تۇركىستان وبلىسىندا تۇڭعىش رەت «دەنساۋلىق ەلشىسى» اتاعى بەرىلدى
وبلىستىق دەنساۋلىق ساقتاۋ باسقارماسى باسشىلىعى مەن سالاۋاتتى ءومىر سالتىن قالىپتاستىرۋ ورتالىعىنىڭ ۇيىمداستىرۋىمەن وتكەن شاراعا پراگا قالاسىنداعى حالىقارالىق ءبىلىم بەرۋ ينستيتۋتىنىڭ ديرەكتورى، پروفەسسور مارينا كانۋشينا جانە قازاق تاعام تانۋ اكادەمياسىنىڭ عالىمى مايگۇل قايناربايەۆا قاتىستى، دەپ حابارلايدى قازاقپارات ءتىلشىسى.
حالىقارالىق كونفەرەنسيادا سونداي-اق ءوڭىردىڭ مەديتسينا مەكەمەلەرىنىڭ باسشىلارى مەن دەنساۋلىق ساقتاۋ سالاسىنىڭ وكىلدەرى دە بولدى. شارا بارىسىندا تۇڭعىش رەت «دەنساۋلىق ەلشىسى» اتاعى بەرىلدى.
وڭىردە سالاۋاتتى ءومىر سالتى قاعيدالارىن ناسيحاتتايتىن ەلشىلەر اتاعىنا تاەكۆاندودان ق ر حالىقارالىق دارەجەدەگى سپورت شەبەرى، 2018-جىلى جاكارتادا وتكەن جازعى ازيا ويىندارىنىڭ قولا جۇلدەگەرى، الەم كۋبوگىنىڭ قولا جۇلدەگەرى نۇرلان سايلاۋباي ۇلى مەن وبلىستىق ءماسليحاتتىڭ دەپۋتاتى مۇرات شەرىم ۇلى، «بىزبەن بىرگە!» ەرىكتىلەر مەكتەبىنىڭ ءتورايىمى جاسمين اسقار قىزى مەن وبلىستىق كلينيكالىق اۋرۋحانانىڭ حيرۋرگيالىق كومەك جونىندەگى ورىنباسارى جانبولات بەردىباي ۇلى يە بولدى.
«سالاۋاتتى ءومىر سالتىن دارىپتەۋگە اتسالىسۋ اركىمنىڭ ءوز قولىندا. ءبىز بۇل ماسەلەگە باسا نازار اۋدارۋىمىز قاجەت. وڭىرىمىزدە اۋرۋحانا، ەمحانا سانى ارتقانىمەن، بۇل اۋرۋدىڭ ازايۋىنا الىپ كەلمەيدى. سوندىقتان ۇلت ساۋلىعىنىڭ تەتىگى - سالاۋاتتى ءومىر سالتىن ۇستانۋدى ماقسات تۇتۋعا مىندەتتىمىز»، - دەدى تۇركىستان وبلىستىق دەنساۋلىق ساقتاۋ باسقارماسىنىڭ باسشىسى مۇقان ەگىزبايەۆ.
جاڭا تيتۋل يەلەرى الداعى ۋاقىتتا حالىقتىڭ سالاۋاتتى ومىرگە بەت بۇرۋىنا باعىتتايتىن ءىس-شارالارعا ۇلەس قوسىپ جاڭا سەرپىلىس بەرمەك. سونىمەن قاتار جيىنعا قاتىسۋشىلار «پايدالى ونىمدەر» كورمەسىنىڭ جۇمىسىمەن تانىستى.