اكىم تارازي. ءۇش ءجۇز جازۋشىنىڭ ىشىندە، كوپ بولسا التاۋى تالانتتى

 استانا. قازاقپارات - (جالعاسى. باسى مىنا جەردە) بۇل كۇندە سەكسەننىڭ سەڭگىرىنە شىققان ادەبيەتىمىزدىڭ ابىزى اكىم تارازي مەن الاشتىڭ اياۋلى قالامگەر قىزى روزا مۇقانوۆانى بىلايعى جۇرتقا تانىستىرىپ جاتۋدىڭ ءوزى ارتىق. ولاردى تۇيىستىرگەن دە، توعىستىرعان دا - تاعدىر.

روزا مۇقانوۆا: ادامدى اينىماي جاقسى كورۋگە جانە سەنۋگە بولا ما؟

اكىم تارازي: ەگەر ابدەن سىناپ العان بولساڭ، وعان شەكسىز بەرىلۋىڭ كەرەك. شەكسىز سەنۋىڭ كەرەك. ونىڭ ءبارى - تاڭداۋ. مەن سەنى تاڭداپ ۇيلەندىم. ءبىراق قىزىققانىمدى دا بىلەسىڭ. سەنى العاش كورگەندە: «شىركىن- اي، اناۋ قىز مەنىڭ جارىم بولسا عوي!»، - دەدىم. ول كەزدە سەگىز جىل بويداق بولىپ جۇرگەم.

روزا مۇقانوۆا: سوندا مەنىڭ سىزگە تۇرمىسقا شىعاتىنىما سەندىڭىز بە؟

اكىم تارازي: كۇماندانعان جوقپىن. سەنى دەكانىڭ تانىستىرعاندا «بىلەم عوي بۇل كىسىنى» دەگەن ءسوز قايدان شىقتى دەپ ويلايسىڭ؟

روزا مۇقانوۆا: ءيا، ءبىرىنشى رەت كورىپ تۇرىپ «بۇل كىسىنى بىلەم عوي» دەدىڭىز. نەگە بىلمەي تۇرىپ «بىلەمىن» دەدىڭىز ەكەن؟

اكىم تارازي: رەكتورلارىڭ مەنى ستۋدەنتتەرمەن كەزدەسۋگە شاقىردى. انانداي بۇرىشتا وتىرعان جەرىڭنەن كوردىم. «شىركىن- اي، اناۋ قىز ماعان تيسە الار ەدىم» دەگەن وي اللادان كەلدى دەپ ويلايمىن.

روزا مۇقانوۆا: توبەلەسكىش بولعانىڭىزدى ماقتانىشپەن ايتاتىن سياقتىسىز. سىرى نە؟ .. قازاق بالالارىنىڭ قورلانۋىنا، باسقا ۇلتتىڭ ۇستەمدىگىنە دەگەن ىشكى قارسىلىق پا؟ سونداعى توبەلەستەردىڭ ءمانى نە؟

اكىم تارازي: ول كەزدە الماتىدا قازاق سەگىز- اق پايىز بولاتىن. ءبىر كۇنى الماتىنىڭ تاۋ جاعىنا بارىپ، قايتىپ كەلە جاتسام ءبىر ورىس ايەل بالاسى ەكەۋى سەرۋەندەپ ءجۇر ەكەن. بالاسى مەنى كوردى دە قۇلاعى تىكىرەيگەن ات سياقتى تۇرا قالدى. «ماما، ماما ون نەمەتس چتو لي؟»، - دەدى مەنى كورسەتىپ. ماماسى: «نەت سىنوك. ەتو نازىۆاەتسيا كازاحي. ناشا رەسپۋبليكا نازىۆاەتسيا كازاحستان» دەدى...

روزا مۇقانوۆا: ادام تانيسىز. كوپ ادامدى جانىڭىزعا جاقىنداتقىڭىز كەلمەيدى. كوپ جەرگە بارۋدان باس تارتاسىز. مەنەن دە سول مىنەزدى تالاپ ەتەسىز. ولاي ءومىر ءسۇرۋ قيىن ەمەس پە؟

اكىم تارازي: سەن دە ادام تانيسىڭ، بىرىنشىدەن. ەكىنشىدەن، مەن قيىن دەپ ويلامايمىن، سونىما قۋانامىن. ءوزىڭ بىلەسىڭ عوي، مەن دوستارىمدى ءوزىم تاڭداعانمىن. ولار مەنى ەشۋاقىتتا ساتقان ەمەس. مەن دە ولاردى ساتقان ەمەسپىن.

