ءۇشىن مىڭ ۋانجوۋدىڭ ۇستىنەن قوزعالعان ىسكە ارالاسۋعا دايىن ەكەنىن مالىمدەدى.
مىڭ ۋانجوۋ كانادادا وزىنە تاعىلعان ايىپ بويىنشا كىنالى ەمەسىن، ا ق ش- قا ەكستراديتسيالانعان جاعدايدا سوتتا ونى دالەلدەيتىنىن مالىمدەگەن.
Huawei يرانداعى وپەراتسيالارىن «قولدانىستاعى زاڭدارعا، ا ق ش، ەۋروپا وداعى مەن ب ۇ ۇ سانكسيالارىنا ساي جۇرگىزگەنىن» ايتادى.
www.azattyq.org