تىنىق مۇحيتى جانۋارلارى ىشىنەن قوقىس تابىلدى
مۇنى انىقتاعان عالىمدار 100 تاسباقاعا زەرتتەۋ جاساعان. ەكسەتەر مەن پليمۋت ينستيتۋتتارىنىڭ تەڭىز زەرتحاناسىندا جۇرگىزىلگەن جۇمىس بارىسىندا جانۋارلار ىشىنەن 800 سينتەتيكالىق بولشەك شىققان. بۇل شىندىعىندا 20 ەسە كوپ بولۋى مۇمكىن دەگەن دە بولجام بار. قالدىقتار قاتارىندا ماشينا دوڭگەلەگىنىڭ بولىكتەرى، تەمەكى، ماتا، ءجىپ تاعى دا وزگە زاتتار بار. جالپى، تىنىق مۇحيتىندا ءتۇرلى انتروپوگەندى قوقىستار مەن قالدىقتاردان جيىلعان ۇلكەن قوقىس ارالى بار ەكەنى بەلگىلى. ءبىراق، بۇل اقپاراتقا وسى كۇنگە دەيىن جەتكىلىكتى دەڭگەيدە كوڭىل بولىنبەي كەلدى.
الەم جۇرتشىلىعى جاقىندا انىقتالعان تىڭ دەرەكتەر وسى ولقىلىقتى جوياتىنىنا ۇمىتتەنەدى. Scientific Reports باسىلىمىندا جاريالانعان ماقالا ارالداعى پلاستيكا سانى 1,8 تريلليون ەكەنىن كورسەتكەن. بۇل عالىمدار بولجاعان مولشەردەن 16 ەسە كوپ. ال، ونىڭ جالپى كولەمى 1,6 ميلليون شارشى شاقىرىمعا جۋىقتايدى. «ءبىز قوقىستان جيىلعان ارالدىڭ ناقتى كولەمىن بىلگەن كەزدە قاتتى تاڭعالدىق»، - دەيدى ەكسپەديتسيانىڭ باس مامانى دجۋليا رەيسسەر. ال، ونىڭ كومەكشىسى بويان سلات ارالدىڭ باسىم بولىگىن پلاستيكا قۇرايتىنىن ايتادى. ءبىر قىزىعى، بۇل ارالدىڭ كولەمى فرانسيا مەملەكەتىنەن ەكى ەسە ۇلكەن ەكەنى بەلگىلى بولعاندا، بىرنەشە ادام قوقىس ارالىن جەكە مەملەكەت دەپ مويىنداۋ يدەياسىن ۇسىنعان ەدى. ولار رەسمي بەكىتىلمەگەن مەملەكەتتىڭ ءوز قۇجاتىن، ۆاليۋتاسى مەن ماركالارىن ويلاپ تاپقان.
Massaget.kz