قاليحان، سايىن، رامازان - وتىرا قالىپ، ءبىر ءبىرىمىزدىڭ كىتاپتارىمىزدى وقىپ، كۇلىپ سىنايتىنبىز. توبەلەسىپ قالاتىنبىز. ءبىراق ءزىل جوق، ەرتەسىندە قايتا تابىسىپ جۇرە بەرەتىن ەدىك.

مەن جازىپ وتىرعاندا ويلايتىنمىن: «مىناۋىم قاليحانعا ۇناماي قالاماي ما»، - دەپ. قاليحان دا ايتتى: «تاڭ اتقانشا جۇمىس ىستەدىم، (مەنى كوكەم دەيتىن) كوكەمە مىنا جەرى ۇناماي قالار ما ەكەن»، - دەيتىن.

روزا مۇقانوۆا: وتكەندە اراعا 17 جىل سالىپ قابدەش ءجۇمادىلوۆ دوسىڭىزبەن كەزدەستىڭىز. سوندا قابدەش اعانىڭ ءبىر سوزىنە تاڭ قالدىم: «ءبىزدى «ايىرىلماس بەس تاپال» دەيتىن ەدى. قۇشاعىمىز ايىرىلماي جۇرگەن كەزدە ايتاتىن ەدىڭ اكىم: «ءالى ءبىر ءبىرىمىزدى كورمەستەي بولىپ كەتەتىن ساتتەر بولادى، بۇلاي جۇرە بەرمەيسىڭدەر. ءتۇبى بەسەۋمىز بەس جاققا كەتەتىن بولامىز»، - دەگەنسىڭ. سول كەزدە ءبىز وزىڭە قاتتى رەنجيتىن ەدىك. داۋلاساتىن ەدىك. «ءبىزدى اجال ايىرماسا، وسى قۇشاعىمىز اجىراماعان كۇيى قالامىز»، - دەيتىنبىز. سەن اۋليە ەكەنسىڭ، شىنىندا دا ءبىز ۋاقىت وتە كەلە ءبىر- بىرىمىزبەن ارالاسۋدى قويىپ، ءبىر- ءبىرىمىزدى ىزدەمەي كەتتىك. سەنىمەن مىنە 17 جىلدان كەيىن كەزدەسىپ وتىرمىن. سول بەس دوستىڭ ىشىندە تازاسى ءوزىڭ ەدىڭ، اكىم. تازا بولىپ سول بويى قالدىڭ»، - دەدى.

 

اكىم تارازي، قابدەش ءجۇمادىلوۆ، سايىن مۇراتبەكوۆ

اكىم تارازي: باسقالارى ومىردەن ءوتىپ كەتتى عوي. ولار بولسا ءبىزدىڭ ۇيدەن شىقپايتىن ەدى عوي، شىركىن... ءبارىمىز تازا ەدىك، تازا بولماساق ادەبيەتتىڭ تاريحىندا اتىمىز قالار ما ەدى.

روزا مۇقانوۆا: سايىن اعا ءال ۇستىندە جاتقان كەزدە بيلىكتەگىلەرگە جول تاۋىپ: «سايىنداي كلاسسيكتىڭ مەملەكەتىك سىيلىقتى الماي كەتۋى - بىزگە دە سەندەرگە دە سىن. ەرتەڭ ۇياتقا قالمايىق»، - دەپ دوسىڭىزعا سىيلىقتى الىپ بەرۋگە مۇرىندىق بولعانىڭىزدى بىلەمىن.

اكىم تارازي: ءيا، مەن سول كەزدە كوميتەتتىڭ ءتوراعاسى بولاتىنمىن. ءبىراق مەنەن باسقا 15 ادام بار، كوپشىلىك بولىپ شەشەتىنبىز. كەيدە مەن ايتىپ وتىرسام دا، باسقالار كونبەسە، بەرىلمەيتىن. سايىن دۇنيەدەن وتەيىن دەپ جاتقانىن ءبىلدىم. رامازانعا دا دۇنيەدەن كەتەيىن دەپ جاتقاندا الىپ بەردىك. «ءاي جىگىتتەر، مىناۋ دۇنيەدەن ءوتىپ كەتەيىن دەپ جاتىر. انە- مىنە. ەڭ بولماسا ءبىلىپ كەتسىن»، - دەدىم. ونىڭ ۇستىنە ەكەۋى دە تالانتتى عوي.

