ەلىمىزدەگى ازىق-تۇلىك ونىمدەرى باسقاشا تاڭبالانۋى مۇمكىن

الماتى. قازاقپارات - الماتىدا وتكەن «ازىق تۇلىكتەردىڭ قاۋىپسىزدىگى مەن تاڭبالانۋى» فورۋمىندا ازىق-تۇلىكتەردى جاڭا ادىسپەن تاڭبالانۋى قاجەتتىلىگى تۋرالى ايتىلدى، دەپ حابارلايدى قازاقپارات ءتىلشىسى.

بۇگىندە قازاقستاندا تۇتىنۋشىلار ءۇشىن ازىق-تۇلىك بويىنشا تاڭداۋ زور. الايدا كەز-كەلگەن ازىق- تۇلىكتىڭ قولدان جاسالعان تۇرلەرى دە تارالىپ جاتىر. ءتىپتى وتاندىق وندىرۋشىلەر دە كەيدە ەرەجە ساقتامايدى.

«قازىر ق ر د س م قوعامدىق دەنساۋلىقتى ساقتاۋ كوميتەتىندە ءبىرقاتار زەرتحانا ادىستەرى جاسالىپ جاتىر. ونى ازىق- تۇلىك جەتكىزۋشىلەرى دە بىلەدى. بۇگىن ءبىر ازىق- تۇلىكتى تەكسەرۋ ءۇشىن توكسيكولوگتار، حيميكتەر، بيوحيميكتەر، ميكروبيولوگتار جۇمىلدىرىلادى. ازىق-تۇلىك يندۋسترياسى قازىر قارىشتاپ دامىپ كەلەدى. ءتۇرلى تەحنولوگيالار، دامدەۋىشتەر، حوش يىستەندىرگىشتەر جاسالىپ جاتىر. سونىڭ بارلىعىن زەرتتەۋ ءۇشىن جاڭا ادىستەمەلەر ەنگىزۋگە، جاڭا زەرتحانالار اشۋعا تۋرا كەلەدى»، - دەدى ق ر د س م قوعامدىق دەنساۋلىقتى ساقتاۋ كوميتەتىنىڭ ءتوراعاسى جانداربەك بەكشين.

ونىڭ ايتۋىنشا، قازىر ەلدە ازىق-تۇلىك نورمالارى بەلگىلەنگەن.

تاماقتا گ م و %9-دان اسپاۋى كەرەك. تاڭبالاۋ ماسەلەسىنە كەلگەندە ورتاق تالاپتار بار. ءبىراق جاڭا تالاپتاردى ەنگىزەتىن ۋاقىت جەتتى. بۇل ءبىرىنشى كەزەكتە تۇتىنۋشى ءۇشىن اسا قاجەت، سەبەبى ول ءونىم تۋرالى اقپاراتتى تولىق الۋعا قۇقىلى.

«بۇگىندە بىزدە اقپاراتتىق قۇرامى جوق لەيبلدار وتە كوپ. شريفتتەردىڭ ۇلكەندىگى ول وزىنشە بولەك اڭگىمە. ماسەلەن، مايدا ءشريفتتى تۇتىنۋشى تەك لۋپامەن وقي الادى. ول، ارينە، ىڭعايسىز. تاڭبالاۋدىڭ جاڭا تالاپتارى تالقىلانىپ جاتىر. قاۋىپسىزدىك تۋرالى اقپاراتتى تۇتىنۋشى تولىق الا الاتىن جاعدايعا كوشۋىمىز كەرەك»، - دەدى باس سانيتارلىق دارىگەر.

مەملەكەتتىك ورگاندار وتاندىق وندىرۋشىلەردىڭ ونىمدەرىن قۇرامىنداعى زاتتارعا قاراي ماركەلەمەك.

«قازىر ءتۇس ارقىلى ماركەرلەۋ ماسەلەسى تالقىلانىپ جاتىر. جاسىل، قىزىل، سارى ءتۇس. بۇل تۇستەر ءونىمنىڭ قۇرامىندا زياندى زاتتار كوپ دەگەندى بىلدىرمەيتىن بولادى. جاسىل بولسا، كومىرسۋتەك، قانت، تۇز تاعى باسقا زاتتارى از دەگەندى بىلدىرەدى. ەگەر قىزىل ءتۇس بولسا، ماكسيمالدى كونتسەنتراتسيا بار دەگەن ءسوز. سارى ءتۇس جاسىل مەن قىزىلدىڭ اراسى دەگەندى بىلدىرەدى. تاڭبالانۋ ءتۇسى ءونىمنىڭ زياندى بولماسا پايدالى ەكەندىگىن بىلدىرمەيدى. ءبىز ەڭ الدىمەن قانت، تۇز، مايلار، كومىرسۋتەكتەردى بەلگىلەيتىن بولامىز»، - دەدى ول.

باس سانيتار دارىگەردىڭ ايتۋىنشا، تەك شيكىزاتتان وڭدەلگەن ازىق- تۇلىكتەر عانا قايتا تاڭبالانۋى ءتيىس. شيكى ونىمدەر، ەت، كوكونىس، جەمىستەر تاڭبالانبايدى.

«تەك وتاندىق ءوندىرىس ونىمدەرى عانا ماركەرلەنەدى. ەگەر ءبىز وسىندا ۇلتتىق قۇجات جاساساق، كەيىنىرەك بۇل نورما شەتەلدەن ەنگىزىلەتىن ونىمدەرگە دە جاسالادى»، - دەدى بەكشين.

ونىڭ ايتۋىنشا، بۇل ماسەلە ەۋرازيا ەكونوميكالىق وداعىنىڭ الاڭىندا تالقىلانىپ جاتىر.