قالمۇحانبەت قاسىموۆ اقتاۋداعى جارىلىسقا قاتىستى پىكىر ءبىلدىردى

استانا. قازاقپارات - ق ر ىشكى ىستەر ءمينيسترى قالمۇحانبەت قاسىموۆ اقتاۋداعى مەتال سىنىقتارىن قابىلداۋ بازاسىنىڭ اۋماعىنداعى جارىلىسقا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«كەشە كەشكىسىن، جەرگىلىكتى ۋاقىت بويىنشا 17:25 تە اقتاۋداعى مەتال سىنىقتارىن قابىلداۋ ورىندارىنىڭ بىرىندە جارىلىس بولدى. ءبىزدىڭ انىقتاۋىمىزشا، ءتورت ادام «گازەلگە» وتىرعان. ەش جەردە تىركەلمەگەن مەتال جيناۋشىلار دالادان تەمىر سىنىقتارىن جيناۋعا شىققان. شامامەن التى قاپ مەتال جيناپ، ەش جەردە تىركەلمەگەن، عيماراتتى جالعا الىپ وتىرعان قابىلداۋ پۋنكتىنە كەلگەن. مەتالداردى وتكىزۋ بارىسىندا جارىلىس بولىپ، تەمىر سىنىقتارىن قابىلداۋشى مەن تاپسىرۋشى قازا تاپقان. ۇشەۋى جاراقات السا، ونىڭ بىرىنە كومەك كورسەتىلدى، ال ەكەۋى اۋرۋحاناعا جاتقىزىلدى. بارلىعى دا اقتاۋ قالاسىنىڭ تۇرعىندارى»، - دەدى ول ءماجىلىستىڭ جالپى وتىرىسىنان كەيىن ب ا ق وكىلدەرىنىڭ ساۋالىنا وراي.

ونىڭ ايتۋىنشا، توتەنشە وقيعا ورنىندا اسكەريلەرمەن بىرگە تەكسەرۋ امالدارى جۇرگىزىلىپ جاتىر. قازىرگى ۋاقىتتا قايعىلى وقيعانىڭ ەكى نۇسقاسى قاراستىرىلۋ ۇستىندە. ياعني، قانداي دا ءبىر بوگدە زات نەمەسە مەتالدى كەسۋگە ارنالعان گاز قۇرىلعىنىڭ جارىلۋى ىقتيمال.

سونىمەن قاتار مينيستر گراناتا جارىلدى دەگەن وسەك-اياڭعا دا قاتىستى جاۋاپ بەردى.

«گراناتا نەمەسە سنارياد جارىلعاندىعىن راستاي المايمىز. شۇڭقىر جوق، انىقتايتىن بولامىز»، - دەدى ق. قاسىموۆ.

ايتا كەتەيىك، بۇعان دەيىن ق ر ءى ءى م توتەنشە جاعدايلار كوميتەتىنىڭ «ارلان» قىزمەتكەرلەرى جارىلىس ورنىنان 11 دانا وقىتۋ سناريادتارىن تاپقانىن جازعان بولاتىنبىز.