سايىنعا بارىپ: «سەن مەملەكەتتىك سىيلىقتى الدىڭ، سەنى قۇتتىقتاپ كەلدىم»، - دەدىم. اقىرىن عانا باسىن يزەدى. رامازان دا ءسويتتى.

روزا مۇقانوۆا: تالانتتى تۇلعالار مەن جولبيكەلەر تۋرالى جازعان كۇندەلىگىڭىزدە: «دارىنسىزدار بىرىكسە، تەك قانا قيانات تۋادى. تالانت دەگەن ءسوزدىڭ بالاماسى - جالقى. تالانتتار باسى قوسىلسا دا جىمداسىپ كەتپەيتىنى سوندىقتان»، - دەيسىز؟

اكىم تارازي: دۇرىس قوي، تالانتتى ادامدار ءبىر- بىرىنە كونكۋرەنت. باسەكەلەس. سەن جاقسى جازساڭ، ول دا جاقسى جازادى. ال دارىنسىزدار ونداي كەزدە بىرىگە قالادى. بىرىككەندە، تالانتتى ءسۇرىندىرۋ ءۇشىن بىرىگەدى. سەبەبى، ولار دارىنسىز جانە كوپ. ءۇش ءجۇز جازۋشىنىڭ ىشىندە، كوپ بولسا التاۋى تالانتتى. ارى كەتسە ون.

روزا مۇقانوۆا: وندا تالانتتارعا ءومىر ءسۇرۋ قيىن ەكەن.

اكىم تارازي: قيىن. جازۋشىلار وداعىنا سايلاۋعا تۇسكەن ءبىر جىگىت (اتىن ايتپاي قويايىن) ەلدى ارالاپ ءجۇرىپ، وزىنە داۋىس بەرەم دەپ ۋادە ەتكەن جۋرناليستەردىڭ كوپشىلىگىن مۇشەلىككە الدى. مەن دە حاتشىمىن. وداق باسشىلارىنىڭ ءبىرىمىن. ايتتىم: «وسىنشا كوپ ادامدى نەگە الاسىڭ؟ »، - دەدىم. «كوكە، مەن ءوتۋىم كەرەك قوي»، - دەدى ول. انالاردى الدى. ءبىر اپتادان كەيىن سيەزد بولدى. الىپ كەلگەن ادامدارى قولداپ، قايتادان 5  جىلعا وتىردى. مەن ونى دا كىنالامايمىن. جاقسى جىگىت ەدى.

روزا مۇقانوۆا: مەنىڭشە، سىزدەر تەك قانا حاتشى بوپ جۇردىڭىزدەر عوي؟

اكىم تارازي: جوق، مەن ايلىق الاتىن حاتشى بولدىم. ونىڭ الدىندا كينوگەرلەر وداعىن 16 جىل باسقاردىم، ودان كەيىن ەكى جىلعا دەمالۋعا كەتىپ قالدىم. قايتىپ كەلسەم، ورنىم بوس ەمەس ارينە، وعان تالاسىپ جاتقان مەن جوق. تاعى ەكى جىل ءجۇردىم جازامىن دەپ، قايتا قۋاندىم. جازدىم. انا 9 توم تەگىننەن تەگىن جازىلعان جوق قوي.

روزا مۇقانوۆا: ءسىزدىڭ 90 -جىلدارى حاتشىلىقتان ءوز ەركىڭىزبەن كەتكەنىڭىز ەسىمدە؟

اكىم تارازي: سوندا مەنى «دۋراك» دەگەندەر دە بولدى. مىنانداي دەپۋتاتسكي قىزىمەتتى تاستاپ كەتۋگە بولا ما دەپ...

روزا مۇقانوۆا: جالپى، وسى ءسىز قىزمەتتى ەمەس قىزمەت اكىمدى قۋىپ ءجۇردى عوي دەيمىن، دوستارىڭىز ىلعي وسىلاي ازىلدەيتىن.

