ستراسبۋرگتە قاندى قىرعىن سالعان ادامنىڭ جەكە تۇلعاسى انىقتالدى
جەرگىلىكتى بيلىك 12 - جەلتوقسان ستراسبۋرگتە قارالى كۇن دەپ جاريالادى. وسىعان وراي شاھاردا روجدەستۆولىق جارمەڭكەلەر مەن مەرەكەلىك ءىس- شارالار كەيىنگە قالدىرىلدى. فرانسيا پرەزيدەنتى ەممانۋەل ماكرون ىشكى ىستەر مينيسترلىگىنىڭ داعدارىس شتابىنىڭ جابىق تۇردە شۇعىل كەڭەسىن ۇيىمداستىردى. قازاقستاننىڭ سىرتقى ىستەر مينيسترلىگى ستراسبۋرگتەگى اتىسقا قازا تاپقاندار مەن جارالانعانداردىڭ اراسىندا قازاقستان ازاماتتارىنىڭ بار- جوعىن انىقتاپ جاتىر.
ەستەرىڭىزگە سالايىق، ستراسبۋرگ قالاسىندا اتىس وقيعاسى جەرگىلىكتى ۋاقىت بويىنشا كەشكى ساعات 8-دە بولعان. ءتارتىپ ساقشىلارى قاسكويگە وق اتىپ ونى جارالاعانمەن، كۇدىكتى ءىزىن سۋىتىپ ۇلگەردى. كۋاگەرلەردىڭ ايتۋىنشا، اتىس 10 مينۋتتاي جالعاسقان. الدىن الا بولجام بويىنشا 3 ادام قازا تاۋىپ، 10 ادام جارالانعان.
جەرگىلىكتى بيلىك تۇرعىنداردى ۇيلەرىنەن شىقپاۋعا شاقىرادى. ءبىزدىڭ وسى ەلدەگى ءتىلشىمىز جانات ەرنست وقيعا ورنىندا ءجۇر. ول ستراسبۋرگتەگى ەۋروپا پارلامەنتىنىڭ دەپۋتاتى ميروسلاۆ ميتروفانوۆپەن تەلەفون ارقىلى تىلدەسۋگە مۇمكىندىك الدى.
ميروسلاۆ ميتروفانوۆ، ەۋروپا پارلامەنتىنىڭ دەپۋتاتى:
- بۇگىن ءبىزدىڭ فراكسيامىزدا شاعىن شارا ءوتۋى ءتيىس ەدى. وعان جۇمىس ۋاقىتىنان كەيىن ساعات 9-دا ستراسبۋرگ ورتالىعىندا كەزدەسۋىمىز كەرەك بولاتىن. وقيعا سول جەرگە جاقىن جەردە بولدى. ءتارتىپ ساقشىلارى اتىس بولعان اۋماقتى تولىق قورشاعاندىقتان ءبىز جاقىنداي الماي كەرى قايتتىق. قاۋىپسىزدىك شارالارى ەسكەرىلىپ نىسانداعى ادامدار دا سىرتقا شىعارىلمادى.
ەۋروپالىق پارلامەنتكە اپاراتىن جول دا جابىلعانىن بىلدىك. لاڭكەستىك روجدەستۆولىق بازارلاردىڭ بىرىندە بولدى. ول ورىندى تاڭداۋدىڭ دا تەگىن ەمەس ەكەنىن ايتا كەتۋ كەرەك. سەبەبى ستراسبۋرگتە ساياحاتشىلار كوپ. وقيعاعا قاتىستى جاۋاپكەرشىلىكتى ءالى ەشكىم موينىنا العان جوق. ىزدەستىرۋ جۇمىستارى جالعاسىپ جاتىر. كۇدىكتىنى ۇستاۋعا 350 ارنايى اگەنت جۇمىلدىرىلعان.
قازىر ستراسبۋرگكە فرانسيانىڭ ىشكى ىستەر ءمينيسترى اتتاندى. رەسمي ەمەس دەرەكتەر بويىنشا 29 جاستاعى شاريف - ستراسبۋرگ قالاسىنىڭ تۇرعىنى. قالا ورتالىعىنداعى مەيرامحانالارداعى ادامداردىڭ بارلىعى ەۆاكۋاتسيالاندى. قوعامدىق كولىك قاتىناسى دا ۋاقىتشا توقتادى. پوليتسيا جاقىن ماڭداعى عيماراتتاردى ءتىنتىپ جاتىر. قالاداعى بارلىق اۋرۋحانالار دا ساقاداي ساي.
www.24.kz