نۇرسۇلتان نازاربايەۆ: جاڭا ەكونوميكا قۇرۋىمىز قاجەت

استانا. قازاقپارات - ەكسپو كونگرەسس- ورتالىعىندا وتكەن «يندۋستريالاندىرۋدىڭ ەكىنشى بەسجىلدىعى: قازاقستاندا جاسالعان» اتتى جالپى ۇلتتىق تەلەكوپىر بارىسىندا ەلباسى نۇرسۇلتان نازاربايەۆ جاڭا ەكونوميكا قۇرۋىمىز قاجەتتىگىن ايتتى، دەپ حابارلايدى قازاقپارات ءتىلشىسى.

 «بىزدە كەننىڭ بارلىق ءتۇرى بار. سول بايلىقتى قولدانىپ، ءوسىپ جاتىرمىز. ءبىراق، ءبىز باسقا ەكونوميكانى قۇرماساق، ارتتا قالىپ قوياتىندىعىمىز بەلگىلى بولدى. مۇنايدىڭ دا، گازدىڭ دا، تەمىردىڭ دە، كومىردىڭ دە باعاسى بىرەسە جوعارلاپ، بىرەسە تومەندەپ، ەكونوميكاعا قيىن بولاتىندىعىن كوردىك. سوندىقتان 2- بەسجىلدىقتىڭ يندۋستريالدىق باعدارلاماسىن جاساپ جاتىرمىز. ول دا كەرەك. ال بولاشاقتا جەردىڭ بايلىعى وكىنىشكە وراي، تاۋسىلاتىن بولادى. سوندىقتان ءبىز جاڭا ەكونوميكا قۇرۋىمىز قاجەت»، - دەدى ەلباسى.

وسى رەتتە، پرەزيدەنت بۇگىنگى جالپى ۇلتتىق تەلەكوپىر بارىسىندا ىسكە قوسىلعان 28 نىسان سول جاڭا ەكونوميكانىڭ نەگىزى ەكەندىگىن باسا ايتتى.

«مۇنىڭ بارلىعىن تەلەديدار، اقپارات قۇرالدارى ارقىلى حالىققا جەتكىزۋىمىز كەرەك. بۇل ءبىزدىڭ مامانداردىڭ، حالىقتىڭ، ەلدىڭ ىستەپ جاتقان ۇلكەن ەڭبەگى»، - دەدى نۇرسۇلتان نازاربايەۆ.

 مەملەكەت باسشىسى بۇگىن «پارىز»، «التىن ساپا» جانە «قازاقستاننىڭ ۇزدىك تاۋارى» ۇلتتىق كونكۋرستارىنىڭ جەڭىمپازدارى جىل سايىن ماراپاتتالاتىندىعىن اتاپ ءوتتى.

 «ول دۇرىس دەپ سانايمىن. وسىعان قاراپ ساپ تۇزەپ، باسقا وندىرىستەر دە ءوسىپ- وركەندەي بەرەدى دەپ سەنەمىز. ءبىز كاسىبىن ىلگەرىلەتىپ العا شىققان كاسىپورىنداردى اتاپ، قوشەمەتتەگەنىمىز دۇرىس دەپ ەسەپتەيمىز. بارلىق جەردە دە سولاي ىستەۋ كەرەك»، - دەدى مەملەكەت باسشىسى.

اۆتور: مارلان جيەمباي