اكىم تارازي: ءيا، ءسويتتى... شاكەن اعا كەتكەسىن كينوعا ءبىرىنشى حاتشى بولدىم. ەكى رەت جۇمىستان كەتەم دەپ ارىز بەردىم، جىبەرمەدى. ول كەزدە ديمەكەڭنىڭ ايتقانى زاڭ. ەسەناليەۆ دەگەن كىسى شاقىرىپ الىپ ايتتى: «ديمەكەڭ سەنى قايتادان ۇسىنىپ وتىر. قالاي قارايسىڭ؟ »، - دەپ. «ەندى ديمەكەڭ ۇسىنسا ءبىر كوندىم، ەكى كوندىم. سوڭىندا مەن جازا الماي قالام عوي...» ، - دەدىم. جەتەكتەپ الىپ باردى ديمەكەڭنىڭ الدىنا: «كونبەي قويدى، مىناۋ اكىم»، - دەدى. ديمەكەڭ: «ءاي، ءۇرتايدىڭ بالاسى، كەلىسىمىڭدى بەر. اكەڭدى ورىنبوردان بىلەتىن ەدىم!»، - دەدى. اكەمدى بىلەدى ەكەن.

روزا مۇقانوۆا: اكەڭىز ورىنبوردا وقىعان العاشقى قازاقتاردىڭ ءبىرى عوي.

اكىم تارازي: ءيا، «تاعى دا ءبىر بەس جىل كون ەندى، شىدا» دەدى. سونىمەن 16 جىل سوندا جۇمىس ىستەدىم.

روزا مۇقانوۆا: ءسىزدىڭ ءومىربايانىڭىز ادام قىزىعاتىنداي. عابيت مۇسىرەپوۆ، شاكەن ايمانوۆ، ءماجيت بەگالين، سۇلتان قوجىقوۆتار ۇستازىڭىز بولدى. بۇلاردىڭ ءبارى ەركەلەتتى ءسىزدى. قازاقشا ايتقاندا ءوز بىلگەنىڭىزدى جاساي الدىڭىز. كىمگە كومەكتەسەم، قانداي كينو تۇسىرەم دەسەڭىزدەر تۇسىرە الدىڭىزدار. ساتىبالدى نارىمبەتوۆ ءبىر سۇحباتىندا: «مەن اكىم اعانى ءوزىنىڭ ۇستازى عابيت مۇسىرەپوۆكە ۇقساتامىن»، - دەپتى. كەلىسەسىز بە؟

اكىم تارازي: كەلىسەمىن. مىنەز جاعىنان. ول كىسى ەش ۋاقىتتا اسىقپايتىن. الدىنا ءبىر پروبلەمامەن بارامىز: «اناۋ مۇنداي بوپ جاتىر. اناۋ يتتىك جاسادى»، - دەپ. سوندا عابەڭنەن ۇيرەنگەنىم. ەش ۋاقىتتا «ءيا» دەپ باسىن يزەمەيتىن. «دۇرىس، كەيىن ايتام»، - دەيدى. سەبەبى، ويلانۋ كەرەك.

روزا مۇقانوۆا: مەن ءسىزدىڭ وسىنداي جاۋابىڭىزعا كۇيىنىپ كەتەتىنمىن. قازىر شەشىلەتىن، وتباسىلىق ماسەلەنىڭ ءوزىن: «ويلانايىن، كەيىن»، - دەگەندە، وسى شىجعىرىلىپ، قينالىپ كەتەتىنمىن. سونىڭ ءبارى عابيت اعايدىڭ قاسيەتى ەكەن عوي.

اكىم تارازي: ءيا، عابيت، شاكەن ايمانوۆ تا سولاي بولدى. ەكى بىردەي ۇستازىمنان ۇيرەندىم عوي.

