ەلباسى قازاقستان يرانمەن قاي سالالاردا قاتىناستاردى كەڭەيتەتىنىن ايتتى
بۇگىن اقوردادا ءبىرقاتار شەت ەلدەردىڭ قازاقستانعا جاڭادان تاعايىندالعان ەلشىلەرىنەن سەنىم گراموتاسىن قابىل الۋ سالتاناتتى شاراسىندا ەلباسى نۇرسۇلتان نازاربايەۆ وسىلاي ءمالىم ەتتى، دەپ حابارلايدى قازاقپارات ءتىلشىسى.
«ءبىز يران يسلام رەسپۋبليكاسىن ايماقتاعى ماڭىزدى سەرىكتەسىمىز رەتىندە قاراستىرامىز. وسى ەلمەن ءتيىمدى ىنتىماقتاستىق اياسىن كەڭەيتۋگە، اسىرەسە، كولىك پەن ترانزيت، اۋىل شارۋاشىلىعى، مەتاللۋرگيا سالاسىندا جانداندىرۋعا مۇددەلىمىز. اقتاۋدا قول قويىلعان كاسپي قۇقىقتىق مارتەبەسى تۋرالى كونۆەنتسيا ەلدەرىمىزدىڭ ءوزارا ىنتىماقتاستىعىن نىعايتۋعا ودان ءارى وڭ سەرپىنىن تيگىزەتىنى بەلگىلى»، - دەپ توقتالدى مەملەكەت باسشىسى.
سونىمەن قاتار پرەزيدەنت قازاقستان يراننىڭ يادرولدىق باعدارلاماسىنا قاتىستى حالىقارالىق كەلىسىمنىڭ ساقتالۋىن، ونىڭ ارى قاراي ءتيىمدى ىسكە اسىرىلۋىن قۇپتايتىندىعىن اتاپ ءوتتى.
بۇدان بۇرىن حابارلانعانداي، مەملەكەت باسشىسىنا اۋعانستان ەلشىسى موحامماد فراحاد ازيمي، قىرعىزستان ەلشىسى جەەنبەك كۋلۋبايەۆ، ليتۆا ەلشىسى گينتاۋتاس ۆاسيۋليس، يران ەلشىسى مادجيد سامادزادە سابەر، ارمەنيا ەلشىسى گاگيك گالاچيان سەنىم گراموتاسىن تابىس ەتتى.