روزا مۇقانوۆا: كوكە! تولستويدى، چەحوۆتى، لەرمونتوۆتى، پۋشكيندى قولىڭىزدان تاستامايتىنسىز. وسىلار ءسىزدىڭ جازۋ ۇستەلىڭىزدە ۇنەمى تۇراتىن. قايتا- قايتا وقىپ، ءالسىن- ءالسىن قاراپ، رۋحاني ۇستازىڭىزداي مەدەۋ تۇتاتىنسىز. كەيىن تاۋەلسىزدىك جىلدارىندا گۋميليەۆ پەن بيچۋريندى اينالدىردىڭىز. گۋميليەۆتى وقىپ- وقىپ، بيچۋرينگە كەلگەن كەزدە: «بيچۋرين گۋميليەۆتىڭ اكەسى ەكەن عوي»، - دەگەنىڭىز ەسىمدە. بەرتىن كەلە 80-گە اياق باسقان كەزدە «اندرەيدى» جازدىڭىز. وزگەشە جول تاپقانداي شىعارماشىلىعىڭىزدى جاڭا قىرىنان كورسەتتىڭىز. «تاڭشىقاي» دەگەن رومان جازدىڭىز. ەندى مىنە 85-كە اياق باسقاندا بايقايمىن، تەك قانا ءوزىڭىزدى وقيتىن بولىپسىز، ءوزىڭىزدىڭ 10 تومدىعىڭىزدى استىن سىزىپ، لەپ بەلگىسىن قويىپ، جانىنا كەيبىر ويلارىڭىزدى جازىپ، وقىپ ءجۇرسىز. بۇل جازۋدان جالىعۋ ما، بۇنىڭ سىرى نەدە؟

اكىم تارازي: ءوزىڭ بىلەسىڭ، مەن جازباي كەتكەنىمە 5 جىلداي ۋاقىت بولدى. سەبەبى مەن ءوزىمنىڭ تالانت رەتىندە تاۋسىلعانىمدى ءبىلدىم. ەندى جازسام قايتالايمىن دەپ قورقام. قايتالاۋ - ۇيات. «اندرەي» سوڭعى جازعان شىعارمام. ونىڭ ءوزى شاتاق. استارىندا قازاقتىڭ قالاي اشتىقتان قىرىلعانىن ايقىن ايتۋىم كەرەك بولدى. باس جاعىندا مانانا تۋرالى ءجاي عانا ايتىپ وتىرىپ، ەرتەڭ شىعارمانى باساتىن ادامدى الداۋىم كەرەك بولدى. ءبىزدىڭ سوڭىمىزعا ءتۇسىپ وقيتىن ادامدار جالقاۋ بولادى. تالايىن كوردىم، مىنەزىن بىلەمىن. ۇستىمىزدەن ارىز جازادى. ونىسىن ءبىلىپ ءجۇرىپ مەن ولاردى جاقىنداتىپ ءجۇردىم. ولار مانانا تۋرالى باسىن وقىپ وتىرىپ، ءاي مىنا اكىم نە ساندىراقتاپ وتىر دەۋى مۇمكىن. سودان بارىپ بىرتە- بىرتە قازاقتىڭ قالاي اشتىققا ۇشىراعانىن، قىرىلعانىن جازدىم...

روزا مۇقانوۆا: ۇلتقا جاساعان وزبىرلىق سىندى مۇنداي تاقىرىپ كەڭەس ۇكىمەتى كەزىندە دە ساناڭىزدىڭ تۇكپىرىندە جاتقان بولار. ءبىراق ول كەزدە جازىلمادى. وسىنداي شىعارمالار، سيۋجەتتەر جۇرەگىڭىزدىڭ تۇكپىرىندە كوپ قالعان جوق پا؟

اكىم تارازي: قالىپ قويعان جوق دەپ ويلايمىن. جازۋدى قويعانىما 5 جىلداي ۋاقىت بولدى. سەبەبى مەن جازارىمدى جازعان اداممىن. وكىنىشىم جوق. سوڭعى جازعان «اندرەيدەن» كەيىن ويلادىم، ەندى جازۋدىڭ كەرەگى جوق. قازاق حالقىنىڭ قالاي قىرىلعانىن جازدىم.

روزا مۇقانوۆا: ءسىزدى تىڭداپ وتىرىپ، فاريزا اپايدىڭ ءبىر اڭگىمەسى ەسىمە ءتۇسىپ وتىر. ءومىرىنىڭ سوڭعى كەزىندە ادەبيەتىمىزدىڭ ءىرى تۇلعاسى فاريزا اپاي وڭعارسىنوۆامەن كوپ سىرلاس بولدىق. ول كىسى ءبىر اڭگىمەسىندە. مەن «ەگەمەن قازاقستانعا» ءبىر توپ ولەڭدەرىمدى بەرىپ ەدىم، كەشكىسىن رىمعالي نۇرعالي تەلەفون شالدى. سوندا ايتقانى «فاريزا، ولەڭدەرىڭدى وقىپ شىقتىم، سەن بۇدان بىلاي ولەڭ جازارسىڭ، ءبىراق جاريالاۋعا بەرمەي- اق قوي. ويتكەنى، قازاق پوەزياسىن بيىك دەڭگەيگە كوتەرگەن فاريزا ەندى مىنانداي ولەڭ جازىپ، ءوز بەدەلىن ءوزى تۇسىرمەسىن» دەگەنى. روزاجان، سودان بەرى مەن جازعان ولەڭدەرىمدى باسپا بەتتەرىنە بەرمەيتىن بولدىم دەپ سىرىن ايتقان ەدى. ءوزىڭىز ايتىپ وتىرسىز، «تاۋسىلدىم، وكىنىشىم جوق، جازارىمدى جازدىم»، - دەپ اقيقاتىن ايتىپ وتىرسىز. كەيدە ادام تاۋسىلعانىن بىلمەي جازا بەرەتىن سياقتى.

اكىم تارازي: وندايلار كوپ. ولاي جازابەرگىشتىك - دارىنسىزدىقتىڭ بەلگىسى. ءوزىڭ بىلەسىڭ، مەن ءوزىمدى- ءوزىم ايامايمىن. روماندارىمدى وقىپ وتىرىپ استىن سىزاتىنىم ريزامىن، «مىناۋىڭ جاقسى ەكەن اكىم» دەگەنىم. ءوزىمدى الدىمەن كىتاپ بوپ شىقپاي تۇرىپ سىنايمىن. جىرتىپ تاستاعان كەزدەرىم دە بولدى. ەرتەدەن كەشكە دەيىن 8-10 ساعات وتىرىپ ەكى بەت جازاتىن اداممىن. ونداي ادام قاتەلەسە قويمايدى. ۇساق- ۇساق ارىپتەرمەن تىعىز جازامىن، ايتپەسە، ويىم قاشىپ كەتەتىندەي كورىنەدى. بۇل ەندى مەنىڭ ادامي ەمەس فيزيكالىق سەزىمىم.

روزا مۇقانوۆا: جۇمىس ىستەيتىن كەزىڭىزدەگى تابيعاتىڭىزداعى ەرەكشەلىك قومدانىپ، قاباعىڭىزدى ءتۇيىپ، ەشكىممەن سويلەسكىڭىز كەلمەي، ءوزىڭىزدى ءوزىڭىز قاماپ ۇستاپ، سىرتپەن بايلانىستى بۇتىندەي ءۇزىپ تاستاپ تىم بولەكشە وزگەرىسكە تۇسكەنىڭىزدە مەن العاشىندا تۇسىنبەيتىنمىن. اۋىرىپ ءجۇر مە، ونىسىن جاسىرىپ ءجۇر مە دەپ ۋايىمدايتىنمىن. ال مەن شىعارما جازىپ جۇرگەندە سونداي قۋانىپ، شاتتانىپ، مەنەن باقىتتى ادام جوقتاي، اناۋ پروتسەسستىڭ ءجۇرىپ جاتقانىنا راحاتتانىپ، كەي جەرىن سىزگە وقىپ بەرىپ، قاناتتانىپ ارى قاراي جازىپ كەتە بەرەتىنىم بار. سىزدەگى كۇيدىڭ جۇمباقتانۋى تىم قيىن ەمەس پە؟

اكىم تارازي: قيىن، ارينە. مەن ميىمدا سويلەم قۇرايمىن. ءارتۇرلى ۆاريانتتاردى ۇيلەستىرەم. ويلارىم قويۋ، كۇردەلى بولۋ ءۇشىن تىعىز جازامىن. كۇردەلى وي 5-6 سويلەممەن ءبىتىپ قالۋى مۇمكىن. ەندىگى سويلەمىم قالاي بولۋ كەرەك دەپ تاعى وتىرام. جۇرتتىڭ شىعارماسىن وقىپ- وقىپ الىپ جازاتىن جازۋشىلار از ەمەس. اۋەزوۆتى، مۇسىرەپوۆتى وقىپ الىپ سولارعا ەلىكتەپ جازاتىندار بار. ۇيالماي شىعارادى. وداققا وتسەم، پاتەر السام دەيدى. پاتەر الۋ ءۇشىن جازعام جوق ەش ۋاقىتتا. مەن پاتەردى ورتالىق پارتيا كوميتەتىنەن عانا الىپ ءجۇردىم.

روزا مۇقانوۆا: ەندى ءسىز باستىق بولدىڭىز، باستىق بولۋدىڭ راحاتىن دا كوردىڭىز عوي.

اكىم تارازي: راحات! راحاتتى سەن دە كورىپ وتىرسىڭ عوي... (قوسىلىپ كۇلىپ الدى)

روزا مۇقانوۆا: سالقىنقاندىلىق پا، سابىرلىلىق پا، ەلپەڭ ەتىپ سوزگە ەرىپ، توپتالىپ جازعان حاتتارعا قول قويىپ جىبەرەتىن ەلگەزەكتىك ءسىزدىڭ تابيعاتىڭىزدا جوق. بۇل ومىرلىك تاجىريبە مە، الدە جاراتىلىسىڭىز با؟

اكىم تارازي: مىرزا- مۇحاممەد دەگەن اتام تولە ءبيدىڭ وققاعارى بولعان. ول كىسى الپامىس پەن ارۋزانىڭ جەتىنشى اتاسى. مەنىڭ التىنشى اتام. اتام ءاشىم داموللا بۇقارادان ەكى جىل ءبىلىم العان وقىمىستى، قازىرگى تىلمەن ايتقاندا جامبىل وبلىسىنىڭ باس ءمۇفتيى بولعان. سوندىقتان، بۇل مىنەز مەنىڭ تەگىمنەن، جاراتىلىسىمنان دەپ ويلايمىن.

روزا مۇقانوۆا: مەن ءوز باسىم ءسىز سياقتى سابىرلى بولعاندى ۇناتامىن. سىزگە ەلىكتەگىم دە كەلگەن. تابيعاتىم بولەك بولعاسىن ءسىز بولا المايتىنىمدى دا بىلەمىن.

اكىم تارازي: ۇرسۋدى بىلاي قويعاندا، ساعان كۇيەۋىڭمىن دەپ ومىرىمدە ءبىر سىن ايتتىم با؟ ماعان نەگە پالاۋ ەمەس قۋىرداق بەردىڭ دەپ تاماعىڭا ءمىن تاقتىم با؟ سەبەبى، مەن سەنى تۇسىنەمىن. ايامايمىن. تۇسىنەمىن. جارتى جىلدان كەيىن مەنىڭ بارلىق تالعامىمدى ءبىلىپ الدىڭ عوي. قالاي كيىنىپ، قالاي تۇراتىنىمدى؟ ..

روزا مۇقانوۆا: ءسىز ءوز بولمىسىڭىزعا لايىقتى عىپ مەنى تاربيەلەپ الدىڭىز عوي دەيمىن.

اكىم تارازي: مۇمكىن.. . تاربيەلەۋدەن گورى بولمىسىممەن ساعان اسەر ەتتىم دەپ ويلايمىن. جازۋدىڭ وزىندە بۇرىنعىداي اسىقپايسىڭ.. .

روزا مۇقانوۆا: ورىستاردىڭ «مۋج ي جەنا - ودنا ساتانا» دەگەنى سياقتى بولدى عوي.. . (كۇلىپ الدى)

وسى جاسقا كەلگەندە دۇنيەدە ەڭ قىمبات نارسە نە دەپ شەشتىڭىز؟

اكىم تارازي: ادامدى ادامنىڭ سىيلاي ءبىلۋى. ءوز شەشىمىڭمەن وتباسىن قۇرعان ەكەنسىڭ، ءوز وتباسىڭا بەرىك بول. سەنى سىرتىڭنان قانشاما ۋاقىت سىناپ ءجۇردىم عوي، سوسىن بارىپ مىنا قىزدى الۋىم كەرەك دەپ شەشتىم.

جالعاسى بار...

جازىپ العان:

باقىتبەك قادىر

ۇمتىل زارىققان

https://adebiportal.kz